Sherqiy türkistan weqpining 4-nöwetlik omumiy yighinida yéngi rehberlik hey'iti saylap chiqildi

Ixtiyariy muxbirimiz erkin tarim
2014.12.16
Sherqiy-turkistan-weqpi-saylam-riyasetchi.JPG Sherqiy türkistan weqpining 4-nöwetlik omumiy yighini yéngi rehberlik hey'iti saylash yighinidiki riyasetchiler. 2014-Yili 13-dékabir, türkiye.
RFA/Erkin Tarim

Türkiyening istanbul shehiride pa'aliyet élip bériwatqan sherqiy türkistan weqpining 4-nöwetlik omumiy yighinida weqipning yéngi rehberlik hey'iti saylap chiqildi. 12-Ayning 13-küni chüshtin kéyin istanbul uniwérsitéti türkiyat institutining zalida ötküzülgen yighin'gha mezkur weqipning rehberliri, qurghuchi ezaliri qatnashti.

Sherqiy türkistan weqpning bash katipi ömer qul ependi riyasetchilik qilghan yighinning échilish nutqini weqip re'isi eser saqa qildi. Yighinning kün tertipi boyiche aldi bilen sherqiy türkistan weqpi bashliqi eser saqa xizmet doklati berdi. U, xizmet doklatida ikki-üch yildin béri weqip binasi rémont qiliniwatqan bolghachqa her jehettin nurghun qiyinchiliqqa duchar boluwatqanliqini, emma her jehettiki bu qiyinchiliqlargha qarimay Uyghur oqughuchilargha oqush puli tépip bériwatqanliqini, “Sherqiy türkistan awazi” namliq zhurnalni chiqiriwatqanliqini éytti. U, xizmet doklatida ikki yildin béri türkiyening istanbul, enqere qatarliq sheherliride nahayiti muhim yighinlarni chaqirghanliqini, türk dunyasi lobiychilik (siyasiy wayizliq) munbirini qurup chiqqanliqini, sherqiy türkistan mesilisini türk siyasetchilerge we türk jama'etchilikige anglitish üchün köp sanda pa'aliyet élip barghanliqini éytti.

Sherqiy türkistan weqpi bash katipi doktor ömer qul ependi xizmet doklatigha qoshumche qilip, weqipni rémont qilish ishining pütey dep qalghanliqini, ikki yildin béri eysa yüsüpni xatirilesh yighini achqanliqini, namayishlar ötküzgenlikini, türkiyening herqaysi jaylirida, gérmaniyening 6 shehiride Uyghurlar toghrisida doklat bergenlikini, weqip namidin köp sanda yighin'gha qatnashqanliqini, ikki qétim Uyghurlargha iqamet(turush salahiyiti) élish xizmitini qilghanliqini bayan qildi.

U yene sherqiy türkistan weqpining az sanda Uyghur oqughuchigha oqush mukapat puli bériwatqanliqini, bu sanni köpeytishke tirishiwatqanliqini bayan qilip ötti. Ömer qul ependi doklatida sherqiy türkistanda meydan'gha kéliwatqan weqelerni türk jama'etchilikige anglitish üchün dawamliq halda metbu'at bayanati élan qiliwatqanliqini tekitlidi.

Ömer qul ependi nutqining axirida sherqiy türkistan weqpige iqtisadiy jehettin yardem qilip kéliwatqan erkin aliptékin ependige we ismini ashkarilashni xalimaydighan Uyghurlargha rehmet éytti.

Arqidin murat axunbay sherqiy türkistan weqpining ikki yilliq maliye doklatini oqup ötti. Arqidin sherqiy türkistan weqpining 4-nöwetlik omumiy yighinining kün tertipige asasen erkin alptékinning riyasetchilikide saylam ötküzüldi. Saylamda eser saqa sherqiy türkistan weqpining re'islikige qayta saylandi, sherqiy türkistan weqpining mu'awin re'islikige abdulxemit awshar ependi, bash katipliqqa ömer qul ependi, ghezinichilik wezipisige muhittin januyghur ependi saylandi. Buningdin bashqa yene memetjan qeshqerli ependi boghaltirliq wezipisige, murat axunbay bilen tebet yüjetürk ependiler bolsa bash teptishlik wezipisige saylandi. Yighin axirida saylan'ghan rehberler tilek we arzulirini bayan qilip ötti.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.