Pamir égizlikidiki qirghiz malchilar chégra boylirida “Paylaqchiliq” qilishqa zorlan'ghan

Igilinishiche, nöwette qizilsu qirghiz aptonom oblasti tewesidiki qirghiz awulliri, bolupmu chégra boyliridiki qirghiz malchiliri chégradiki “Gumanliq kishiler” yaki “Gumanliq hadisiler” heqqide hökümetke uchur yetküzüshke seperwer qilinmaqtiken.

3-Ayning 31-küni qizilsu oblastining partkom sékrétari lyu xuyjün bilen oblast bashliqi dilshat qidirxan birlikte “Qirghiz malchilirigha yézilghan bir parche xet” namliq siyasiy chaqiriq élan qilghan.

Mezkur “Ochuq xet” te pamir égizlikidiki qirghiz malchilirining chégra qoghdashtin ibaret “Siyasiy wezipe” ni üstige élip, “Bölgünchi, diniy esebiy we qanunsiz unsurlarning birinimu chégradin kirgüzmeslik hem birinimu chégradin chiqarmasliqi” telep qilin'ghan.

“Ochuq xet” te yene, qizilsu oblastining chégra boyliridiki “Her bir kigiz öyni birdin qarawulxanigha, her bir qirghiz malchini birdin chégra qarawuligha aylandurush” chaqiriqi chiqirilghan.

Biz mezkur “Siyasiy wezipe” ning qizilsu oblasti tewesidiki qirghiz awullirida zadi qandaq yolgha qoyuluwatqanliqi heqqide melumat élish üchün teweliktiki saqchixanilargha téléfon qilduq.

Qizilsu oblasti aqtu nahiyesining oytagh yéziliq saqchixanisi bu heqte melumat bérip, ötken düshenbidin bashlap teweliktiki barliq ahalilerning bolupmu qirghiz ahalilirining bu “Chaqiriq” ni jiddiy öginiwatqanliqini bildürdi.

Oytagh saqchixanisining saqchi bashliqi ziyaritimiz jeryanida “Chégra boyliridiki qirghiz malchilirining kündilik mal-charwa béqish we tirikchilik qilishtin bashqa yene, chégradiki gumanliq kishiler yaki hadisiler heqqide ting-tingchiliq qilish wezipisiningmu barliqi” ni ashkarilidi. Halbuki, u qirghiz malchilirining paylaqchiliq qilishtiki konkrét wezipiliri heqqide yenimu ichkirilep melumat bérishtin özini qachurdi.

Qizilsu oblasti aqtu nahiyesining barin yéziliq saqchixanisimu bu heqte bezi melumatlarni ashkarilidi. Saqchixanidiki kéchilik nöwetchi xadimning bildürüshiche, nöwette barin yézisidiki Uyghur ahaliler “Muqimliq” heqqide, qirghiz ahaliler “Chégra boyliridiki gumanliq unsurlar yaki gumanliq hadisiler toghriliq hökümetke melumat yetküzüsh” heqqide öginish qilmaqtiken.

Barin saqchixanisining mezkur nöwetchi xadimi yene, saqchixanilarning qirghiz yardemchi saqchilarni teshkillep, qirghiz awullirigha teshwiqat üchün ewetilgenliki, egerde bu heqte yenimu tepsiliy melumat élishqa toghra kelse, aqtu nahiyesining muji, bulungköl qatarliq chégra bilen tutushidighan qirghiz yézilirigha téléfon qilishimizni tewsiye qildi.

Uning bildürüshiche, nöwette aqtu nahiyelik saqchi idarisi zor sanda yardemchi saqchi qobul qilghan bolup, ular hazir jiddiy türde siyasiy nezeriye we emeliy meshiq meshghulati bilen shoghullanmaqtiken. U, chégragha munasiwetlik ishlar mexpiyetlik bolghachqa bu heqte özining yenimu chongqurlap melumat bérelmeydighanliqini éytti.

Yuqirida qizilsu oblastining ikki neper birinchi qol emeldarining pamir égizlikidiki qirghiz malchilirigha “Chaqiriq” élan qilip, ularni chégra boyida paylaqchiliq qilishqa ündigenliki we qizilsudiki ikki saqchixanining buni delilligenliki heqqidiki melumatni diqqitinglargha sunduq.