Qaynuqluq déhqanlarning östeng qurulushidin tartqan ziyinigha bérilgen tölem puli nege ketti?

Muxbirimiz erkin
2013.04.04
dehqan-305.jpg Uyghur élidiki déhqanlar.
RFA

Bir nechche yil awwal toqquztara nahiyisidin chapchal nahiyisige östeng chépip, chapchal nahiyisining jaghistay, qaynuq qatarliq yéziliridiki su qisliq mesilisini hel qilish qurulushi élip bérilghan. Bu jeryanda qaynuq yézisidiki bir qisim déhqanlarning térilghu yerliri östeng qurulushigha chiqip ketken. Da'iriler déhqanlarning östeng qurulushidin tartqan ziyinigha melum miqdarda tölem puli ajratqan bolsimu, biraq tölem pulining mutleq köp qismi déhqanlarning qoligha tegmigen. Buningdin xewer tapqan déhqanlar aptonom rayon'gha qeder bérip erz qilghan. Biraq déhqanlar erzini hazirgha qeder aqturalmighan.

Toqquztara-chapchal östeng qurulushida bir qisim térilghu yéri ziyan'gha uchrighan déhqan a'ililerning her bir mo yérige deslepki tölem pulida 450 som bergen bolsimu, biraq déhqanlarning naraziliqigha uchrap kétip, 2012‏-yili her mo béshigha yene 540 som qoshup bergen. Östeng qurulushida bir qisim térilghu yéridin ayrilip qalghan qaynuqluq déhqanlarning bildürüshiche, yuqirining toqquztara-chapchal östeng qurulushida déhqanlargha ajratqan tölem pulining intayin az bir qismi déhqan'gha bérilgen. Mutleq köp qisim tölem puli déhqanlarning qoligha tegmigen. Déhqanlargha tegmigen mutleq köp qisim tölem puli nege ketti? qaynuqluq bir déhqan ziyaritimizni qobul qilip, yerlik hökümet da'irilirining déhqanlargha qana'etlinerlik jawab bérishini telep qildi.

Mezkur weqe shi jinping bashchiliqidiki xitay yéngi rehberlik guruhi hakimiyetke chiqip, chériklik mesilisini qattiq bir terep qilidighanliqini jar séliwatqan mezgilde otturigha qoyulushi we Uyghur tor betliride munazire qozghishi diqqet qozghidi. Yer dawasi xitayda naraziliq qozghawatqan omumi mesile bolsimu, lékin Uyghur éli xitayning échish, köchmen yötkeshtiki nuqtiliq nishani bolup bolghachqa, yerlik xelqning bu mesilidiki naraziliqi küchlük rayondur.

Yuqiriqi déhqanning bildürüshiche, déhqanlargha chüshürülgen tölem pulning 16 den bir qismi déhqanlargha bérilgen. U oblastliq hökümet her bir mo yerning yilliq kirimige qarap pul chüshürgenlikini, biraq tölem pulning mutleq köp qismini nahiye we yéziliq hökümet tutup qalghanliqini bildürdi.

Biz dewager déhqanlarning erz-shikayiti heqqide ilgirilep melumat élishni közlep, qaynuq yéziliq partiye yachéykisining hazirqi sékrétari yalqun'gha téléfon qilduq. Biraq yalqun mezkur mesile toghriliq melumat bérishni ret qilip, téléfonni qoyuwetti. Yuqiriqi déhqanning shikayet qilishiche, yuqiridin chüshürüp bergen tölem pulining bir qismigha qaynuq yéziliq partiye yachéykisining sabiq sékrétari ablikim yol chirighi qoyduruwalghan. Yuqiriqi erzdar déhqan yene, östeng qurulushida bezi yéza kadirlirining héchqandaq térilghu yéri ziyan'gha uchrimighan bolsimu, biraq ulargha östeng qurulushida ziyan'gha uchrighan déhqanlar qatarida tölem puli bérilgenlikini bildürdi.

Chapchalning qaynuq qatarliq yézilirini su bilen teminlewatqan chapchal-toqquztara ghol östingi ilining yéqinqi yillarda yasalghan muhim su insha'at qurulushliridur. Yuqiriqi déhqanning bildürüshiche, mezkur östeng hazir qaynuq yézisining ara östeng, chong bulaq we qaynuq qatarliq kentlirini su bilen teminlewatidu. U, mezkur östeng qurulushi yerlik xelqning qarshi élishigha érishken bolsimu, biraq hökümet östeng qurulushida ziyan'gha uchrighan déhqanlarni choqum razi qilishi kéreklikini bildürdi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.