“1-нөвәтлик шәрқий түркистанлиқлар истратегийилик муһакимә йиғини” сипруста өткүзүлди

Ихтиярий мухбиримиз әркин тарим
2017-03-01
Share
sherqiy-turkistanliqlar-2017-uchrishish.jpg Сипруста “шәрқий түркистанлиқлар учришиши” намида өткүзүлгән паалийәткә қатнашқучилар. 2017-Йили 27-феврал, шималий сипрус.
RFA/Erkin Tarim

“1-нөвәтлик шәрқий түркистанлиқлар истратегийилик муһакимә йиғини” чәтәлләрдики бир қисим уйғур тәтқиқатчилар, җамаәт әрбаблири, сиясәтчиләр вә паалийәтчиләрниң иштирак қилиши билән 25-февралдин 27-февралғичә шималий сипрус түрк җумһурийитиниң гирнә шәһиридики лордс палас меһманханисида өткүзүлди.

Түркийә истратегийилик чүшәнчиләр институти мутәхәссиси, доктор әркин әкрәмниң тәшәббуси билән чақирилған бу учришишқа америка қошма штатлири, германийә, японийә, австралийә, канада, норвегийә, шиветсийә, шветсарийә вә түркийә қатарлиқ 12 дөләттин 19 киши иштирак қилди.

Йиғинниң ахирида елан қилинған мәтбуат баянатиға асасланғанда, йиғинда хәлқара вәзийәтниң нөвәттики йөнилиши вә у пәйда қилидиған иҗабий-сәлбий тәсирләрниң уйғурлар мәсилисигә елип келидиған ақивәтлири оттуриға қоюлған һәм буниңға мунасивәтлик чарә-тәдбирләр муһакимә қилинған. Бу йиғинниң буниңдин кейин, техиму кеңәйтилгән һалда давамлаштурулуши тоғрисида бирдәклик һасил қилинған.

Йиғинниң биринчи күни алди билән доктор әркин әкрәм өзиниң уйғурларниң ғайиси вә әң ахирқи мәқсити һәм буниңға йетишниң йоллири тоғрисида тәйярлиған үч қәдәмлик истратегийилик пиланлири тоғрисида мәлумат бәрди. Арқидин, учришиш әһли өзгириватқан хәлқара вәзийәт вә уйғурлар һәм уйғурларниң чиқиш йоли тоғрисида өз пикирлирини оттуриға қоюшти. Әтисидики, йәни 26-феврал күнидики учришишта хитайниң вә уйғур дияриниң вәзийити тоғрисида музакириләр елип берилди.

Доктор әркин әкрәм әпәнди ечилиш нутқида бу учришишни уюштуруштики мәқсити һәққидә тохталди.

Йепиқ һалда өткүзүлгән мәзкур үч күнлүк учришиш ахирлашқандин кейин, биз бир қисим учришиш әһлиниң көз қарашлирини игилидуқ.

Германийәдин келип бу учришишқа иштирак қилған дуня уйғур қурултийи баш катипи долқун әйса әпәнди йиғинниң наһайити яхши өткәнлики, буниң уйғурларниң сиясий дәва паалийәтлиригә пайдилиқ болидиғанлиқиға ишинидиғанлиқини баян қилди.

Шиветсийәдин келип бу учришишқа иштирак қилған дуня уйғур қурултийи баянатчиси дилшат решит әпәндиму мәзкур паалийәтниң уйғурларниң дава ишлирини түрлүк пикирләр вә илмий учурлар билән тәминләш һәм өзара пикир алмаштуруш әһмийитигә игә икәнлики, қатнашқучиларниң һәммисиниң қабилийәтлик кишиләр икәнликини билдүрди.

Истанбулда паалийәт елип бериватқан шәрқий түркистан маарип вә һәмкарлиқ җәмийити рәиси һидайәтулла оғузхан әпәнди учришишниң наһайити яхши өткәнликидин рази икәнликини тәкитлиди.

Канададин келип, учришишқа иштирак қилип, өз көз қарашлирини оттуриға қойған паалийәтчи руқийә турдуш ханим мәзкур учришишта һәр хил көз қараштики уйғурларниң бир йәргә җәм болуп, өзара көз қараш вә учур алмаштурушиниң муһим әһмийәтлик вә наһайити пайдилиқ икәнликини тәкитлиди.

Германийәдин кәлгән сиясий паалийәтчи әсқәрҗан әпәнди йиғинниң наһайити яхши өткәнликини, музакирә нәтиҗисидә оттуриға қоюлған көз қарашларниң уйғурларниң дәва паалийәтлири үчүн йол көрситиш әһмийитигә игә икәнликини билдүрди.

Шималий сипрус түрк җумһурийитиниң оттура деңиз бойидики саяһәт шәһәрлиридин бири болған гирнә шәһиридә 3 күн давамлашқан “1-нөвәтлик шәрқий түркистанлиқлар истратегийилик муһакимә йиғини” ға қатнашқанла һеч қандақ сиясий тәшкилатқа вәкиллик қилмайдиған болуп, мәзкур учришишниң ахирқи күни нөвәттики өзгириватқан дуня вәзийитидә уйғурларниң немә қилиши тоғрисида музакирә елип берилип, хуласә чиқирилди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт