Turpandiki ot ketken soda sarayning dewa‏si hazirgha qeder hel qilinmighan

Muxbirimiz erkin
2013.04.01
turpan-ot-soda-saray-305.jpg Turpandiki soda saraygha ot kétiwatqan körünüsh.
Youku

2012‏-Yil 10-ayda turpan sheher merkizidiki “Yéngi tereqqiyat soda baziri” gha ot kétip, nurghun dukan we mal-mülük köyüp külge aylan'ghan idi. Mezkur bazarning xojayini bir xitay bolsimu, biraq uzun muddetlik ijare élip tijaret qiliwatqan dukandarlarning az dégende 70% ni Uyghurlar igileytti.

Qalghan qismini xitay we tungganlar teshkil qilatti. Ot kétip aridin 6 ay ötken bolsimu, biraq da'iriler hazirgha qeder öt apiti heqqide doklat élan qilip, ot kétish sewebini chüshendürüp baqmighan. Bu xelq ichide ot apitining kélip chiqish sewebi heqqidiki her xil gumanlarni qozghighan.

Eng muhimi, yerlik hökümet dukanni rémont qilish, ziyan'gha uchrighan dukandarlargha yar-yölek bolup, ularning tijaritini eslige keltürüwélishigha yardem qilish qatarliq ishlarda hazirgha qeder héchqandaq emeliy tedbir qollanmighan. Weqedin xewerdar kishilerning bildürüshiche, “Yéngi tereqqiyat soda baziri” ning xojayini mezkur binagha bixeterlik sughurtisi sétiwalmighan. Bezi közetküchiler, eger bixeterlik sughurtisi yoq bir binaning soda meshghulati bilen shughullinishigha yol qoyulghan bolsa, bu hökümetning zor xataliqi ikenlikini, bu mesilidiki mes'uliyet hökümetke artilidighanliqini ilgiri sürdi.

Bezi dukan igiliri yerlik hökümetning ézilenggülükige naraziliq bildürüp ürümchige dewa-desturgha barghan bolsimu, biraq yerlik hökümet saqchilarni ewetip dewagerlerni qayturup kelgen. Ulargha dawa qilishni toxtatmisa, aqiwitige özi ige bolidighanliqini agahlandurup tehdit salghan.

Bu munasiwet bilen muxbirimiz erkin, turpan “Yéngi tereqqiyat soda baziri” da dukan achqan bir xanim bilen mezkur mesile heqqide söhbet élip bérip ehwal igilidi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.