Uyghurlar rejep tayyip erdoghan we ehmet dawut'oghlugha teleplirini yetküzdi

Ixtiyariy muxbirimiz erkin tarim
2016-01-26
Élxet
Pikir
Share
Print
Sherqiy türkistan medeniyet we hemkarliq teshkilati re'isi séyit tümtürk ependi türkiye bash ministiri ehmet dawut'oghlugha Uyghurlarning telipini bermekte. 2016-Yili 24-yanwar, qeyseri.
Sherqiy türkistan medeniyet we hemkarliq teshkilati re'isi séyit tümtürk ependi türkiye bash ministiri ehmet dawut'oghlugha Uyghurlarning telipini bermekte. 2016-Yili 24-yanwar, qeyseri.
RFA/Erkin Tarim

24-Yanwar küni qeyseridiki Uyghurlar yéngi kelgen Uyghur musapirlarning mesililirini öz ichige alghan doklatni türkiye re'is jumhuri rejep tayyip erdoghan bilen türkiye bash ministiri ehmet dawut'oghlugha yetküzdi.

Türkiye re'is jumhuri rejep tayyip erdoghan, türkiye bash ministiri ehmet dawut'oghlu, türkiye parlaméntining sabiq bashliqi ismet yilmaz, bash ministir mu'awini numan qurtulmush we lütfü elwan ependi qatarliq 10 etrapida ministir we köp sanda parlamént ezaliri 24-yanwar küni ikki muhim pa'aliyetke qatnishish üchün qeyseri wilayitige keldi. Bu pa'aliyetlerning birinchisi qeyseri tijaret uyushmisining qurulghanliqining 120-yilliqi munasiwiti bilen ötküzülgen murasim, ikkinchisi bolsa türkiye iqtisad we tijaret ministiri mustafa elitash ependining oghlining toy merikisi bolup, buninggha qeyseride pa'aliyet élip bériwatqan sherqiy türkistan medeniyet we hemkarliq teshkilati re'isi séyit tümtürk ependi, ayallar komitéti mudiri rabiye ilktürk xanim we malayshiya, tayland arqiliq türkiyege kélip olturaqliship qalghan Uyghurlardin bir qanche a'ile Uyghur teklip boyiche ishtirak qilghan. Bu toy jeryanida Uyghurlargha wakaliten séyit tümtürk ependi türkiye re'is jumhuri rejep tayyip erdoghan, bash ministir ehmet dawut'oghlu qatarliq kishiler bilen uchriship, aldi bilen türkiye jumhuriyiti dölitining Uyghur musapirlargha qilghan yardimi üchün rehmet éytqandin kéyin, musapir Uyghurlarning qiyinchiliqlirini hel qilish toghrisidiki teleplirini iltimas sheklide sun'ghan.

Bu heqtiki ziyaritimizni qobul qilghan dunya Uyghur qurultiyi mu'awin re'isi séyit tümtürk ependi aldi bilen qeyseride ötküzülgen mezkur ikki pa'aliyetke türkiye dölet rehberliri we köp sanda parlamént ezalirining ishtirak qilghanliqini shundaqla 2 yérim sa'et dawamlashqan toy jeryanida tayyip erdoghan, ehmet dawut'oghlu we munasiwetlik ministirlar bilen uchriship Uyghurlarning teleplirini sun'ghanliqini bayan qildi.

Séyit tümtürk ependi yéngi kelgen musapir Uyghurlarning telepliri, ularning balilirini oqutalishi, salametlik xizmitidin behrimen bolalishi, xizmet tépip turmushini qamdiyalishi, xizmet tapalishi üchün baldurraq puqraliqqa élinishi kéreklikini, bu Uyghurlarning bir qismi qeyseride yashawatqan bolsimu, köpining istanbul we bashqa sheherlerde tarqaq yashawatqachqa, bezi Uyghurlar bashqa yerlerge öz meyliche ketken bolghachqa, türkiye hökümitining wetendashliqqa élishini kéchiktürüwatqanliqini bayan qildi.

Rejep tayyip erdoghan we ehmet dawut'oghlu qatarliq aliy rehberler repiqiliri bilen qatnashqan toygha, qeyserige yéngi kelgen Uyghur ayal musapirlarni élip bérip qatnashqan qeyseride pa'aliyet élip bériwatqan sherqiy türkistan medeniyet we hemkarliq jem'iyiti ayallar komitéti mudiri rabiye ilktürk xanim toy jeryanida yéngi kelgen Uyghur ayallarni türkiye rehberlirining we karxanichilirining ayalliri bilen tonushturup, wetendiki Uyghur ayallirining tartiwatqan derd-elemlirini we qeyserige yéngi kelgen Uyghur ayallirining qiyinchiliqlirini anglatqanliqini bayan qildi.

Türkiyede bu xil toylar, Uyghur teshkilatlirining döletke deydighan teleplirini aliy rehberlerge yetküzüshi üchün yaxshi bir purset hésablinidu.

Toluq bet