Dunya Uyghur qurultiyi: “Biz xitayni qanunsiz adem öltürüsh bilen eyibleymiz”

Dunya Uyghur qurultiyi bayanatchisi, Uyghur amérika birleshmisi re'isi alim séyitof ependi 20-noyabir, dunya Uyghur qurultiyi we Uyghur amérika birleshmisi namidin radi'omizgha resmiy bayanat bérip, dunya jama'etchilikini 16-noyabir yüz bergen sériqbuya weqesi heqqide tekshürüsh élip bérishqa chaqirdi we xitay hökümitini “Qanunsiz adem öltürüsh bilen eyibleymiz” dep jakarlidi.

U, naraziliqlarni qanliq basturush yoli bilen hel qilghili bolmaydighanliqi, buning téximu köp qan éqishqa seweb bolidighanliqi heqqide xitayni agahlandurup “Héchkim qan éqitishni xalimaydu, qan aqquzmaymu mesililerni hel qilghili bolidu, emma xitay buni xalimay, Uyghurlarni bashqa yollar arqiliq qarshiliq bildürüshke mejbur qilmaqta,xitay hökümitining sherqiy türkistandiki her qandaq naraziliqni, sériqbuyidiki weqedek qanliq basturup kéliwatqanliqi üchün téximu küp qan tökülüshler kélip chiqmaqta, xitay sherqiy türkistan mesilisini tinch usul bilen hel qilmighuche Uyghurlarning bu xil naraziliqi toxtap qalmaydu, eksiche téximu küchiyishi mumkin, chünki hazirghiche yüz bergen weqelerdin, Uyghurlarning erkinliki üchün eng axirqi bedelni töleshke razi ikenlikini körüwalalaymiz” dep bildürdi.

Alim séyitofning bayanatining toluq mezmunini yuqiridiki awaz ulinishidin anglighaysiz.