Rabiye qadir xanim islam elliri hemkarliq teshkilatining bash sékrétari bilen körüshti

Muxbirimiz irade
2013.10.15
islam-elliri-hemkarliq-teshkilati-ekmelidin-ehsanoghli-rabiye.jpg D u q re'isi rabiye qadir bashchiliqidiki hey'et yéqinda mezkur teshkilatning bashliqi ekmelidin éhsan'oghli ependi bilen uchrashti. 2013-Yili öktebir, washin'gton.
RFA

Dunya islam döletliri hemkarliq teshkilati dunyadiki eng chong we eng nopuzluq islami teshkilatning biri. Bu teshkilat Uyghurlar heqqidiki tunji bayanatini 5-iyul ürümchi weqesi bolghanda qilghan. Ular bayanatida xitay hökümitini Uyghur musulmanlirigha bésim ishlitish bilen eyibligen idi. Dunya Uyghur qurultiyi re'isi rabiye qadir bashchiliqidiki hey'et yéqinda mezkur teshkilatning bashliqi ekmelidin éhsan'oghli bilen washin'gtonda uchriship, uninggha Uyghur élide yéqinda yüz bergen weqeler heqqide melumat bergen we islam ellirini Uyghurlarning weziyitige köngül bölüp, bu jehette emeliy bésishqa chaqirghan.

Uyghur mesilisining xelq'arada keng tonulushigha egiship, Uyghurlarning kishilik hoquq dawasi xelq'aradiki kishilik hoquqni we démokratiyini yaqilaydighan herqaysi dölet we teshkilatlarning köngül bölüshige ériship kelmekte. Dunya islam döletliri hemkarliq teshkilatimu Uyghurlarning weziyitige köngül bölüp, uni yéqindin közitip kéliwatqan teshkilatlarning biri. Islam döletliri hemkarliq teshkilati 5-iyul ürümchi weqesi bolghanda xitay hökümitini heddidin ziyade küch qollinish bilen eyiblep, weqening tepsilatini ashkarilashqa chaqirghan. Hetta mezkur teshkilatning bash sékrétari ekmelidin éhsan'oghli özi biwasite halda muxbirlargha bayanat bérip, Uyghurlarning weziyitidin endishe qiliwatqanliqini bildürgen. Shundaqla u bayanatida, Uyghur xelqining bu tupraqlarning esli igisi bolush süpiti bilen milliy we diniy kimliklirini qoghdash yolida, siyasiy we ijtima'iy hoquqlirigha érishish üchün tirishiwatqanliqini, bu mesililerning söhbet yoli arqiliq hel bolidighanliqini eskertken idi. Ene shundin buyan islam hemkarliq teshkilati Uyghurlarning weziyitini yéqindin közitip kelmekte. 11-Öktebir küni dunya Uyghur qurultiyining re'isi rabiye qadir xanim we d u q mu'awin re'isi ömer qanat ependiler washin'gton'gha ziyaretke kelgen islam döletliri hemkarliq teshkilatining bash sékrétari ekmelidin éhsan'oghli qatarliqlar bilen körüshüp, söhbet ötküzüp, ulargha Uyghur élide yéqinda meydan'gha kelgen bir qatar weqeler üstide melumat bergen. Rabiye qadir xanim bügün bizning ziyaritimizni qobul qilip, bu uchrishish heqqide tepsiliy melumat berdi.

Mezkur teshkilat ürümchi weqesi yüz bérip uzun ötmeyla ürümchige mexsus tekshürüsh ömiki ewetken. Kéyin, 2010-yili ekmelidin éhsan'oghli özi biwasite ürümchi we qeshqerde ziyaret qilghan idi. U, qeshqerni ziyaret qilghanda sheher bashliqi ekber ghopur bilen körüshüp, qeshqer shehirining kona halitini saqlap qélishni, her qandaq iqtisadiy tereqqiyat sheherning medeniy miraslirini weyran qilish bedilige qurulmasliqini tekitligen idi.

Dunya Uyghur qurultiyi re'isi rabiye qadir xanim bundin ilgirimu ekmelidin éhsan'oghli bilen biwasite uchrashqan we bu teshkilatqa herqaysi kishilik hoquq organlirining doklatliri we Uyghur kishilik hoquq programmisi tüzüp chiqqan doklatlarni sunup kelgen. Rabiye qadir xanimning bildürüshiche, ekmelidin éhsan'oghli özining Uyghurlar mesilisini xitay bilen bolghan uchrishishlarda jiddiy yosunda otturigha qoyghanliqini, bundin kéyin teshkilatning Uyghurlarning weziyitige téximu köp ehmiyet béridighanliqini bildürgen.

Rabiye qadir xanim sözi dawamida yene, xitay hökümitining islam elliri bilen néfit, tebi'iy gaz we shuninggha oxshash bashqa soda alaqiliri we siyasiy alaqiliri küchiyiwatqan bir peytte islam elliri we ularning teshkilatliri bilen qoyuq alaqe ornitip, ularni xitay hökümitining Uyghur musulmanlirigha qiliwatqan mu'amilisidin xewerdar qilishning intayin muhimliqini tekitlidi.

U, dunya Uyghur qurultiyining bundin kéyin islam elliri bilen bolghan bilen alaqini kücheytidighanliqini bildürdi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.