Хитай әлчиханиси тунҗи қетим "түркийә-хитай яш әлчилири" намида бир саяһәт өмикини хитайға әвәтти

Ихтиярий мухбиримиз әркин тарим
2015-10-28
Share
xitay-elchisi-yu-hongyang-yashlar-bilen.jpg Хитайниң әнқәрәдики баш әлчиханиси "түркийә-хитай яш достлуқ әлчилири" намида тәшкиллигән түркийәниң һәрқайси университетлиридин талланған 15 түрк оқуғучи хитай баш әлчиси йү хоңяң билән. 2015-Йили 27-өктәбир, әнқәрә.
Türkiye anatoliye xewer agéntliqining munasiwetlik xewiridin élin’ghan

Түркийә пайтәхти әнқәрәдә турушлуқ хитай әлчиханиси түркийәниң һәрқайси университетлиридин 15 оқуғучини таллап "түркийә-хитай яш достлуқ әлчилири" намида хитайни екскурсийә қилиш үчүн йолға салди.

Түркийә анатолийә хәвәр агентлиқиниң 27-өктәбир күнидики хәвиригә асасланғанда, хитайниң әнқәрәдики баш әлчиханиси "түркийә-хитай яш достлуқ әлчилири" намида тәшкиллигән, түркийәниң һәрқайси университетлиридин талланған 15 түрк оқуғучи бейҗиң, шаңхәй вә ниңшя қатарлиқ җайларни екскурсийә қилидикән. Бу мунасивәт билән 15 түрк оқуғучини хитайниң әнқәрә әлчиханисиға чақирған баш әлчи йү хоңяң уларға сөз қилип, түрк оқуғучиларниң бу зиярәт җәрянида хитай җәмийитини, хитайниң иқтисадий, иҗтимаий вә мәдәнийәт җәһәттики тәрәққиятини чүшинишини, түркийә билән хитай оттурисидики мунасивәтни тәрәққий қилдурушқа төһпә қошушушини тәләп қилған.

Биз игилигән мәлуматларға асасланғанда, "түркийә-хитай яш достлуқ әлчилири" намида қурулған зиярәт өмикидики 15 түрк оқуғучи әнқәрә университетиниң тил вә тарих-җуғрапийә факултети, қәйсәри әрҗийәс университети, истанбулдики фатиһ университети һәм оқан университетлиридин талланған. Бу оқуғучилар 10-айниң 26-күни хитайға маңған болуп, 11-айниң 1-күнигичә бейҗиң, шаңхәй вә ниңшя қатарлиқ җайларни екскурсийә қилип, у йәрләрдики хитай оқуғучилар билән учришидикән һәмдә бейҗиң чәтәл тиллири университетини зиярәт қилип, лексийә аңлайдикән.

Хитай әлчиханиси бурун уйғур вә қазақ көчмәнләрни тәшкилләп хитайни зиярәт қилдуратти. Әмди түркләрни тәклип қилишқа башлиди.

Түркийә һаҗәттәпә университети тарих оқутқучиси, түркийә-хитай мунасивәтлири мутәхәссиси доктор әркин әкрәм хитайниң бу зиярәтни уюштурушидики мәқситиниң түркийәдә хитай тәсирини күчәйтиш икәнликини илгири сүрди.

Др. Әркин әкрәм хитайниң тәрәққий қилған районни чәтәлликкә көрситиш сияситиниң униң әнәниви сиясити икәнликини, 15 түрк оқуғучини ниңшяға апиришидики мәқсәтниң хитайда диний бесим йоқ икәнликини көрситиштин ибарәт икәнликини билдүрди.

"шәрқий түркистан маарип вә һәмкарлиқ тәшкилати" рәиси һидайәттула оғузхан әпәнди зияритимизни қобул қилип, хитайниң түркийәдә бу хил паалийәтни күчәйтиштики мәқситиниң уйғурларға һесдашлиқ қиливатқан түрк аммиси вә түрк аммиви тәшкилатлириға болған тәсирини күчәйтиш икәнликини ейтти.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт