Shiwétsiyediki islam teshkilatlirining yighinigha Uyghurlarmu qatnashti

Shiwétsiyediki islam teshkilatlirining yighinigha Uyghurlarmu qatnashti. 2016-Yili mart.

Shiwétsiye musulman yashlar teshkilatining her yili ötküzülidighan “A'ile küni” namidiki yighinigha Uyghurlarmu qatnashti.

‏Bu yilliq yighinni, shiwétsiye musulman yashlar teshkilati ibni rushid telim-terbiye merkizi, shimaliy yawropa islam birliki birlikte uyushturghan bolup, bu qétimqi yighin 25 -marttin 27-martqiche ötküzülgen, 25-mart küni jüme namizidin kéyin shiwétsiyening paytexti sitokholmdiki “Elhumassan” yighin zalida resmiy bashlandi.

‏Yighin qur'an kérem tilawet qilinish bilen bashlandi. Qur'an kérem tilawitidin kéyin “Shiwétsiye musulman yashlar teshkilati” ning bashliqi sözge chiqip yighin'gha kelgen méhmanlargha tebrik sözi qildi.

‏Melum bolushiche, bu qétimqi 3 künlük yighin'gha shiwétsiye we shimaliy yawropadiki döletlerdin bolup texminen 4500 ge yéqin kishi qatnashti.

‏Bu yighin'gha ilgirikige oxshash islam elliride közge körün'gen alimlar teklip qilin'ghan bolup, yighinda dunyadiki musulmanlarning ehwali we yawropada yashawatqan musulmanlar duch kéliwatqan nazuk mesililer we ularni hel qilish chariliri heqqide munazire élip bérildi.

Igilinishiche, mezkur yighinda shiwétsiyediki Uyghurlargha wakaliten yighin'gha qatnashqan Uyghur ma'arip uyushmisi wekilliri, izchil halda her yili Uyghur mesilisini anglitish üchün Uyghur mesilisi heqqide léksiye sözlep kelgen bolup, bu yil yighin zalida sözleshke waqit bérilmigen bolsimu, yighin zalidin üch üstellik orun élin'ghan.

Igilishimizche, Uyghurlar mezkur körgezme zalidin paydilinip, teshwiqat körgezmisi pa'aliyiti élip barghan. Ular xitay da'irilirining Uyghur diyarida élip bériwatqan basturush heriketlirige da'ir mezmunlarni eks ettüridighan herxil höjjetlik filimlarni téléwizor ékrani arqiliq körsitip turghan, ay yultuzluq kök bayraq bésilghan sharpa, mayka, Uyghurlarning chimen doppisi, erkinlik sho'ari bésilghan shepke, shwédche, in'glizche we erebche tillarda bésilghan teshwiqat waraqliri, Uyghur diyarining qisqiche ehwali tonushturulghan erebche kitablar we dunya Uyghur qurultiyining re'isi rabiye qadir xanim heqqide yézilghan “Ejdiha bilen élishqan ayal” namliq shwédche kitablar yighin ishtirakchilirining alahide diqqitini tartqan.

Biz bu heqte téximu tepsiliy melumatqa ige bolush üchün, Uyghur ma'arip uyushmisining re'isi abdulla kökyarni ziyaret qilduq. U, bir qanche yildin béri dawamlashturup kéliwatqan yighinlarda körgezme zalidiki üsteldin ünümlük paydilinip kéliwatqanliqini, üstelge qoyulghan matériyallarni méhmanlargha tarqitish we ular bilen biwasite uchriship söhbetlishish arqiliq Uyghur diyarining ehwalini shiwétsiyediki keng musulman ammisigha bildürüp kéliwatqanliqini bildürdi.

Abdulla kökyar bu qétimliq yéghin'gha qatnishishtiki meqset-nishanliri heqqide toxtaldi. U, shiwétsiyediki musulman teshkilatlirining islami yighin we körgezme pa'aliyetlirige aktip qatnishish arqiliq Uyghur mesilisini shiwétsiyediki her millet musulmanlirigha keng da'iride chüshendürgili, shiwétsiyediki musulman jama'itige singip kirip, shiwétsiyediki her millet musulmanlirigha, Uyghur diyaridiki Uyghur musulmanlirining dunya musulmanlirining bir parchisi ikenlikini hés qildurghili bolidighanliqini bildürdi.

Üch künlük yighin jeryanida, abdullah kökyar shiwétsiye islam yardem fondi jem'iyitining mes'uli hélina xanim bilen körüshüp, Uyghur yétim balilar üchün shöbe fond échish heqqide söhbette boldi.

Yéghinning axirqi küni yépilish murasimida Uyghur yashlardin éhsan abdulitip Uyghurlarning dawasigha musulmanlarning ige chiqishining imani mejburiyet ikenliki heqqide yézilghan yazmini oqup ötti.

Uyghur ma'arip uyushmisining re'isi abdulla kökyar léksiye sözligen 35 neper liksiyechilerge “Sherqiy türkistan bayriqi” chüshürülgen sharpa we Uyghur diyari weziyiti tonushturulghan erebche kitab hediye qildi.

Shiwétsiyediki Uyghur pa'aliyetchisi batur ependi shwetsiye musulman yashlar teshkilatining shiwétsiyediki qanunluq, tizimgha élin'ghan teshkilat ikenliki, ularning her yili mol pa'aliyetlerni élip baridighanliqi, ulargha Uyghur mesilisini tonushturushning ehmiyitining zor ikenlikini bildürdi.

Bu heqte toxtalghan abdulla kökyar yighinning intayin muweppeqiyetlik bolghanliqini hemde Uyghur dawasini bu qétimliq yighinda keng kölemde anglatqanliqini bildürdi.