"Edebiy terjimiler" zhurnilining bash muherrir qeyser qéyumning özini öltürüwalghanliqi delillendi

Muxbirimiz shöhret hoshur
2018-09-20
Élxet
Pikir
Share
Print
Xitay saqchilirining héytgah meschitining etrapidiki kéchilik bazarni charlap yürgen körünüshi. 2017-Yili 25-iyun, qeshqer.
Xitay saqchilirining héytgah meschitining etrapidiki kéchilik bazarni charlap yürgen körünüshi. 2017-Yili 25-iyun, qeshqer.
AFP

Yéqindin buyan ijtima'iy taratqularda tarqalghan bir uchur we radiyomizgha kelgen bir inkasta Uyghur rayonidiki ataqliq ziyaliylargha qarita dawam qiliwatqan atalmish "Ikki yüzlimichi" lerge qarshi küresh dawamida Uyghur aptonom rayonluq edebiyat sen'etchiler birleshmisi teripidin chiqirilidighan "Edebiy terjimiler" zhurnilining bash muherriri qeyser qéyumning özi duch kelgen éghir rohiy bésim sewebidin binadin özini tashlap ölüwalghanliqi ilgiri sürülgen idi. Muxbirimizning bu heqte ehwal éniqlishi dawamida qeyser qéyumning özini öltürüwalghanliqi delillendi.

Aldinqi hepte ijtima'iy taratqularda tarqalghan amérikidiki pa'aliyetchi qutluq almasning guwahliq bayanatida "Edebiy terjimiler" zhurnilining bash muherriri qeyser qéyumning özini öltürüwalghanliqi bayan qilin'ghan idi. Aridin bir nechche kün ötkende "Shinjang géziti" ning sabiq muxbiri qeyser qéyumning ilgiriki qoshnisi jür'et nizamidinmu radiyomizgha uchur yollap, qeyser qéyumning binadin özini tashlap ölüwalghanliqini melum qildi.

Biz bu heqte yenimu ilgirilep uchur élish üchün deslepte Uyghur aptonom rayonluq edebiyat-sen'etchiler birleshmisige téléfon qilghinimizda alaqidar xadim bu birleshmide bundaq bir xadimning bolghanliqini inkar qildi.

Pa'aliyetchi qutluq almasning bayanatida qeyser qéyumning lagérgha ekétilip bir mezgil tutup turulghandin kéyin qoyuwétilgenliki, yeni lagérdin chiqqandin kéyin ölgenliki tilgha élin'ghan. Emma radiyomizgha kelgen bir inkasta qeyser qéyumning téxi lagérgha apirilmighanliqi, peqet ölümidin bir hepte awwal intizam tekshürüsh tarmaqliri teripidin chaqirtilip söhbet ötküzülgenliki, özini binadin tashlap ölüwalghan küni bolsa saqchilar teripidin chaqirtilghanliqi, yeni lagérgha apirilishtin qorqup özini öltürüwalghanliqi tilgha élin'ghan.

Biz edebiyat-sen'etchiler birleshmisige qayta téléfon qilghinimizda birleshmining siyasiy bölüm bashliqi qeyser qéyumning özini öltürüwalghanliq uchurining toghriliqini delillidi.

Pa'aliyetchi qutluq almas qeyser qéyumning Uyghur edebiyatidiki "Küreshchan yillar", "Qizil tagh baturliri" qatarliq romanlarning yazghuchisi qéyum turdining oghli ikenlikini, siyasiy ang-sezgürlüki yuqiri bolsimu, emma özining siyasiy meydanini aldirap ipadiliwetmeydighan biri ikenlikini, mijez-xaraktérining bir'az éhtiyatchan ikenlikini tilgha aldi. U qeyser qéyumning xaraktér alahidilikige qarap turup, uning lagérgha apirilishtin qorqup özini öltürüwalghanliq éhtimalliqinimu chetke qaqmidi.

Qutluq almas yene eng yéqinda érishken uchurigha asasen qeyser qéyumning özi ishlewatqan xizmet binasining 8‏-qewettiki ishxanisidin özini tashliwalghanliqini ilgiri sürdi.

Jem'iyet xewerliridin we radiyomiz igiligen uchurlardin hazirgha qeder lagérgha ekétilgenlerdin asasen dégüdek qoyup bérilgenlerning bolmighanliqi melum. Bu nuqtidin qeyser qéyumning lagérdin qoyuwétilgendin kéyin emes, belki lagérgha apirilish xewpige duch kelgende özini öltürüwalghanliq éhtimalliqi melum bolmaqta.

Toluq bet