Норвегийә уйғур комитети сайлам паалийити өткүзди

Ихтиярий мухбиримиз айгүл йүсүп
2013.05.13
nighmet-hajim.jpg Норвегийә уйғур комитети сайлам паалийитидин хатирә сүрәт. 2013-Йили 11-май. Ниғмәт һаҗим(алдинқи қур оңдин үчинчи) әпәнди норвегийә уйғур комитетиниң рәисликигә сайланди вә сабиқ рәис пәрһат яқуп(алдинқи қур солдин иккинчи) әпәндини гүлдәстә билән узитип қойди.
RFA/Aygul

11-Май күни норвегийә уйғур комитети 2013-йиллиқ сайлам паалийити елип берип, комитетниң йеңи рәһбәрлирини сайлап чиқти.

Норвегийә уйғур комитети 2003-йили қурулған болуп, комитетниң низамнамиси бойичә һәр үч йилда бир қетим демократик усулда сайлам елип бериш бекитилгән иди. Шу низамнамигә асасән, бу йилқи 5-қетимлиқ сайлам паалийитиниң оңушлуқ елип берилиши үчүн тәшкилат рәһбәрлири айлардин буян әтраплиқ тәйярлиқ қилған вә бир сайлам гурупписи қуруп чиқилған иди.

Шәнбә күнидики сайлам паалийити башлиништин илгири, шәрқий түркистан истиқлал марши яңриғанда сайлам иштиракчилири қоллирини көксигә қоюп марш түгигичә һөрмәт билән өрә турди. Андин сабиқ рәис пәрһат яқуп әпәнди бүгүнки сайламниң күн тәртиплирини елан қилғандин кейин, өзи вәзипидә олтурған үч йилдин бери ишлигән хизмәтлирини доклат қилди.

Пәрһат яқуп әпәнди сөзиниң ахирини бу йәрдә болидиған һәр қандақ сиясий паалийәткә қатнишиш һәр бир уйғурниң виҗдани қәрзи вә вәзиписи дәп ахирлаштурди.

Муавин рәисләр вә малийигә мәсул рәһбәрләрму өз хизмәтлиридин доклат берип өткәндин кейин, йиғин күнтәртипигә асасән үч кишилик сайлам назарәт гурупписи қурулуп сайлам җәряни назарәт қилинди вә демократик усулда комитетиниң рәһбәрлик гурупписи пүтүнләй йеңидин сайлап чиқилди.

Көпчиликниң бирдәк аваз бериши билән ниғмәт һаҗим норвегийә уйғур комитетиниң рәисликигә сайланди. “биз бу йәрдә, вәтәндә бигунаһ шеһит қилинғанларниң вә түрмидә йетиватқанларниң қан-яшлири бәдилигә яшаватимиз” дәп сөзгә чиққан ниғмәт һаҗим нутқини һаяҗан билән давамлаштурди.

Норвегийәниң пайтәхти осло вә осло әтрапидики чоң-кичик шәһәрләрдин кәлгән йүзгә йеқин кишиниң қатнишиши билән сайлам паалийити интайин нәтиҗилик елип берилди вә илгири вәзипидә турғанларниң ишлигән хизмәтлиригә рәһмәтләр ейтилди һәмдә көпчилик сабиқ рәис пәрһат яқуп әпәндини гүлдәстә билән узитип қойди. Ахирида көпчилик мәззилик етилгән тамақларға дахил болуп шеһитларниң роһиға дуа қилип, сайлам паалийитини көңүллүк ахирлаштурди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.