Türkiye xitay puqralirining wiza élishini qolaylashturghan bolsimu, xitay türk wizisi alghan sayahetchilerni ayrodromda tosuwalghan

Muxbirimiz erkin tarim
2015.02.25
turkiye-e-viza-xitay-puhraliri.jpg Xitay xelq jumhuriyeti puqraliri üchün tor arqiliq wiza élish höjjiti
RFA/Erkin Tarim


Türkiye hökümiti xitay puqralirining tor arqiliq wiza (E - Visa) élip türkiyege kirishi toghrisidiki belgilimisige özgertish kirgüzdi.

Türkiye sayahet shirketliri birlikining tor bétide 24 - féwral küni élan qilin'ghan xewerge asaslan'ghanda türkiye jumhuriyiti, türkiyege kélidighan sahayetchilerge asanliq yaritip bérish üchün 2013 - yili tor arqiliq wiza bérish tüzümini yolgha qoyghan iken. Bu belgilime boyiche xitay xelq jumhuriyeti puqraliri pasportida iqtisadiy hemkarliq we tereqqiyat teshkilati yeni “ OECD”gha eza döletlerning yaki shen'gen yeni yawropa birlikige eza döletlerning wizisi bolsa türkiye wizisini tor arqiliq alalaydiken.

Bu ayning béshida bu belgilimige tüzitish kirgüzülgen bolup, xitay puqralirining türkiye jumhuriyitining wizisini tor arqiliq élishi üchün iqtisadiy hemkarliq we tereqqiyat teshkilatigha eza döletlerning wizisini yaki shen'gen wizisini alghan bolush sherti emeldin qaldurulghan. Buningdin kéyin xitay pasporti bar kishiler tor arqiliq wiza élip türkiyege kireleydiken. Türkiyede héchqandaq resmiyet ötmey 30 kün turalaydiken. Bu höjjet türkiye tashqi ishlar ministirliqi teripidin chiqirilghan bolup, türkiye ichki ishlar ministirliqi köchmenler idarisi, türkiye sayahet shirketliri birlikining tor betlirige qoyulghan.

Biz igiligen melumatqa asaslan'ghanda, türkiye jumhuriyiti tashqi ishlar ministirliqining bu qarari 2 - ayning 5 - künidin tartip yolgha qoyulghan bolsimu, bu wizini élip türkiyege kélidighan kishiler ayrodromda tosuwélin'ghan.

Istanbuldiki sayahet rehbiri memet aydin ependi, Uyghur iqtisadshunas abduréshit abdulxemit ependi we türkiye istratégiyilik chüshenche instituti mutexessisi doktor erkin ekremler bilen bu heqte söhbet élip barduq.

Doktor erkin ekrem ependi türkiye sayahet döliti bolghachqa pul tépish üchün bundaq bir belgilimini chiqarghanliqini, emma xitay Uyghurlarning türkiyege kélishini tosush üchün buninggha ri'aye qilmaywatqan bolush éhtimali barliqini bayan qildi.

Memet aydin ependi bolsa bezi xitay puqralirining tor arqiliq alghan wizisi bilen türkiyege kélish aldida xitaydiki ayrodromlarda tosulup qalghanliqini éytti.

Xitay xelq jumhuriyeti puqraliri üchün tor arqiliq wiza élish höjjiti

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.