Gumidiki oqutquchilar tetil we dem élish künliride nopus éniqlash ishigha sélinmaqtiken

Muxbirimiz qutlan
2015-12-10
Share
korla-oqutquchi-qanunsiz-diniy-305.jpg Korla sheherlik 9-bashlan'ghuch mektep oqutquchilirigha "Diniy pa'aliyetlerge qatnashmasliq" wedinamisige qol qoydurmaqta. 2012-Yili mart.
Boshun/korla sheherlik ma’arip uchuri tori

Igilishimizche, guma nahiyesining herqaysi yéziliq partkom we yerlik hökümetliri yazliq we qishliq tetil mezgilide ottura-bashlan'ghuch mekteplerning oqutquchilirini nopus éniqlash yaki arxip turghuzushtek ishlargha salghan.

Saqchixanilarning wezipisini oqutquchilargha zorlap téngishtek bu ehwal shu yerdiki oqutquchilarda naraziliq peyda qilghan. Guma nahiyesidiki bir qisim saqchixanilarmu bu ehwalning rastliqini delillidi.

Melumki, nopus éniqlash we ahalilerning arxipini turghuzush ishi eslide saqchixanilarning wezipisi iken. Halbuki, nahiyelik we yéziliq partkomlar ötken yilidin buyan saqchixanilarning küchni merkezleshtürüp peqetla "Muqimliq" qa kapaletlik qilishi heqqide körsetme bergen. Buning bilen saqchixanilarning nopus éniqlash we tizimlash wezipisi yerliktiki oqutquchilar we bashqa idarilerdiki xizmetchilerge yüklep qoyulghan.

Guma nahiyesining melum yézisidiki bashlan'ghuch mektepte xizmet qilidighan bir yash oqutquchi bu heqte ziyaritimizni qobul qildi we özliri duch kéliwatqan ehwallar heqqide uchur berdi.

Uning körsitishiche, aldinqi yilidin buyan mekteptiki oqutquchilar yazliq we qishliq tetilde normal dem alalmighan. Her bir oqutquchigha kenttiki ahaliler teqsim qilinip, ularning royxétini turghuzush, yéngi tughulghan bowaqlarni éniqlash, ölgenlerni tizimlash, bashqa yurtlargha ketkenlerning arxipini turghuzush qatarliq ishlargha sélin'ghan.

Mezkur oqutquchining bildürüshiche, bu wezipe eslide saqchixanilarning xizmet tewelikidiki ish bolsimu, lékin yéziliq partkomning qarari bolghachqa héchkim naraziliq bildürelmeydiken. Her bir oqutquchigha nopusi az kentler bolsa birdin mehellini, nopusi köp kentlerde 70 tin 100 giche a'ilini bölüp bergen. Oqutquchilar mexsus nopus deptirini kötürüp öymu-öy arilap aylarche bu ish bilen aware bolidiken. Andin ular tizimgha élin'ghan uchurlarni kompyutérgha kirgüzüp saqchi torigha yollaydiken. Eger ishligen nopus tizimliki saqchi toridin ötmise, ularning ishi inawetsiz qilinip, bashqidin ishleydiken.

Biz gumidiki oqutquchilarning inkasini yerlik da'irilerning bayani arqiliq delillesh üchün gumining muji we choda yéziliq saqchixanilirigha téléfon qilduq. Halbuki, saqchixana xadimliri so'allirimizgha jawab bérishni ret qildi.

Biz axirida guma nahiyesining mokoyla yéziliq saqchixanisigha téléfon qilduq. Téléfonimizni qobul qilghan saqchi xadimi gumida 2 yildin buyan oqutquchilarning tetil waqtini nopus éniqlash bilen ötküzüwatqanliqini étirap qildi.

Téléfonimizgha jawab bergen saqchi xadimi mundaq dédi: "Shundaq, bu ish rast! ikki yildin buyan saqchixanilar 'muqimliq' saqlash bilen aldirash boluwatidu. Siz éytqandek nopus éniqlash ishi eslide saqchixanilarning wezipisi idi. Emma yéqindin buyan 'muqimliq' xizmiti barliq xizmetlerning üstige qoyuluwatqan bolghachqa, bashqa ishlargha saqchixanilarning emeliy küchi yétishmidi. Yardemchi saqchilarni toxtimay qobul qiliwatqan bolsimu, lékin adem küchi yenila yétishmeywatidu. Yéziliq partkomlar bu ehwalni közde tutup, nopus éniqlash ishigha oqutquchilar we bashqa sahediki xadimlarni seplewatidu. Adette her bir mektep we kespiy orunlardin 5 artuq xizmetchi xadim saqchixanilarning nopus éniqlash ishigha seplendi."

Tepsilatini awaz ulinishtin anglighaysiz.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet