Xoten yézilirida ewj éliwatqan yéngi tedbir: "Qizil xor" arqiliq "Muqimliq" ornitish

Muxbirimiz eziz
2017-04-03
Élxet
Pikir
Share
Print
Qizil teshwiqat xizmiti munasiwiti bilen uyushturulghan zor kölemlik musabiqe pa'aliyitidin körünüsh. 2015-Yili 20-öktebir, peyziwat.
Qizil teshwiqat xizmiti munasiwiti bilen uyushturulghan zor kölemlik musabiqe pa'aliyitidin körünüsh. 2015-Yili 20-öktebir, peyziwat.
Xinhua

Yéqinda gumida yüz bergen zorluq küchi arqiliq qarshiliq körsitish heriketliridin kéyin, hökümet da'irilirining "Muqimliq" namidiki siyasiy xizmetlerni yenimu bir baldaq yuqiri pellige kötürüshke urunuwatqanliqi diqqet qozghashqa bashlidi. Yerlik xelqtin ehwal igilesh jeryanida, Uyghurlar diyaridiki herqaysi yéza-qishlaqlarda bu xildiki teshwiqat xizmetlirining jiddiy boluwatqanliqi, bolupmu herqaysi kentlerdiki déhqanlarni mejburiy yosunda "Qizil naxsha" éytishqa teshkilleshning burunqidinmu ching tutuluwatqanliqi melum boldi. Uyghur siyasiy analizchilar bolsa, bu heqte öz qarashlirini otturigha qoydi.

Uyghurlarning sen'etni söyüshtek milliy en'enisi hemde bu en'enige baghlan'ghan amillarning Uyghur medeniyet tarixida "12 Muqam" gha oxshash alemshumul miraslarni wujudqa keltürgenliki Uyghurlarni iptixarlandurup kéliwatqan pakitlarning biridur. Emma yéqinqi türlük uchur menbeliri Uyghurlar diyaridiki herqaysi yéza-qishlaqlarda hazir muqam éytishning emes, belki "Qizil naxsha" éytish pa'aliyetlirining jiddiy omumlishiwatqanliqini körsetmekte.

Ijtima'iy taratqularda Ötken heptidin buyan tarqilip yürgen sin körünüshlirining biride, Uyghurlar diyaridiki melum bir yézida Uyghur déhqanlarning "Xitay dölet shé'iri" oquwatqanliqi közge chéliqidu.

Mezkur sin matériyalidiki körünüshlerde eks etkini, maddiy jehettiki namratliq hemde rohi jehettiki ghéribliq bolup, biz bu ehwallarning tepsilatini éniqlap béqish meqsitide xotendiki birnechche yézigha téléfon qilduq. Guma nahiyisining sanju yézisida olturushluq bir déhqan momay bu heqtiki ehwallar heqqide söz qilip, bizni bu heqtiki bezi ehwallardin xewerdar qildi.

Söhbet jeryanida bu momay, özlirining da'iriler teshkilligen mushu xildiki siyasiy pa'aliyetlerge qatnishish arqiliq kompartiyege hemde xitay hökümitige bolghan minnetdarliqini bildüridighanliqini tilgha aldi. Emma uning shexsiy hayati heqqidiki söhbet jeryanida özige oxshash minglighan Uyghurlarning hökümet bergen "Töwen turmush kapaliti" gila qarashliq ikenlikini bayan qildi.

Uyghurlar diyaridiki weziyet bilen birqeder yaxshi tonushluqi bolghan tarixshunas qahar barat bu heqte pikir qilip, bu xildiki sho'arwazliq hemde "Inqilabiy naxsha éytish" hadisilirining kompartiye da'im qollinidighan ussullarning biri ikenlikini tilgha aldi. Uning qarishiche, bu xildiki addiy usul ötken zamanlarda Uyghurlarni qaymuqturush rolini oyniyalighan bolsimu, uning hazirqidek ré'alliqta qanchilik rol oynishigha birnerse démek qiyin iken.

Melum bolushiche, bu xildiki "Inqilabi naxsha éytish" pa'aliyetliri xitayning chungching shehiride sabiq sheher bashliqi bo shileyning rehberlikide bir mehel ewj alghan bolup, 2012-yili u muddetsiz qamaqqa höküm qilin'ghandin kéyin, bu xildiki sho'arwazliq toxtighan. Emma Uyghurlar diyarida bolsa, bu xildiki siyasiy pa'aliyetlerning barghanséri yuqiri pellige chiqiwatqanliqi melum bolmaqta.

Toluq bet