Qaraqash we yeken nahiyeliride déhqanlarning öy qurulushi ishliri dawamlashmaqta

Ixtiyariy muxbirimiz éhsan
2016-04-19
Share
yeken-oy-selish-qurlushi.jpg Melum yézidiki oy sélish qurulushi. 2016-Yili, yeken.
RFA/Éhsan

Yéqinda chet'elge chiqqan, ismini ashkarilashni xalimaydighan bir kishining inkas qilishiche, Uyghur diyarining xoten wilayiti qaraqash nahiyisining bir qisim yézilirida déhqanlarni yer tewreshke chidamliq öylerge orunlashturush layihisi boyiche, kona öylerni chéqish we bezi jaylardiki del-derexlerni késish qurulushliri élip bérilish jeryanida, méwilik derexliri késilgen déhqanlargha yéterlik tölem bérilmeslik hem bashqa bir qatar naraziliq ehwalliri körülgen. Biz inkaslargha asasen, qaraqash nahiyisige téléfon qilish arqiliq bir qisim uchurlargha ige bolduq.

Igiligen uchurimizdin melum bolushiche, her bir öyi chéqilghan déhqan üchün hökümet tereptin 28ming som bérilidighanliqi élan qilin'ghan bolsimu, emma belgilen'gen orun'gha qayta öy sélish üchün texminen 60ming somdin artuq pul serp qilinidiken. Qalghan 32 som déhqanlardin élinidiken. Emma déhqanlarning köpinchisining mundaq zor chiqimni tölesh iqtidari yoq iken.

Ehwal igilesh jeryanida, téléfon ziyaritimizni qobul qilghan bir Uyghur kadir sorighan so'allirimizgha jawab bérip, bundaq ehwallarning mewjutluqini bildürdi.

Melum bolushiche, Uyghur rayonida yillardin buyan déhqanlarni yer tewreshke chidamliq öylerge orunlashturush, charwichi ahalilerge öy sélip bérip, orunlashturush, qeshqer kona sheher rayonini özgertip qurush dégendek we bashqa türlük namlardiki qurulushlar dawamlashmaqta.

Chet'elge sayahetke chiqqan bir kishining inkasliridin melum bolushiche, 2014-yil 7-ayda yekenning élishqu yézisida yüz bergen weqedin kéyin, bixeter öy sélish pilani boyiche yeken nahiyisige qarashliq yézilarda déhqanlarning öyliri chéqilip, yer tewreshke chidamliq öy sélishqa jiddiy kirishilgen bolup, 2016-yili kirgendin buyan bu pilan qedimi tézlitilip, yanwar éyidiki soghuq mezgilide öyliri chéqilghan déhqanlar sirtta chédir tikip olturushqa mejbur bolghan.

Biz déhqanlarning yéngi öylerge orunlashturulush we bashqa munasiwetlik ehwallarni igilesh üchün yeken nahiyilik teshwiqat idarisige téléfon qilduq. Téléfonni alghan xizmetchi xadim bu bölümde Uyghur kadirning yoqluqini bildürüsh bilen bille, yuqiri orunlardin xet élip kélip andin ziyaret qilishimiz kéreklikini dep, so'allirimizgha jawab bérishni ret qildi.

Emma, xitay tilidiki "Asiya kindiki" torining 2014-yili 10‏-aydiki, yeni yeken élishqu weqesi yüz bérip, ikki aydin kéyinki bir parche xewiride, yeken nahiyilik hökümetning yeken kona shehirini özgertip qurush yighini échip, kona yeken shehirini özgertip qurush ishlirini bashlashqa a'it teshwiqat, tekshürüsh xizmiti bashlighanliqi xewer qilin'ghan idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet