Гумидики оқутқучилар тәтил вә дәм елиш күнлиридә нопус ениқлаш ишиға селинмақтикән

Мухбиримиз қутлан
2015.12.10
Share on WhatsApp
Share on WhatsApp
korla-oqutquchi-qanunsiz-diniy-305.jpg Корла шәһәрлик 9-башланғуч мәктәп оқутқучилириға “диний паалийәтләргә қатнашмаслиқ” вәдинамисигә қол қойдурмақта. 2012-Йили март.
Boshun/korla sheherlik ma’arip uchuri tori

Игилишимизчә, гума наһийәсиниң һәрқайси йезилиқ партком вә йәрлик һөкүмәтлири язлиқ вә қишлиқ тәтил мәзгилидә оттура-башланғуч мәктәпләрниң оқутқучилирини нопус ениқлаш яки архип турғузуштәк ишларға салған.

Сақчиханиларниң вәзиписини оқутқучиларға зорлап теңиштәк бу әһвал шу йәрдики оқутқучиларда наразилиқ пәйда қилған. Гума наһийәсидики бир қисим сақчиханиларму бу әһвалниң растлиқини дәлиллиди.

Мәлумки, нопус ениқлаш вә аһалиләрниң архипини турғузуш иши әслидә сақчиханиларниң вәзиписи икән. Һалбуки, наһийәлик вә йезилиқ парткомлар өткән йилидин буян сақчиханиларниң күчни мәркәзләштүрүп пәқәтла “муқимлиқ” қа капаләтлик қилиши һәққидә көрсәтмә бәргән. Буниң билән сақчиханиларниң нопус ениқлаш вә тизимлаш вәзиписи йәрликтики оқутқучилар вә башқа идариләрдики хизмәтчиләргә йүкләп қоюлған.

Гума наһийәсиниң мәлум йезисидики башланғуч мәктәптә хизмәт қилидиған бир яш оқутқучи бу һәқтә зияритимизни қобул қилди вә өзлири дуч келиватқан әһваллар һәққидә учур бәрди.

Униң көрситишичә, алдинқи йилидин буян мәктәптики оқутқучилар язлиқ вә қишлиқ тәтилдә нормал дәм алалмиған. Һәр бир оқутқучиға кәнттики аһалиләр тәқсим қилинип, уларниң ройхетини турғузуш, йеңи туғулған бовақларни ениқлаш, өлгәнләрни тизимлаш, башқа юртларға кәткәнләрниң архипини турғузуш қатарлиқ ишларға селинған.

Мәзкур оқутқучиниң билдүрүшичә, бу вәзипә әслидә сақчиханиларниң хизмәт тәвәликидики иш болсиму, лекин йезилиқ парткомниң қарари болғачқа һечким наразилиқ билдүрәлмәйдикән. Һәр бир оқутқучиға нопуси аз кәнтләр болса бирдин мәһәллини, нопуси көп кәнтләрдә 70 тин 100 гичә аилини бөлүп бәргән. Оқутқучилар мәхсус нопус дәптирини көтүрүп өйму-өй арилап айларчә бу иш билән аварә болидикән. Андин улар тизимға елинған учурларни компютерға киргүзүп сақчи ториға йоллайдикән. Әгәр ишлигән нопус тизимлики сақчи торидин өтмисә, уларниң иши инавәтсиз қилинип, башқидин ишләйдикән.

Биз гумидики оқутқучиларниң инкасини йәрлик даириләрниң баяни арқилиқ дәлилләш үчүн гуминиң муҗи вә чода йезилиқ сақчиханилириға телефон қилдуқ. Һалбуки, сақчихана хадимлири соаллиримизға җаваб беришни рәт қилди.

Биз ахирида гума наһийәсиниң мокойла йезилиқ сақчиханисиға телефон қилдуқ. Телефонимизни қобул қилған сақчи хадими гумида 2 йилдин буян оқутқучиларниң тәтил вақтини нопус ениқлаш билән өткүзүватқанлиқини етирап қилди.

Телефонимизға җаваб бәргән сақчи хадими мундақ деди: “шундақ, бу иш раст! икки йилдин буян сақчиханилар ‛муқимлиқ‚ сақлаш билән алдираш болуватиду. Сиз ейтқандәк нопус ениқлаш иши әслидә сақчиханиларниң вәзиписи иди. Әмма йеқиндин буян ‛муқимлиқ‚ хизмити барлиқ хизмәтләрниң үстигә қоюлуватқан болғачқа, башқа ишларға сақчиханиларниң әмәлий күчи йетишмиди. ярдәмчи сақчиларни тохтимай қобул қиливатқан болсиму, лекин адәм күчи йәнила йетишмәйватиду. Йезилиқ парткомлар бу әһвални көздә тутуп, нопус ениқлаш ишиға оқутқучилар вә башқа саһәдики хадимларни сәпләватиду. Адәттә һәр бир мәктәп вә кәспий орунлардин 5 артуқ хизмәтчи хадим сақчиханиларниң нопус ениқлаш ишиға сәпләнди.”

Тәпсилатини аваз улиништин аңлиғайсиз.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.