Долқун әйса: сәуди әрәбистан һәҗгә қанунсиз кәлгән уйғурларни әмәс, қанунсиз йолға мәҗбурлиған хитайни сораққа тартиши керәк

Мухбиримиз шөһрәт һошур
2016.06.28
hej-mekke-medine-305.jpg Бир күн ичидә мәккигә һәҗ үчүн йиғилған 2 милйондин артуқ мусулман. 2010-Йили 16-ноябир.
AFP

Сәуди әрәбистан сақчилири түнүгүн мәккиниң мисфәлә уйғур мәһәллисидә һәҗ мәзгилини күтүп туруватқан йүзләрчә уйғурни топлап йиғивелиш орниға әкәткән.

Мәлум болушичә, бу уйғурлар хитайниң диний чәклимилири сәвәблик қануний йол билән паспорт вә виза елишқа мувәппәқ болалмиған, нәтиҗидә ғәйрий рәсмий йоллар билән һәҗ ибадитигә кәлгәнләр икән.

Сәудида яшаватқан әһмәт мөмин әпәндиниң баян қилишичә, йиғивелиш җәрянида хитай әлчиханисиниң икки нәпәр хадими сәуди сақчилириға һәмкарлашқан, бу һәқтә радиомизда позитсийә билдүргән дуня уйғур қурултийи иҗра комитети мудири долқун әйса әпәнди хитайни “рамизан мәзгилидә уйғурларға чәтәлдиму паракәндичилик селиватиду” дәп әйиблиди вә сәуди һөкүмитини уйғурларни һәҗ қилишта қанунсиз йолға мәҗбурлиған хитай һөкүмитини сораққа тартишқа дәвәт қилди.

Юқириқилар вәқә һәққидә игиләнгән түнүгүнки учурлар. Бүгүн түркийәдики “истиқлал” ториниң ғәйрий рәсмий мәнбәләргә асасән хәвәр қилишичә, түнүгүн йиғивелинған уйғур һаҗилар үрүмчигә йолға селиветилгән.

Хәвәрдә дейилишичә, юртиға қайтурулғанлар арисида туңганларму бар болуп, айродромда туңган һаҗилар билән сәуди сақчилар арисида талаш-тартиш вә җедәл йүз бәргән.

Биз бу учурларниң тоғрилиқини ениқлаш үчүн сәудидики хитай әлчиханисиға телефон қилған болсақму, әлчихана телефони елинмиди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.