Xadimlar sh u a r siyasiy-qanun komitétining sékrétari shirzat bawudunning tutulghanliq uchurini ziddiyetlik jawablar bilen inkar qildi

Muxbirimiz shöhret hoshur
2018-12-21
Élxet
Pikir
Share
Print
Sh u a r siyasiy-qanun komitétining tutqun qilin'ghan sékrétari shirzat bawudun.
Sh u a r siyasiy-qanun komitétining tutqun qilin'ghan sékrétari shirzat bawudun.
Social Media

Amérika Uyghur birleshmisining re'isi ilshat hesen bügün özlirining alaqidar qanalliri arqiliq igiligen uchurlirigha asasen Uyghur aptonom rayonluq partkom siyasiy-qanun komitétining sabiq mu'awin sékrétari shirzat bawudunning 17‏-dékabir küni tutulghanliqini radiyomizgha melum qildi. Muxbirimizning aptonom rayonluq partkom siyasiy-qanun komitéti, intizam tekshürüsh ishxanisi we teshkilat bölümlirige qarita élip barghan téléfon ziyaretliri dawamida alaqidar xadimlar shirzat bawudunning tutqun qilin'ghanliq uchurini ziddiyetlik jawablar bilen inkar qilishqa urundi.

Amérika Uyghur birleshmisining re'isi ilshat hesen ependi buningdin bir ay ilgiri Uyghur aptonom rayonluq partkom siyasiy-qanun komitétining mu'awin sékrétari shirzat bawudunning wezipisidin qaldurulghanliqi we tekshürülüwatqanliqi heqqide uchur yetküzgen idi. Eyni chaghda aptonom rayonluq partkom teshkilat bölümidin bu heqte melumat sorighinimizda téléfonimizni qobul qilghan xadimlar bu témida söz qilishtin özlirini qachurghan, emma uning tekshürülüwatqanliqini inkar qilmighan idi.

Tünügün ilshat hesen yene özlirige ishenchlik menbelerge asasen shirzat bawudun üstidiki tekshürüshning xulasisi chiqqanliqi we tekshürüsh netijiside uning "Ikki yüzlimichilik" bilen eyiblinip tutqun qilin'ghanliqini melum qildi. Biz bu uchurni alghandin kéyin Uyghur aptonom rayonluq partkomning intizam tekshürüsh qatarliq alaqidar bölümlirige qaytidin téléfon qilduq. Köpinche xadimlar shirzat bawudunni tonumaydighanliqi yaki ehwaldin xewirini yoqluqini éytti.

Emeliyette "Beydu" uchur ambirida tonushturulushiche, shirzat bawudun 30 yildin buyan asasen siyasiy-qanun saheside xizmet qilghan. Bu yil 52 yashqa kirgen shirzat bawudun, 1988‏-yili gherbiy-shimal siyasiy-qanun institutini püttürüp, Uyghur aptonom rayonluq saqchi mektipide oqutquchiliq bilen xizmet hayatini bashlighan. U 1989‏-yilidin 2011‏-yiligha qeder xoten wilayetlik j x bashqarmisi siyasiy bölüm bashliqi, qaraqash nahiyilik j x idarisining bashliqi, xoten wilayetlik j x idarisining dölet amanliq (gobaw) bölümi bashliqi, qaraqash nahiyisige hakim we partkom sékrétari qatarliq wezipilerni ötigen.

Weziyettin xewerdar kishiler shirzat bawudunning xotendiki mezgilide nöwette Uyghur aptonom rayonida siyasiy qanun-komitétining sékrétari bolup wezipe ötewatqan, lagérlarni bashqurushta yétekchi rol oynawatqan ju xeylun bilen yéqin dostluq munasiwiti barliqi we 2011 ‏-yildin buyan uning himayiside yuqiri wezipilerge teyinlen'genlikini ilgiri sürmekte.

"Beydu" uchur ambirida tonushturulushiche, shirzat bawudun 2011 ‏-yildin kéyin ürümchi sheherlik partkom birliksep bölümining bashliqi, aptonom rayonluq edliye nazaritining naziri, aptonom rayonluq siyasiy kéngeshning mu'awin bash katipi we aptonom rayonluq partkom siyasiy-qanun komitétining sékrétari qatarliq wezipilerni ötigen.

Ilshat hesenning bayan qilishiche, shirzat bawudun buningdin 3 kün awwal, yeni 17‏-dékabir küni tutqun qilin'ghan. Uyghur aptonom rayonluq partkom siyasiy-qanun komitéti intizam tekshürüsh guruppisining xadimi özining shirzat bawudunni tonuydighanliqini inkar qilmighan bolsimu, emma uning nöwettiki ehwalidin xewersizlikini éytti we bu heqte siyasiy-qanun komitéti memuri ishxanisidin melumat élishimizni tewsiye qildi.

Siyasiy-qanun komitétining ishxana xadimi shirzat bawudun heqqidiki so'alimizgha endikish bilen jawab qayturup, uning ishxanida yoqluqini éytti. Oxshash ishxanidiki yene bir xadim deslepte shirzatning tünügün tutulghanliqi heqqidiki so'alimizgha deslepte "He'e" dep jawab qayturghan bolsimu, arqidin ehwaldin éniq melumati yoqluqini bayan qilip, so'allirimizdin özini qachurdi. Mezkur ishxanidiki yene bir xadim shirzat bawudunning xéli waqittin béri ishxanida yoqluqini éytti. Biz éniq halda uning qachandin béri yoqluqini sorighinimizda, u 10 nechche kündin béri yoq ikenlikini éytti. Biz uningdin shirzat bawudunning nöwette qeyerde ikenliki, tutqun qilin'ghan yaki qilinmighanliqini sorighinimizda, u shirzatning bashqa jaygha yötkilip ketkenlikini éytti. Biz uningdin shirzatning qeyerge yötkilip ketkenlikini sorighinimizda, u shirzatning siyasiy kéngeshke yötkelgenlikini éytti. Emma tor arxiplirini axturghinimizda "Tengritagh tori" ning bu yil 7 ‏-séntebirdiki xewiride shirzat bawudunning aptonom rayonluq siyasiy kéngeshning mu'awin bash katipliq wezipisidin qaldurulghanliqini bayan qilin'ghan. Mana bu bayan yuqiriqi xadimning shirzatning siyasiy kéngeshke yötkelgenliki heqqidiki jawabi bilen zit kelmekte we shundaqla ilshat hesen yetküzgen shirzat bawudunning tutqun qilin'ghanliqi heqqidiki uchurning toghriliqini delillimekte.

Ilshat hesen shirzat bawudunning tutqun qilinishining Uyghur emeldarlar üchün yene bir chong ibretlik hékaye ikenlikini tekitlidi.

Toluq bet