Türkiye büyük birlik partiyisi: “Sherqiy türkistandiki weqelerge türkiye tashqi ishlar ministirliqi arilishishi kérek”

Türkiye büyük birlik partiyisi re'isi mustafa destichi ependi yekende yüz bergen weqedin kéyin bayanat élan qilip, xitayning kéyinki aylarda sherqiy türkistanliq Uyghurlargha élip bériwatqan basturush tüpeyli türkiye tashqi ishlar ministirliqining derhal xitay hökümitini agahlandurup, xitayni Uyghurlargha qarshi élip bériwatqan basturush siyasitini toxtitishqa chaqirishi kéreklikini telep qildi.

U yekende meydan'gha kelgen weqedin kéyin élan qilghan bayanatida, xitay hökümitining yolyoruqi bilen xitay saqchilirining Uyghurlarni öltürüwatqanliqini ilgiri sürüp mundaq dégen:
“Türkiye jumhuriyiti tashqi ishlar ministirliqi xitay hökümitige agahlandurush xéti ewetip, xitayning Uyghurlargha élip bériwatqan qirghinchiliq siyasitini toxtitishini telep qilishi kérek. Xitayning Uyghurlargha élip bériwatqan qirghinchiliq siyasiti tügümigiche xitay bilen bolghan diplomatiyilik munasiwetni toxtitishi kérek. Xitayning Uyghur qérindashlirimizgha élip bériwatqan bu bésim siyasitini türkiye jumhuriyiti döliti xelq'ara sehnige kötürüp chiqishi kérek. Türkiye hökümiti türk xelqini aldimisun, xitay bilen bolghan tijaret munasiwitide ziyan tartiwatimiz. Türkiye jumhuriyiti döliti xitaygha emes, eslide xitay bizge mohtaj, chünki biz xitaygha satqan maldin xitay bizge satqan mal köp.”

30-Dékabir küni, seher shu yer waqti 6 din 30 minut ötkende yeken nahiyilik saqchi idariside qanliq toqunush yüz bérip 8 neper Uyghurning öltürülgenlik xewiri tarqalghandin kéyin buninggha türkiye metbu'atlirimu alahide orun berdi. Türkiye büyük birlik partiyisi re'isi mustafa destichi ependi bayanat élan qildi.

Dunya Uyghur qurultiyi mu'awin re'isi séyit tümtürk ependi enqerege kélip türkiye bash ministirliqidiki rehberlerge Uyghur diyarida boluwatqan weqeler toghrisida melumat berdi. Türkiye bash ministirliqi aldida mikrofonimizni uninggha uzattuq.