Türkiyening konya wilayitide Uyghur mesilisi anglitildi

Ixtiyariy muxbirimiz erkin tarim
2016-01-19
Share
konya-wilayitide-uyghur-mesilisi-1.jpg D u q mu'awin re'isi séyit tümtürk ependi konya wilayitide Uyghur mesilisi anglitiwatqan körünüsh. 2016-Yili 15-yanwar, türkiye.
RFA/Erkin Tarim

Türkiyening ottura rayonigha jaylashqan eng chong wilayetlerdin biri bolghan konya wilayitide 15-16-yanwar künliri uda ikki kün Uyghur mesilisi anglitildi.

Konya wilayitining eng chong ammiwi teshkilatliridin biri bolghan ifran der jem'iyitining alahide teklipige bina'en 15-yanwar küni konyagha yétip kelgen dunya Uyghur qurultiyining mu'awin re'isi séyit tümtürk ependi shu küni aqsham kon t w téléwiziyeside bir sa'etlik t w programmisigha chiqip, Uyghurlarning qisqiche tarixi, bügünki weziyiti we Uyghur mesilisining xelq'aradiki weziyiti toghrisidiki so'allargha jawab bergen. Aqsham konyada pa'aliyet élip bériwatqan ammiwi teshkilatlarning mes'ullirigha Uyghurlar toghrisida doklat bergen.

Bu heqte ziyaritimizni qobul qilghan séyit tümtürk ependi, 15-yanwar shenbe küni kon t w téléwiziyeside xelqqe, aqshamqi yighinda konyadiki aqsaqallargha Uyghur mesilisini anglatqanliqini bayan qildi.

Etisi küni yani 1-ayning 16-küni konya shehiridiki meram rayonluq hökümetning medeniyet zalida ötküzülgen yighinda konya shehiridiki ammiwi teshkilat mes'ullirigha, oqutquchi we oqughuchilargha Uyghurlar we Uyghur mesilisi anglitilghan. Dunya Uyghur qurultiyi mu'awin re'isi séyit tümtürk ependi bergen doklatida, Uyghurlarning qisqiche tarixi anglitilghandin kéyin nuqtiliq halda bügünki weziyiti, xitay hökümitining bésim siyasiti, Uyghurlar duchar boluwatqan insan heq we hoquqliri depsendichiliklirini anglatqan. Yighin'gha oqutquchi-oqughuchilardin bolup 550 etrapida kishi qatnashqan. Séyit tümtürk ependi bu yighin toghrisida qisqiche melumat berdi.

16-Yanwar küni séyit tümtürk ependi türkiyening konya wilayitide Uyghurlar toghrisida chaqirilghan bu pa'aliyetni irfan der uyushturghan bolup, mezkur jem'iyetning mu'awin re'isi mehmet ependi, Uyghurlar toghrisida chaqirilghan doklat bérish yighinigha kütkenliridin köp kishining ishtirak qilghanliqini, nahayiti yaxshi ötkenlikini bayan qilip mundaq dédi: "500-550 Etrapida kishi qatnashti. Séyit tümtürk ependi etrapliq melumat berdi. Doklat bérish yighini bir yérim sa'et dawamlashqan bolsimu kishiler bashtin-axir pütün diqqiti bilen anglidi. Hazir bizge yighin'gha ishtirak qilghanlarning ijabiy inkasliri kéliwatidu. Nahayiti yaxshi ötti."

Mehmet ependi yighinni chaqirishtiki meqsetlirini emelge ashurghanliqini bayan qilip yene munularni dédi: "Bizning bu pa'aliyetni uyushturushtiki meqset bu mesilide alahide bir weziyet berpa qilish idi. Ijtima'iy taratqular arqiliq kütmigen derijide inkaslar kéliwatidu. Menche bizning bu qétimqi pa'aliyitimiz intayin muweppeqiyetlik ötti. Séyit tümtürk ependimu resim we körünüshler arqiliq bizge yéngi melumatlarni berdi. Mezlum Uyghur qérindashlirimiz tartiwatqan bu zulumni dunyagha anglitish üchün qolimizdin kelgenni qilimiz. Teshkilatimizning kéler heptidiki bashqurush hey'iti yighinida bundin kéyin Uyghurlar toghrisida némilerni qilimiz, bu heqte pilan tüzmekchimiz."

Nöwette türkiyede Uyghurlargha a'it qiziqishlar köpeymekte. Zhurnalist azatjan bughra bu heqte ziyaritimizni qobul qilip, burun Uyghur mesilisining melum sahediki kishilerla qiziqidighan mesile ikenlikini, bügünki kün'ge kelgende Uyghur mesilisining türkiyediki hemme kishi qiziqidighan muhim mesilige aylan'ghanliqini bayan qildi.

2-Ayning 5-küni enqere türk ojaqliri teshkilati we istanbuldiki ma'arip we hemkarliq teshkilati ghulja weqesini xatirilesh yighini ötküzmekchi iken.

Enqere türk ojaqliri mes'uli proféssor doktor türkan xajaloghli xanimning éytishiche, mesilen yéqinqi waqitlardin buyan türkiyede Uyghurlar rayoni we Uyghurlarning tarixi, medeniyiti, siyasiy-ijtima'iy we bashqa türlük mesililiri heqqide ilmiy muhakime, doklat bérish, yumilaq üstel söhbiti we bashqa xil shekildiki yighin pa'aliyetliri uniwérsitét, tetqiqat orunliridin bashqa her xil ammiwi, medeniyet jem'iyetlirining da'imliq pa'aliyetlirige aylanmaqta. Bundaq doklatlarning anglighuchiliri türk aliy mektep oqughuchiliri, oqutquchilar, ziyaliylardin bashqa yene hökümet memuriy xadimlirini öz ichige alghan her sahe kishiliridin ibaret iken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.