Türkiyening qeyseri shehride Uyghurlar toghrisida arqa-arqidin 3 pa'aliyet ötküzüldi

Ixtiyariy muxbirimiz erkin tarim
2015-12-29
Share
Erjiyes-uniwersiteti-seyit-tumturk.jpg Qeyseri erjiyes uniwérsitétidiki oqughuchilar yataq binasining zalida uyushturulghan Uyghurlar toghrisida doklat bérish yighinida d u q mu'awin re'isi séyit tümtürk ependi söz qilmaqta. 2015-Yili 25-dékabir, türkiye.
RFA/Erkin Tarim

Türkiyening qeyseri shehiride Uyghurlar toghrisida arqa-arqidin 3 pa'aliyet ötküzüldi. Uyghur mesilisi türkiyede xelq'ara munasiwetler kespidikilermu qiziqidighan bir témigha aylandi.

25-Dékabir küni türkiyening ottura rayonigha jaylashqan qeyseri shehiridiki erjiyes uniwérsitéti xelq'ara munasiwetler kespi oqughuchiliri "Untulghan weten sherqiy türkistan" témisida doklat bérish yighini we resim körgezmisi ötküzdi. Yighinda qeyseride pa'aliyet élip bériwatqan "Sherqiy türkistan medeniyet we hemkarliq jem'iyiti" re'isi séyit tümtürk ependi doklat bergendin sirt ressam nuriye xanim Uyghur diyari eks ettürülgen resim körgezmisini achti. Etisi küni, yeni 26-dékabir küni bolsa qeyseri erjiyes uniwérsitétidiki oqughuchilar yataq binasining zalida Uyghurlar toghrisida doklat bérish yighini chaqirdi. Ikkila doklat bérish yighinigha oqughuchilarning qiziqishi intayin yuqiri bolup, qeyseride ötküzülgen bu doklat bérish yighini 2015-yili ichidiki Uyghurlargha a'it bir qatar doklat bérish yighinlirining eng axirqisi bolup hésablinidu.

Igilishimizche mezkur ilmiy doklat bérish yighinini erjiyes uniwérsitéti iqtisadiy bashqurush ilimliri fakultéti, xelq'ara munasiwetler oqughuchilar uyushmisi uyushturghan bolup, bu yighinda noxtiliq halda xitayning Uyghurlargha élip bériwatqan bésim siyasiti resim we höjjetlik filimlar bilen körsitilishtin sirt, türkiye-xitay munasiwitide Uyghur mesilisining orni toghrisida muzakiriler élip bérilghan.

Yighinda ilmiy doklat bergen "Sherqiy türkistan medeniyet we hemkarliq jem'iyiti" ning re'isi séyit tümtürk ependi téléfon ziyaritimizni qobul qilip, xitay hökümitining Uyghurlargha qarita élip bériwatqan bésim siyasitini höjjetler bilen anglatqanliqini bayan qildi.

Melum bolushiche, yéqinqi bir qanche yildin buyan türkiyening her qaysi uniwérsitétlirida xelq'ara munasiwetler kespide oquwatqan oqughuchilarning Uyghur mesilisige bolghan qiziqishi kücheygen bolup, bu heqte mexsus ilmiy doklat bérish pa'aliyetliri kücheygen. Türkiye uniwérsitétliridiki xelq'ara munasiwetler kespide oquwatqan oqughuchilarning Uyghurlar mesilisige qiziqish ehwali heqqide közitish élip barghan türkiye qehreman marash sütchü imam uniwérsitéti diniy ilimler fakultéti oqutquchisi doktor alimjan bughra ependi ziyaritimizni qobul qilip, öz köz qarashlirini bayan qildi.

U, nöwette Uyghur mesilining türkiye-xitay munasiwitidiki muhim mesililerdin birige aylan'ghanliqini bayan qildi.

Qeyseri erjiyes uniwérsitéti bilen qiz oqughuchilar yataqxanisining zalida Uyghurlar toghrisida doklat bergen séyit tümtürk ependi ilmiy doklat bérish pa'aliyetlirini élip bérishing Uyghurlarni we Uyghurlarning duch kéliwatqan mesililirini türkiyediki yash ewladlargha, bolupmu xelq'ara munasiwetler kespide oquwatqan oqughuchilargha tonushturushta muhim ehmiyetke ige ikenlikini, shunga mundaq pa'aliyetlerni köplep ötküzüsh kéreklikini otturigha qoydi.

Melum bolushiche, bu yil bir qisim türkiye uniwérsitétliridiki xelq'ara munasiwetler fakultétlirida Uyghur mesilisi toghrisida doklat bérish yighinliri uyushturulghandin sirt, türkiye dölet ministiri numan qurtulmush ependi, türkiye bash ministirliq idarisi tarmiqidiki türkiye sirtidiki türkler we qérindash milletler idarisi we türkiye istiratégiyelik chüshenche institutigha oxshash idari-jemiyetlermu Uyghur ammiwi teshkilatlirining mes'ulliri we Uyghur ziyaliylarni chaqirip türkiye-xitay munasiwitide Uyghur mesilisi toghrisida muzakire élip barghan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet