Хадимлар ш у а р сиясий-қанун комитетиниң секретари ширзат бавудунниң тутулғанлиқ учурини зиддийәтлик җаваблар билән инкар қилди

Мухбиримиз шөһрәт һошур
2018-12-21
Елхәт
Пикир
Share
Принт
Ш у а р сиясий-қанун комитетиниң тутқун қилинған секретари ширзат бавудун.
Ш у а р сиясий-қанун комитетиниң тутқун қилинған секретари ширзат бавудун.
Social Media

Америка уйғур бирләшмисиниң рәиси илшат һәсән бүгүн өзлириниң алақидар қаналлири арқилиқ игилигән учурлириға асасән уйғур аптоном районлуқ партком сиясий-қанун комитетиниң сабиқ муавин секретари ширзат бавудунниң 17‏-декабир күни тутулғанлиқини радийомизға мәлум қилди. Мухбиримизниң аптоном районлуқ партком сиясий-қанун комитети, интизам тәкшүрүш ишханиси вә тәшкилат бөлүмлиригә қарита елип барған телефон зиярәтлири давамида алақидар хадимлар ширзат бавудунниң тутқун қилинғанлиқ учурини зиддийәтлик җаваблар билән инкар қилишқа урунди.

Америка уйғур бирләшмисиниң рәиси илшат һәсән әпәнди буниңдин бир ай илгири уйғур аптоном районлуқ партком сиясий-қанун комитетиниң муавин секретари ширзат бавудунниң вәзиписидин қалдурулғанлиқи вә тәкшүрүлүватқанлиқи һәққидә учур йәткүзгән иди. Әйни чағда аптоном районлуқ партком тәшкилат бөлүмидин бу һәқтә мәлумат сориғинимизда телефонимизни қобул қилған хадимлар бу темида сөз қилиштин өзлирини қачурған, әмма униң тәкшүрүлүватқанлиқини инкар қилмиған иди.

Түнүгүн илшат һәсән йәнә өзлиригә ишәнчлик мәнбәләргә асасән ширзат бавудун үстидики тәкшүрүшниң хуласиси чиққанлиқи вә тәкшүрүш нәтиҗисидә униң «икки йүзлимичилик» билән әйиблинип тутқун қилинғанлиқини мәлум қилди. Биз бу учурни алғандин кейин уйғур аптоном районлуқ парткомниң интизам тәкшүрүш қатарлиқ алақидар бөлүмлиригә қайтидин телефон қилдуқ. Көпинчә хадимлар ширзат бавудунни тонумайдиғанлиқи яки әһвалдин хәвирини йоқлуқини ейтти.

Әмәлийәттә «бәйду» учур амбирида тонуштурулушичә, ширзат бавудун 30 йилдин буян асасән сиясий-қанун саһәсидә хизмәт қилған. Бу йил 52 яшқа киргән ширзат бавудун, 1988‏-йили ғәрбий-шимал сиясий-қанун институтини пүттүрүп, уйғур аптоном районлуқ сақчи мәктипидә оқутқучилиқ билән хизмәт һаятини башлиған. У 1989‏-йилидин 2011‏-йилиға қәдәр хотән вилайәтлик җ х башқармиси сиясий бөлүм башлиқи, қарақаш наһийилик җ х идарисиниң башлиқи, хотән вилайәтлик җ х идарисиниң дөләт аманлиқ (гобав) бөлүми башлиқи, қарақаш наһийисигә һаким вә партком секретари қатарлиқ вәзипиләрни өтигән.

Вәзийәттин хәвәрдар кишиләр ширзат бавудунниң хотәндики мәзгилидә нөвәттә уйғур аптоном районида сиясий қанун-комитетиниң секретари болуп вәзипә өтәватқан, лагерларни башқурушта йетәкчи рол ойнаватқан җу хәйлун билән йеқин достлуқ мунасивити барлиқи вә 2011 ‏-йилдин буян униң һимайисидә юқири вәзипиләргә тәйинләнгәнликини илгири сүрмәктә.

«Бәйду» учур амбирида тонуштурулушичә, ширзат бавудун 2011 ‏-йилдин кейин үрүмчи шәһәрлик партком бирликсәп бөлүминиң башлиқи, аптоном районлуқ әдлийә назаритиниң назири, аптоном районлуқ сиясий кеңәшниң муавин баш катипи вә аптоном районлуқ партком сиясий-қанун комитетиниң секретари қатарлиқ вәзипиләрни өтигән.

Илшат һәсәнниң баян қилишичә, ширзат бавудун буниңдин 3 күн аввал, йәни 17‏-декабир күни тутқун қилинған. Уйғур аптоном районлуқ партком сиясий-қанун комитети интизам тәкшүрүш гурупписиниң хадими өзиниң ширзат бавудунни тонуйдиғанлиқини инкар қилмиған болсиму, әмма униң нөвәттики әһвалидин хәвәрсизликини ейтти вә бу һәқтә сиясий-қанун комитети мәмури ишханисидин мәлумат елишимизни тәвсийә қилди.

Сиясий-қанун комитетиниң ишхана хадими ширзат бавудун һәққидики соалимизға әндикиш билән җаваб қайтуруп, униң ишханида йоқлуқини ейтти. Охшаш ишханидики йәнә бир хадим дәсләптә ширзатниң түнүгүн тутулғанлиқи һәққидики соалимизға дәсләптә «һәә» дәп җаваб қайтурған болсиму, арқидин әһвалдин ениқ мәлумати йоқлуқини баян қилип, соаллиримиздин өзини қачурди. Мәзкур ишханидики йәнә бир хадим ширзат бавудунниң хели вақиттин бери ишханида йоқлуқини ейтти. Биз ениқ һалда униң қачандин бери йоқлуқини сориғинимизда, у 10 нәччә күндин бери йоқ икәнликини ейтти. Биз униңдин ширзат бавудунниң нөвәттә қәйәрдә икәнлики, тутқун қилинған яки қилинмиғанлиқини сориғинимизда, у ширзатниң башқа җайға йөткилип кәткәнликини ейтти. Биз униңдин ширзатниң қәйәргә йөткилип кәткәнликини сориғинимизда, у ширзатниң сиясий кеңәшкә йөткәлгәнликини ейтти. Әмма тор архиплирини ахтурғинимизда «тәңритағ тори» ниң бу йил 7 ‏-сентәбирдики хәвиридә ширзат бавудунниң аптоном районлуқ сиясий кеңәшниң муавин баш катиплиқ вәзиписидин қалдурулғанлиқини баян қилинған. Мана бу баян юқириқи хадимниң ширзатниң сиясий кеңәшкә йөткәлгәнлики һәққидики җаваби билән зит кәлмәктә вә шундақла илшат һәсән йәткүзгән ширзат бавудунниң тутқун қилинғанлиқи һәққидики учурниң тоғрилиқини дәлиллимәктә.

Илшат һәсән ширзат бавудунниң тутқун қилинишиниң уйғур әмәлдарлар үчүн йәнә бир чоң ибрәтлик һекайә икәнликини тәкитлиди.

Пикирләр (0)
Share
Толуқ бәт