Bash wezir abéning iptar ziyapiti yaponiyediki musulmanlarni hayajan'gha saldi

Ixtiyariy muxbirimiz haji qutluq qadiri
2013.08.02
abe-and-aduraxman-ramazan-yaponiye-yaponiye-ramazan.JPG Sumo chélishish mahiri misirliq abduraxman éhmed sha'alan we yaponiye bash weziri shinzo abé qol éliship turghan körünüshi (“Japan Times” gézitidin). 2013-Yili 31-iyul, yaponiye.
RFA/Qutluq

Yaponiyede musulmanlarning sanining köpiyishi we yaponiye hökümitining islam elliri bilen bolghan diplomatiye alaqisining künidin-kün'ge éshishigha egiship, yaponiye hökümiti islam dinigha we musulman ellirige bolghan diplomatiye siyasitide köpligen özgirishlerni hasil qilmaqta.

Yaponiye hökümitining pelestin'ge yardem bérish xelq'ara yighini échishi, Uyghur milliy herikitining rehbiri rabiye qadir xanimgha Uyghur mesilisini anglitish üchün sehne hazirlap bérishidin ibaret musulmanlar üchün élip bérilghan bir qatar pa'aliyetler yaponiyede yashawatqan musulmanlarni shadlandurghan bolsa, bu yil musulmanlarning ulugh ramizan éyida yaponiye bash weziri shizo abéning iptar ziyapiti ötküzüshi yaponiyediki musulmanlarni hayajan'gha saldi.

Yaponiyediki nopuzluq metbu'atlarning ashkarilishiche, 7-ayning 31-küni yaponiye bash weziri shizo abé janabliri tokyodiki bash wezir sariyida 44 musulman dölitining diplomatlirigha we undin bashqa yaponiyede xizmet qiliwatqan hersahediki musulmanlargha ramizanliq iptar ziyapiti bergen.

Bash wezir abéning bu qétimqi iptar ziyapitidin hayajanlan'ghan chet'ellik oqughuchilarni ishqa tonushturush shirkitining diréktori türkiyelik bora bin'göl ependi ziyaritimizni qobul qilip mundaq dédi:
-Yaponiye islam döliti emes, bu bir buddizm döliti. Emma ular bizni untumidi. Ramizan éyini xatirilidi. Bu nahayiti bir yaxshi özgirish.

Bash wezir abé iptar ziyapitige musulmanlarning diniy örp-adetliri asas qilin'ghan yaponche yémekliklerdin sushi, toxu göshi qatarliq ta'amlarni hazirlighan. Mezkur iptar ziyapitige ishtirak qilghan musulmanlarmu özliri yaxshi köridighan yémeklik we ichimliklerni birge élip kelgen.

Mezkur iptar ziyapitidin memnunluqini bildürgen yaponiyelik tetqiqatchi yamaguchi bu heqte toxtilip mundaq dédi:
-Shinzo abéning iptar ziyapiti bérishi bu nahayiti ehmiyetlik bir ish. Biz musulman dunyasi bilen köprek pikirleshkende, söhbetleshkende andin öz-ara chüshinish hasil qilalaymiz. Musulmanlar uzaq tarix, büyük medeniyetke ige, shunga yaponlarning islam dinini we musulmanlarni chüshinishi üchün bundaq pa'aliyetler köprek ötküzülüshi kérek dep oylaymen.

Bash wezir abé iptar ziyapitide özining yéqindin buyan ottura sherq we jenubiy asiyadiki musulman ellirige élip barghan bir qanche qétimliq ziyaritidin kéyinki tesirati heqqide qisqiche toxtalghan.

Shizo abé sözide yaponche en'eniwi chélish türliridin biri bolghan sumo chélishish mahiri misirliq abduraxman éhmed sha'alanni tonushturup, abduraxman bolsa tunji afriqiliq sumo chélishish mahiri, u shundaqla musulman dunyasi bilen yaponiye arisidiki köwrük, abduraxman ramizan éyida roza tutup turupmu nagoya shehiride ötküzülgen musabiqide yaxshi netijige érishti, dep uni maxtighan we uning bilen birlikte xatire süretke chüshken.

Bash wezir abéning iptar ziyapitide islam ellirining diplomatlirigha wakaliten söz qilghan aljiriye elchixanisining bash elchisi se'id éli sözide islam dunyasi bilen yaponiyening oxshashliq tereplirining köplükini,shunga musulman döletliri bilen yaponiyening ilim-pen,ma'arip,iqtisad we bashqa jehetlerde öz-ara hemkarliqini kücheytish kéreklikini tekitligen.

Ziyaritimizni qobul qilghan tébbiy penler doktori pakistanliq doktor awzal ependi bu qétimqi iftar ziyapiti heqqide toxtilip mundaq dédi:
-Bu nahayiti yaxshi ish.Mundaqche éytqanda medeniyet almashturush pa'aliyiti dep éytishqa bolidu.Bu ikkila terepning bir-birini öz-ara chüshinishige paydiliq.Hazirghiche yaponiyede bundaq pa'aliyetler körülmigen.

Axirda ziyaritimizni qobul qilghan dunya Uyghur qurultiyining mu'awin re'isi ilham mexmut bu qétimqi shizo abéning iftar ziyapiti toghrisida toxtilip ötti.

Awaz ulinishidin tepsilatini anglang.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.