Pakistan palata ezasi we i h h mes'ulliri Uyghur teshkilatini ziyaret qildi

I h h)IHH( insanperwerlik yardimi fondi hey'iti we pakistan kéngesh palata ichki kabinét da'imiy komitétining bashliqi muhemmed talha mehmud sherqiy türkistan ma'arip we hemkarliq jem'iyitide ziyarette boldi. 2016-Yili 23-awghust, istanbul.

23-Awghust seyshenbe küni merkizi istanbulgha jaylashqan i h h (IHH) insanperwerlik yardimi fondi hey'iti we pakistan kéngesh palata ichki kabinét da'imiy komitétining bashliqi muhemmed talha mehmud sherqiy türkistan ma'arip we hemkarliq jem'iyitide ziyarette boldi.

Türkiyediki xelq'araliq ijtima'iy hemkarliq teshkilati bolghan insan heq we höriyetliri insanperwerlik yardimi fondi jem'iyiti(qisqiche i h h)ning mu'awin re'isi hüseyin oruch bashchiliqidiki 12 kishilik bir hey'et sherqiy türkistan ma'arip we hemkarliq jem'iyitide ziyarette boldi.

Sherqiy türkistan ma'arip we hemkarliq jem'iyiti mes'ulliridin hidayetullah oghuzxan we abdulhekimxan mexsum hajim bilen bashqa idare hey'et rehberliri insan heq we höriyetliri insanperwerlik yardimi fondi hey'iti bilen birge pakistan kéngesh palatasi ichki kabinét da'imiy komitétining bashliqi muhemmed telha mehmudni jem'iyet merkizide kütüwaldi.

Ziyaret jeryanida hidayetullah oghuzxan, muhemmed telha mehmud we hüseyin oruch qatarliq rehberlerge sherqiy türkistan ma'arip we hemkarliq jem'iyitining xizmet pa'aliyetliri toghrisida melumat berdi. Üch terep qizghin söhbet élip bardi we Uyghurlar toghrisida pikir almashturdi.

Biz bu ziyaret toghrisida sherqiy türkistan ma'arip we hemkarliq jem'iyitining re'isi hidayetullah oghuzxan we bash katipi abdul'ehed abduraxman bilen söhbet élip barduq.

Abdul'ehed abduraxman ependi bu ziyaret toghrisida toxtilip insan heq we höriyetliri insanperwerlik yardimi fondining Uyghurlargha yéqindin köngül bolup kéliwatqan bir teshkilat ikenlikini, bu teshkilat sherqiy türkistan ma'arip hemkarliq jem'iyitining xizmet pa'aliyetliride yéqindin hemkarlishiwatqanliqini, shuning üchün munasiwetni téximu kücheytish meqsitide ularni ziyaretke teklip qilghanliqini bildürdi.

Hidayetullah oghuzxan bu ziyaret toghrisida toxtaldi we ziyaretchi hey'et bilen we pakistanliq ichki kabinét awam palata ezasi muhemmed talha mexmut bilen Uyghur mesilisi toghrisida pikir almashturghanliqini we pakistanning xitay bilen emes, Uyghurlar bilen chégridash qoshna ikenlikini, pakistan xelqining xitay bilen emes, Uyghur musulmanlar bilen heqiqiy islami qérindash ikenlikini tekitligenlikini bildürdi we pakistanning Uyghur musulmanlirining mesililirige köz yummasliq kéreklikini otturigha qoyghanliqini ipadilidi.

Biz pakistanliq kéngesh palata ezasi muhemmed talha mehmud we i h h insan heq we höriyetliri insanperwerlik yardimi fondining mu'awin re'isi hüseyin oruch bilen erkin asiya radiyosi üchün söhbet élip bérishni telep qilduq, biraq ular waqtining qisqa ikenlikini bildürüp kétip qaldi.

Türkiye metbu'atlirining xewirige qarighanda, pakistan kéngesh palata ezasi muhemmed talha mehmud eslide mushahid hüseyin qatarliq pakistan kéngesh palatasi we pakistanning her qaysi partiyilerning wekilliridin terkib tapqan 8 kishilik aliy derijilik rehberliri bilen türkiyege kelgen bolup, 15-iyul türkiyede yüz bergen herbiy isyan'gha qarshi türkiye hökümitini qollaydighanliqini ipadilesh meqsitide resmiy ziyaretke kelgen. Pakistanliq bu hey'et 19 -awghust küni türkiye jumhuriyet sariyini ziyaret qilip jumhur re'is rejep tayyip erdughan bilen uchrashqandin kéyin istanbulgha kélip sherqiy türkistan ma'arip we hemkarliq jem'iyitini ziyaret qilghan.

Yuqiridiki awaz ulinishtin bu heqtiki söhbet programmimizning tepsilatini anglighaysiler.