Istanbulda "Zhurnalistlarning neziridiki sherqiy türkistan mesilisi" témisida muhakime yighini ötküzüldi

Ixtiyariy muxbirimiz erkin tarim
2019-03-05
Share
zhurnalistlar-neziridiki-sherqiy-turkistan-1.jpg "Zhurnalistlarning neziridiki sherqiy türkistan mesilisi" témisida muhakime yighinida sözge chiqqanlar: (ongdin solgha) gün'gör yawuz arslan, mirkamil qeshqeri, sulayman shahin, riyasetchi hidayetulla oghuzxan, merwe shebnem uruch, tayyar tarjan. 2019-Yili 3-mart, istanbul.
RFA/Arslan

3-Mart istanbulning küchükchekmeje rayonida "Zhurnalistlarning neziridiki sherqiy türkistan mesilisi" témisida muhakime yighini ötküzüldi. Yighinda türkiyede Uyghur mesilisi boyiche qelem tewritip kéliwatqan zhurnalistlar Uyghur mesilisi we bu mesilini hel qilish yolliri toghrisidiki köz qarashlirini otturigha qoyup ötti.

Muhakime yighinini sherqiy türkistan ma'arip we hemkarliq jem'iyiti teshkilligen bolup, yighin'gha istanbul küchükchekmeje rayonluq hökümet bashliqi temel qarda déniz ependi bashchiliqidiki her derijilik kadirlar ishtirak qildi. 3-Mart küni chaqirilghan yighin'gha Uyghur mesilisige köngül bölüwatqan zhurnalistlar, mutexessisler we istanbulda turuwatqan Uyghurlardin bolup 400 etrapida kishi qatnashti.

Sherqiy türkistan ma'arip we hemkarliq jem'iyiti re'isi hidayetulla oghuzxan échilish sözi qilip, sherqiy türkistan dewasining ehmiyiti, sherqiy türkistan mesiliside némilerni tonushturushqa diqqet qilish, sherqiy türkistan dewasini pelestin mesilisige oxshash xelq'aralashturush üchün némilerni qilish kérek qatarliq muhim mesililerni otturigha qoydi.

Muhakime yighinida zhurnalist mirkamil qeshqeri "Zhurnalistlarning neziride sherqiy türkistan mesilisi", zhurnalist sulayman shahin ependi "Qirghin qiliniwatqan musulman Uyghur türkliri mesiliside islam dunyasining wezipisi", "Dayli sabax géziti" obzorchisi merwe shebnem uruch xanim "Sherqiy türkistan mesiliside türk dunyasining wezipisi", obzorchi gün'gör yawuz arslan ependi "Xitayning lagérlarni yoshurush üchün qiliwatqan köz boyamchiliqigha qandaq qarshi turush kérek?", tayyar tarjan ependi "Sherqiy türkistan dewasini pelestin dewasidek xelq'ara köngül bölidighan haletke keltürüsh yolliri" qatarliq mawzularda sözlidi.

Muhakime yighinda zhurnalistlar musulman Uyghur türkliri duch kéliwatqan, kelgüside duch kélish éhtimalliqi bolghan xirislarni muhakime qildi. Mezkur zhurnalistlar Uyghur diyaridiki Uyghurlar we bashqa musulman türkiy xelqler duchar boluwatqan éghir bésim siyasitini türkiye jama'etchilige anglitish toghrisidiki teklip-pikirlirini otturigha qoyghan.

Yighin'gha sahibxaniliq qilghan hidayetulla oghuzxan ependi yéqinqi aylardin buyan dunya axbarat wasitiliride "Jaza lagérliri mesilisi" dawamliq orun éliwatqanliqini, bundaq bir peytte türkiyediki zhurnalistlarning Uyghur mesilisige bolghan köz qarishini igilesh we telep-pikirlirini élish üchün bu yighinni chaqirghanliqini, yighinning ünümlük bolghanliqini bildürdi

Zhurnalist mirkamil qeshqeri ependi yighinda sözligen sözide "Jaza lagérliri mesilisi" toghrisidiki muhim tekliplerni otturigha qoyghan. U, teklipliri toghrisida melumat berdi.

Undaqta yighin'gha ishtirak qilghan zhurnalistlar néme muhim tekliplerni otturigha qoydi? hidayetulla oghuzxan ependi bu heqte melumat berdi.

Yighin axirida Uyghur perzentler wetenperwerlik heqqide shé'ir déklamatsiye qildi. Eng axirda yighinda sözligen zhurnalistlargha xatire buyum hediye qilindi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet