Қайнуқлуқ деһқанларниң өстәң қурулушидин тартқан зийиниға берилгән төләм пули нәгә кәтти?

Мухбиримиз әркин
2013.04.04
dehqan-305.jpg Уйғур елидики деһқанлар.
RFA

Бир нәччә йил аввал тоққузтара наһийисидин чапчал наһийисигә өстәң чепип, чапчал наһийисиниң җағистай, қайнуқ қатарлиқ йезилиридики су қислиқ мәсилисини һәл қилиш қурулуши елип берилған. Бу җәрянда қайнуқ йезисидики бир қисим деһқанларниң терилғу йәрлири өстәң қурулушиға чиқип кәткән. Даириләр деһқанларниң өстәң қурулушидин тартқан зийиниға мәлум миқдарда төләм пули аҗратқан болсиму, бирақ төләм пулиниң мутләқ көп қисми деһқанларниң қолиға тәгмигән. Буниңдин хәвәр тапқан деһқанлар аптоном районға қәдәр берип әрз қилған. Бирақ деһқанлар әрзини һазирға қәдәр ақтуралмиған.

Тоққузтара-чапчал өстәң қурулушида бир қисим терилғу йери зиянға учриған деһқан аилиләрниң һәр бир мо йеригә дәсләпки төләм пулида 450 сом бәргән болсиму, бирақ деһқанларниң наразилиқиға учрап кетип, 2012‏-йили һәр мо бешиға йәнә 540 сом қошуп бәргән. Өстәң қурулушида бир қисим терилғу йеридин айрилип қалған қайнуқлуқ деһқанларниң билдүрүшичә, юқириниң тоққузтара-чапчал өстәң қурулушида деһқанларға аҗратқан төләм пулиниң интайин аз бир қисми деһқанға берилгән. Мутләқ көп қисим төләм пули деһқанларниң қолиға тәгмигән. Деһқанларға тәгмигән мутләқ көп қисим төләм пули нәгә кәтти? қайнуқлуқ бир деһқан зияритимизни қобул қилип, йәрлик һөкүмәт даирилириниң деһқанларға қанаәтлинәрлик җаваб беришини тәләп қилди.

Мәзкур вәқә ши җинпиң башчилиқидики хитай йеңи рәһбәрлик гуруһи һакимийәткә чиқип, чериклик мәсилисини қаттиқ бир тәрәп қилидиғанлиқини җар селиватқан мәзгилдә оттуриға қоюлуши вә уйғур тор бәтлиридә муназирә қозғиши диққәт қозғиди. Йәр даваси хитайда наразилиқ қозғаватқан омуми мәсилә болсиму, лекин уйғур ели хитайниң ечиш, көчмән йөткәштики нуқтилиқ нишани болуп болғачқа, йәрлик хәлқниң бу мәсилидики наразилиқи күчлүк райондур.

Юқириқи деһқанниң билдүрүшичә, деһқанларға чүшүрүлгән төләм пулниң 16 дән бир қисми деһқанларға берилгән. У областлиқ һөкүмәт һәр бир мо йәрниң йиллиқ киримигә қарап пул чүшүргәнликини, бирақ төләм пулниң мутләқ көп қисмини наһийә вә йезилиқ һөкүмәт тутуп қалғанлиқини билдүрди.

Биз дәвагәр деһқанларниң әрз-шикайити һәққидә илгириләп мәлумат елишни көзләп, қайнуқ йезилиқ партийә ячейкисиниң һазирқи секретари ялқунға телефон қилдуқ. Бирақ ялқун мәзкур мәсилә тоғрилиқ мәлумат беришни рәт қилип, телефонни қоювәтти. юқириқи деһқанниң шикайәт қилишичә, юқиридин чүшүрүп бәргән төләм пулиниң бир қисмиға қайнуқ йезилиқ партийә ячейкисиниң сабиқ секретари абликим йол чириғи қойдурувалған. юқириқи әрздар деһқан йәнә, өстәң қурулушида бәзи йеза кадирлириниң һечқандақ терилғу йери зиянға учримиған болсиму, бирақ уларға өстәң қурулушида зиянға учриған деһқанлар қатарида төләм пули берилгәнликини билдүрди.

Чапчалниң қайнуқ қатарлиқ йезилирини су билән тәминләватқан чапчал-тоққузтара ғол өстиңи илиниң йеқинқи йилларда ясалған муһим су иншаат қурулушлиридур. юқириқи деһқанниң билдүрүшичә, мәзкур өстәң һазир қайнуқ йезисиниң ара өстәң, чоң булақ вә қайнуқ қатарлиқ кәнтлирини су билән тәминләватиду. У, мәзкур өстәң қурулуши йәрлик хәлқниң қарши елишиға еришкән болсиму, бирақ һөкүмәт өстәң қурулушида зиянға учриған деһқанларни чоқум рази қилиши керәкликини билдүрди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.