“Qizil teshwiqat cholpini” qurban ömer özining tashliwétilgenlikidin shikayet qildi

Muxbirimiz qutlan
2015.11.05
teshwiqatchi-qurban-omer.png Qizil teshwiqatchi qurban ömer mototséklitqa minip xitay kompartiyesining teshwiqatini qilmaqta
Ijtima'iy taratqulardin

Xitay hökümet taratqulirida “Qizil teshwiqat cholpini” dep teriplen'gen qurban ömer bügün üstün atushning qayraq kentidiki öyide turup radi'omiz ziyaritini qobul qildi.

Muxbir: téchliqmu? yéqindin buyan néme ishlar bilen aldirash boluwatisiz?

Qurban ömer: tünügün atush shehirige kirip chiqtim. Sheherning 6-nöwetlik ishchilar qurultiyi ötküzülmekchiken. Méni üstün atush yézisining wekili qilip saylaptiken, shu qurultaygha qatnashmaqchimen.

Muxbir: yéqinda memliketlik siyasiy kéngeshning re'isi yü jéngshing atushni ziyaret qilghanda siz bilen körüshtimu?

Qurban ömer: yaq, u bashliq kelgende méni chaqirishmidi, menmu bir xilla bolup qaldim, néme üchün chaqirmighanliqinimu bilmidim.

Muxbir: siz teshwiqat saheside tonulghan bir shexs tursingiz, némishqa sizni chaqirmaydu?

Qurban ömer: buni bilmidim, men özümmu bir qisma bolup qaldim. Emma aptonom rayondin kelgen xizmet guruppisi méni mexsus yoqlap öyümge keldi. Ular méning teshwiqat saheside “Zorawan térrorchilar” we “Diniy esebiy küchler” ge qarshi élip barghan teshwiqatlirimni maxtidi. Manga üch chaqliq motsiklittin birni hediye qildi.

Muxbir: bu yil 1-öktebirde ürümchide ötküzülgen Uyghur aptonom rayoni qurulghanliqining 60 yilliqini tebriklesh pa'aliyitige sizni teklip qildimu?

Qurban ömer: yaq, teklip qilmidi, emma bu yil 5-ayda teyyarliq pa'aliyitige bérip qatniship keldim. Eslide 10-ayning 1-künidiki chong pa'aliyetke teklip qilidu, dep oylighan idim, emma teklip qilmidi. Néme üchünlükini bilmidim. Qarighanda, buningghimu “Arqa ishik” kétidighan oxshaydu dep oylap qaldim. Men onnechche yildin buyan partiyening teshwiqatini qilip kétiwatimen, buni bu yerdiki hemmisi, bolupmu bashliqlar bilidu. Shundaq turup yéqindin buyan méni bundaq pa'aliyetlerge chaqirmas boldi. Méning pulum yoq, eger pulum bolsa ulargha “Arqa ishik” qilsam, andin méni chaqiramdikin-tang!...

Muxbir: yü jéngshigdek memliketlik siyasiy kéngeshning re'isi bolghan chong emeldarning atushqa kélishi asan emes. Siz shunche yillardin buyan kompartiyening teshwiqatini qilip kepsiz. Shundaq turuqluq mushundaq sorunlargha sizni chaqirmasliqi ejeblinerlik boptu!?

Qurban ömer: shundaq, hemmisi shundaq dewatidu. Köpchilik ammimu “Sen shunche yillar mabeynide hoylangda qizil bayraq chiqirip, shehermu-sheher yürüp partiyining teshwiqatini qilghan tursang, hökümet bundaq chaghlarda séni untup qalmasliqi kérek idi” déyishiwatidu” rastni désem, men özümmu renjidim. Ilgiri partiye-hökümettikiler aldirash, belkim untup qalghandu, dep öz-özümge teselli bergen idim. Bu qétim rastinla renjidim!...

Muxbir: hoylingizda yene bayraq chiqiriwatamsiz?
Qurban ömer: shundaq, qizil bayraqni ehmiyetlik künlerde chiqirip kéliwatimen. Bu yil öktebir bayrimidimu bala-chaqilirim bilen birlikte chiqardim, kenttin birqanche kishi öyümge kélip birlikte bayraq chiqarduq.

Tepsilatini awaz ulinishtin anglighaysiz.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.