Norwégiye Uyghur komitéti saylam pa'aliyiti ötküzdi

11-May küni norwégiye Uyghur komitéti 2013-yilliq saylam pa'aliyiti élip bérip, komitétning yéngi rehberlirini saylap chiqti.

Norwégiye Uyghur komitéti 2003-yili qurulghan bolup, komitétning nizamnamisi boyiche her üch yilda bir qétim démokratik usulda saylam élip bérish békitilgen idi. Shu nizamnamige asasen, bu yilqi 5-qétimliq saylam pa'aliyitining ongushluq élip bérilishi üchün teshkilat rehberliri aylardin buyan etrapliq teyyarliq qilghan we bir saylam guruppisi qurup chiqilghan idi.

Shenbe künidiki saylam pa'aliyiti bashlinishtin ilgiri, sherqiy türkistan istiqlal marshi yangrighanda saylam ishtirakchiliri qollirini köksige qoyup marsh tügigiche hörmet bilen öre turdi. Andin sabiq re'is perhat yaqup ependi bügünki saylamning kün tertiplirini élan qilghandin kéyin, özi wezipide olturghan üch yildin béri ishligen xizmetlirini doklat qildi.

Perhat yaqup ependi sözining axirini bu yerde bolidighan her qandaq siyasiy pa'aliyetke qatnishish her bir Uyghurning wijdani qerzi we wezipisi dep axirlashturdi.

Mu'awin re'isler we maliyige mes'ul rehberlermu öz xizmetliridin doklat bérip ötkendin kéyin, yighin küntertipige asasen üch kishilik saylam nazaret guruppisi qurulup saylam jeryani nazaret qilindi we démokratik usulda komitétining rehberlik guruppisi pütünley yéngidin saylap chiqildi.

Köpchilikning birdek awaz bérishi bilen nighmet hajim norwégiye Uyghur komitétining re'islikige saylandi. “Biz bu yerde, wetende bigunah shéhit qilin'ghanlarning we türmide yétiwatqanlarning qan-yashliri bedilige yashawatimiz” dep sözge chiqqan nighmet hajim nutqini hayajan bilen dawamlashturdi.

Norwégiyening paytexti oslo we oslo etrapidiki chong-kichik sheherlerdin kelgen yüzge yéqin kishining qatnishishi bilen saylam pa'aliyiti intayin netijilik élip bérildi we ilgiri wezipide turghanlarning ishligen xizmetlirige rehmetler éytildi hemde köpchilik sabiq re'is perhat yaqup ependini güldeste bilen uzitip qoydi. Axirida köpchilik mezzilik étilgen tamaqlargha daxil bolup shéhitlarning rohigha du'a qilip, saylam pa'aliyitini köngüllük axirlashturdi.