Ghulja üchderwaza saqchixanisi ahalilerning pasportini yighiwélish heqqide jiddiy uqturush chiqarghan (1)

Muxbirimiz qutlan
2015.05.12
pasport-yighish-uqturushi-ghulja.jpg Ahalilerning pasportlirini birdek saqchixanigha tapshurushini telep qilip chiqirilghan uqturush. 2015-Yili 30-aprél, ghulja.
Social Media

Yéqinda ijtima'iy taratqularda ghulja sheherlik üchderwaza saqchixanisining bir jiddiy uqturushi tarqitilghan. Uningda ahalilerning 2 hepte muddet ichide qolidiki pasportlirini özliri tewe saqchixanigha tapshurushi telep qilin'ghan.

Biz bu heqte ghulja shehiri üch derwaza saqchixanisining qahar isimlik mes'ul saqchisini ziyaret qilduq.

Muxbir: siz üch derwaza saqchixanisining saqchisi qahar bolamsiz?
Saqchi: shundaq, méning ismim qahar, men ghulja sheherlik üchderwaza saqchixanisining saqchisi bolimen.

Muxbir: yéqinda ahalilerning pasportini yighiwélish heqqide uqturush chiqiripsiler, bu rastmu?
Saqchi: he'e, bu uqturushni yéqinda chiqarghan iduq, xewer tépishimizche, bu uqturush tor we ijtima'iy uchur wasitilirighimu chaplinip téz tarqiliptu. Eslide bu uqturushni bizning saqchixana yuqirining buyruqi bilen öz aldigha chiqarghan idi, uningda “Alaqileshküchi” dep méning ismim yézilghan.

Muxbir: néme sewebtin bu uqturushni chiqardinglar?
Saqchi: bu muqimliq xizmiti bilen munasiwetlik. Uqturush tarqitilghandin kéyin, nurghun kishilerdin manga téléfon keldi, bezi künliri din artuq téléfon qobul qildim. Hetta ichki ölkilerdiki bezi xenzularmu téléfon qilip, “Hemme kishi birdek pasport tapshuramdu, néme üchün?” dep sorashti. Buningda bir az xata chüshinishmu bolghan oxshaydu. Bizning asasliq meqsitimiz ahalilerning pasportlirini yighiwélish emes, belki saqchixana wakaliten saqlap bérishtur. Yeni ahaliler pasportlirini saqchixanimizgha tapshurup bergendin kéyin, eger ular chet'elge chiqmaqchi bolsa, ularning arqa körünüshini bir qur tekshürüp mesile bolmisa pasportni bérimiz. Qaytip kelgende yene bizge tapshurup bérishini telep qilimiz.

Muxbir: sizche pasport yighiwalsanglar muqimliq kapaletke ige bolidu dep oylamsiz?
Saqchi: ahalilerning pasportlirini yighiwélishimizdiki asasliq seweb muqimliq xizmitining éhtiyajidin bolghan. Yeni hazir shinjangda muqimliq eng muhim xizmet, tinchsiz ehwallar hemme yerde körülüwatidu. Shundaq bolghachqa, ahalilerning pasportlirini saqchixana yighiwélip saqlisaq, ulargha wakaliten saqlap bersek, jem'iyettiki muqimsizliq amillirining aldini alghili bolidu.

Muxbir: bu qarar yuqiridin chüshtimu yaki silerning öz aldinglargha chiqarghan belgilimenglarmu?
Saqchi: bu qarar ili oblastliq siyasiy-qanun ishxanisi bilen ghulja sheherlik siyasiy-qanun ishxanisining ortaq kéngishishidin kéyin chiqirilghan. Bizning üchderwaza saqchixanimiz ghulja sheherlik jama'et xewpsizlik idarisining buyruqi boyiche bu uqturushni chiqarduq. Meqset teweyimizdiki ahalilerning chet'elge qanun-tüzüm yol qoyghan da'iride tertiplik chiqishini we waqtida qaytip kirishini kapaletke ige qilish, muqimliq xizmitige maslishish üchündur.

Muxbir: buningda kishilerning chet'ellerge chiqish qizghinliqini kontrol qilish meqsiti barmu-yoq?
Saqchi: yéqinqi yillardin buyan meyli ghuljida bolsun yaki aptonom rayonimizning bashqa jaylirida bolsun, kishilerning chet'elge chiqip kétish xahishi bekmu küchiyip ketti. Beziler chet'elge chiqip kétipla iz-déreksiz ghayib bolup ketti. Buning netijiside meyli chégra ichide bolsun yaki sirtida bolsun muqimsizliq amilliri peyda bolmaqta. Shunglashqa yüz bergüsi muqimsizliq amillirining aldini élish, ahalilerning ichidiki gheyri-normal ehwallarni tizginlesh üchün saqchixanimiz yuqirining telipi boyiche bu uqturushni chiqardi.

Muxbir: silerge tewe ahaliler rayonida qanchilik ahale bar, qanchilik ahalining qolida pasporti bar?
Saqchi: üchderwaza saqchixanisining teweside jem'iy 16 ahaliler rayoni bar. Men shexsen özüm uning ichidiki 2 ahaliler rayonigha mes'ul saqchimen. Bizde özimizge tewe ahaliler rayonidiki olturaq kishilerning jan sani, kespi, ijtima'iy munasiwiti, arqa körünüshi qatarliq uchurlarning hemmisi bolidu. Ghulja shehiri teweside 16 saqchixana bar, bizning üch derwaza rayonigha qarashliq ahalilerdin 4 mingdin artuq kishining pasporti bar. Uni öymu-öy bérip yighiwélish intayin tes, shunga biz uqturush chiqarduq, bu bizning xizmet usulimiz.

Muxbir: siyasiy jehettin mesilisi bar dep qaralghan kishilerning pasportini qandaq qilisiler?
Saqchi: siyasiy jinayetchilerge adette pasport béjirip bérilmeydu. Ularning jaza mudditi axirliship, a'ilisige qaytqandin kéyinmu xéli bir mezgil bizning kontrolluqimizda bolidu. Ular üstidiki nazaret waqti axirliship, héchqandaq mesile bayqalmisa munasiwetlik orunlarning testiqi bilen andin ular pasport béjireleydu.

(Dawami bar)

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.