Türkiyede Uyghurlarni qollap “Qelem sundurush” pa'aliyiti dawam qiliwatidu
2014.12.10

Türkiye ülkü ojaqliri teshkilatining elazigh shöbisi, xitay da'irilirining Uyghurlar üstidin yürgüzüwatqan bésim siyasitige bolghan naraziliqini ipadilep qelem sundurush pa'aliyitini bashlatqan bolup, bu pa'aliyetni türkiyening her qaysi jayliridin köpligen kishiler qollap-quwwetlimekte. Bu pa'aliyetni qollighuchilar aldi bilen yashisun musteqil sherqiy türkistan, yoqalsun qizil kommunist xitay dégen'ge oxshash sho'ar towlap arqidin qelem sundurghan sin'alghu körünüshlirini ijtima'iy uchur wasitisi fésbokta élan qilish arqiliq özlirining naraziliqini ipadilep kelmekte. Bu toghrida yashisun musteqil sherqiy türkistan dégen namda fésbukta bir sehipe échilghan bolup bu sehipini hazirghiche Uyghur we türklerdin bolup 5400 din artuq kishi qollap awaz qoshqan, yüzlerche kishi Uyghurlarni qollaydighanliqini, xitaygha bolghan naraziliqini ipadilep sho'ar towlap turup qelem sundurghan sin'alghu körünüshlirini bu sehipide élan qilghan.
Ülkü ojaqliri teshkilatining nighde shehiridiki shöbisining pütün ezaliri bu pa'aliyetke awaz qoshqan bolup ular topliship hemmisi biraqla sho'ar towlap, qelem sundurush pa'aliyiti élip barghan sin'alghu körünüshini élan qildi. Ular sin'alghuda “Türk bayriqidin kök bayraqqa salam bolsun! qehri bolsun qizil kommunist fashist xitaygha!, yashisun musteqil sherqiy türkistan!” dep sho'ar towlighan.
Elazigh ülkü ojaqliri teshkilatining re'isi fatih murat tashqin ependi bu pa'aliyetni uyushturushtiki meqsitini ipadilep mundaq dédi: “Bizning bu pa'aliyitimizni qollashni xalighan qérindashlarning, qoligha bir tal qelem élip, yashisun musteqil sherqiy türkistan, yoqalsun kommunist qizil xitay, dep qelemni sunduridu, buni widi'ogha élip, bizning ijitima'i uchur alaqe wasitisi fésbuktiki sehipimizde élan qilidu, buni qilish arqiliq qanche köp kishining qollishigha érishelisek, shunche köp sherqiy türkistanning awazini anglitalaymiz dep qaraymen. Biz bashqa milletning mesililirige shunche diqqet bilen köngül bölüwatimiz, emma öz qérindashlirimizning mesililirige ulardin téximu köp köngül bölüshimiz kérek dep oylaymen. Allah ta'ala qur'an kerimide bir ayette, yaxshiliq qilishqa, adaletlik bolushqa we uruq - tughqanlargha yardem qilishqa buyruydu. Shuning üchün biz yardem qilishni uruq - tughqanlardin bashlishimiz kérek. Tejribe sawaqlar we sherqiy türkistan'gha alaqidar béshimizdin ötken weqeler bizge, musulman türkning musulman türktin bashqa dosti yoqluqini körsitiwatidu. Bu nuqtida türk dunyasida eng küchlük türk döliti bolghan türkiye jumhuriyiti xelqining bu pa'aliyetni qollap - quwwetlishini telep qilimiz.”
Elazigh ülkü ojaqliri teshkilatining re'isi fatih murat tashqin ependi, bu pa'aliyetni qollashni xalighan kishilerning néme qilish kérekliki toghrisida toxtilip mundaq dédi: “Her kim özining bir körünüshini widi'ogha alidu, qoligha qelem élip, yashisun musteqil sherqiy türkistan dep warqirap, xitayning sherqiy türkistanda yürgüzgen bésim siyasitige qarshi ipadilen'gen bir shé'ir yaki menilik söz qilidu we qelemni sunduridu. Qelemni sundurush-xitayning élip bériwatqan zulum we iskenjilirini toxtat dégenlikning simwoli, yeni zulumni toxtat déyish üchün qelemni sunduridu. Türkiyede we yawropaning türkler köp yashighan rayonlarda bu pilanni keng omumiylashturalisaq, türk we musulman bolmighan bashqa chet'elliklermu bu pa'aliyetni qollap-quwwetleydighanliqigha ishinimen.”
Biz bu pa'aliyet toghrisida pikir - qarashlirini élish üchün Uyghur ziyaliy memettursun Uyghur ependi bilen söhbet élip barduq.
Memettursun Uyghur ependi bu pa'aliyetning, Uyghurlarni we sherqiy türkistan mesilisini téximu köp kishilerning bilishige türtke bolidighanliqini, türkiyede Uyghur mesilisi toghrisida jama'et pikri peyda qilish, hökümet we siyasiy partiyilerning küntertipige keltürüshte ehmiyetke ige ikenlikini bildürdi.