“Sherqiy türkistan dewasida saghlam idiye toghra heriket” dégen témida yighin échildi

Ixtiyariy muxbirimiz arslan
2016.07.21
Share on WhatsApp
Share on WhatsApp
Hidayetullah-oguzhan-soz.jpg Sherqiy türkistan ma'arip we hemkarliq jem'iyiti re'isi hidayetullah oghuzxan sözlimekte. 2016-Yili 18-iyul, istanbul.
RFA/Arslan

Sherqiy türkistan ma'arip we hemkarliq jem'iyitining uyushturushi bilen yilda bir qétim ötküzülüp kéliwatqan “Dunya sherqiy türkistanliqlar qérindashliq uchrishish yighini” ning 8 -nöwetliki 18 - iyul istanbulda échildi.

Töt kün dawam qilidighan bu yighinning birinchi küni 17 - iyul istanbuldiki zeytunburnu medeniyet merkizi yighin zalida échilishi pilanlan'ghan bolsimu, türkiyediki herbiy özgirish weqeliri sewebidin bikar qilin'ghan bolup 7 18- iyul istanbulning arnowut köyide bir méhmanxanida échildi. Yighin bügün 3 - künige qedem qoyghan bolup 21- iyul axirlishidiken.

Yighin'gha, amérika, awstraliye, yaponiye, se'udi erebistan, qazaqistan we yawropa döletliri bolup 13 dölettin kelgen teshkilat rehberliri, zhurnalistlar, tetqiqatchilar, ziyaliylar, diniy ölimalar we Uyghur yashlardin bolup 120 din artuq kishi qatnashti.

Yighin sherqiy türkistan ma'arip we hemkarliq jem'iyiti re'isi hidayetullah oghuzxanning échilish nutqini bilen bashlandi.

Yighinda, sherqiy türkistan ma'arip we hemkarliq jem'iyiti bash mupettishi, diniy alim abdulhekimxan mexsum hajim, “Sherqiy türkistan dewasida saghlam idiye, toghra heriket élip bérish”, dégen témida, se'udi erebistan jidde radi'osida xizmet qilidighan zhurnalist abdul'ehed hapiz, “Herikitimizning islamiy yölinishide otturahalliq éngini östürüsh”, istanbulda yashawatqan diniy alim ibrahim damollam we abdu'éziz ependi “Sherqiy türkistan dewasida inkarchiliq éngini aghdurup tashlash” dégen témida, jenubiy awstraliye islam diniy jem'iyiti re'isi diniy alim abdusalam abdughéni, “Islamiy jihad we dölet berpa qilishning qur'an we sünnettiki orni” dégen témida, hajettepe uniwérsitéti oqutquchisi, doktor erkin ekrem, “Sherqiy türkistan dewasida netijide qazinishning yol we métodliri” dégen témida, enqere uniwérsitétining oqutquchisi doktor erkin emet, “Sherqiy türkistan dewasida wa'izliqning ehmiyiti” dégen témida, istanbuldiki aral uniwérsitéti radiyo - téléwiziye fakultéti oqutquchisi doktor shawket nasir, “Sherqiy türkistan dewasida metbu'at we teshwiqatning roli we ehmiyiti” dégen témilarda söz qildi.

Her bir söz qilghuchi sözini tamamlighandin kéyin so'al - jawab we témilar boyiche mulahize, muzakire qilindi. Yighinda sherqiy türkistan körüshi herikiti yönilishining toghra bolushi üchün saghlam pikirning hel qilghuch rol oynaydighanliqi heqqide chongqur muzakire we muhakimiler élip bérildi.

Biz bu yighin toghrisida pikir qarashlirini élish üchün yighin'gha qatnashqan bir qanche méhmanlar bilen söhbet élip barduq.

Awstraliyedin kélip yighin'gha qatnishiwatqan diniy alim abdusalam abdughéni bu yighinda muzakire qilin'ghan mesililer toghrisida toxtaldi.

Biz yene, bu yighin toghrisida pikir qarashlirini élish üchün yaponiyedin kélip yighin'gha qatnashqan Uyghur ziyaliy turmuhemmet hashim ependi bilen söhbet élip barduq.

Yawropa sherqiy türkistan ma'arip we hemkarliq jem'iyiti bash katipi eysa sawut ependi, yighindin Uyghurlar üchün yaxshi bir netijining otturigha chiqishini arzu qilidighanliqini bildürdi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.