Xitay elchixanisi tunji qétim “Türkiye-xitay yash elchiliri” namida bir sayahet ömikini xitaygha ewetti

Türkiye paytexti enqerede turushluq xitay elchixanisi türkiyening herqaysi uniwérsitétliridin 15 oqughuchini tallap “Türkiye-xitay yash dostluq elchiliri” namida xitayni ékskursiye qilish üchün yolgha saldi.

Türkiye anatoliye xewer agéntliqining 27-öktebir künidiki xewirige asaslan'ghanda, xitayning enqerediki bash elchixanisi “Türkiye-xitay yash dostluq elchiliri” namida teshkilligen, türkiyening herqaysi uniwérsitétliridin tallan'ghan 15 türk oqughuchi béyjing, shangxey we ningshya qatarliq jaylarni ékskursiye qilidiken. Bu munasiwet bilen 15 türk oqughuchini xitayning enqere elchixanisigha chaqirghan bash elchi yü xongyang ulargha söz qilip, türk oqughuchilarning bu ziyaret jeryanida xitay jem'iyitini, xitayning iqtisadiy, ijtima'iy we medeniyet jehettiki tereqqiyatini chüshinishini, türkiye bilen xitay otturisidiki munasiwetni tereqqiy qildurushqa töhpe qoshushushini telep qilghan.

Biz igiligen melumatlargha asaslan'ghanda, “Türkiye-xitay yash dostluq elchiliri” namida qurulghan ziyaret ömikidiki 15 türk oqughuchi enqere uniwérsitétining til we tarix-jughrapiye fakultéti, qeyseri erjiyes uniwérsitéti, istanbuldiki fatih uniwérsitéti hem oqan uniwérsitétliridin tallan'ghan. Bu oqughuchilar 10-ayning 26-küni xitaygha mangghan bolup, 11-ayning 1-künigiche béyjing, shangxey we ningshya qatarliq jaylarni ékskursiye qilip, u yerlerdiki xitay oqughuchilar bilen uchrishidiken hemde béyjing chet'el tilliri uniwérsitétini ziyaret qilip, léksiye anglaydiken.

Xitay elchixanisi burun Uyghur we qazaq köchmenlerni teshkillep xitayni ziyaret qilduratti. Emdi türklerni teklip qilishqa bashlidi.

Türkiye hajettepe uniwérsitéti tarix oqutquchisi, türkiye-xitay munasiwetliri mutexessisi doktor erkin ekrem xitayning bu ziyaretni uyushturushidiki meqsitining türkiyede xitay tesirini kücheytish ikenlikini ilgiri sürdi.

Dr. Erkin ekrem xitayning tereqqiy qilghan rayonni chet'ellikke körsitish siyasitining uning en'eniwi siyasiti ikenlikini, 15 türk oqughuchini ningshyagha apirishidiki meqsetning xitayda diniy bésim yoq ikenlikini körsitishtin ibaret ikenlikini bildürdi.

“Sherqiy türkistan ma'arip we hemkarliq teshkilati” re'isi hidayettula oghuzxan ependi ziyaritimizni qobul qilip, xitayning türkiyede bu xil pa'aliyetni kücheytishtiki meqsitining Uyghurlargha hésdashliq qiliwatqan türk ammisi we türk ammiwi teshkilatlirigha bolghan tesirini kücheytish ikenlikini éytti.