Шәрқий түркистан учур мәркизиниң явропадики тәшвиқати күчәймәктә

Ихтиярий мухбиримиз әкрәм
2016-07-02
Share
abdujelil-qaraqash-ishxana.jpg Шәрқий түркистан учур мәркизиниң рәиси абдуҗелил қарақаш әпәнди ишханисида. 2016-Йили июн, германийә.
RFA/Ekrem

Мәлум болушичә явропада паалийәт қиливатқан шәрқий түркистан учур мәркизи нөвәттики тәшвиқат паалийитиниң нишанини явропада яшаватқан түркләргә қаратқан вә мәлум дәриҗидә нәтиҗигә еришкән. Мәркәз мәсули абдуҗелил қарақаш әпәндимниң билдүрүшичә, мәзкур тәшкилатини қоллаватқан германийәдики җүмлидин явропадики түркләрниң сани бара - бара көпийишкә башлиған.

"уйғурTV" интернет телевизийәси билән германийәдә тәшвиқатлирини қанат яйдуруватқан шәрқий түркистан учур мәркизи бу йил рамзанда дуйисбург шәһиридики түрк җамаитигә көп қетим иптар берип, уйғурларниң нөвәттики вәзийитини аңлатти.

Мәркәз 22-июн өткүзгән иптар паалийити шу хилидики паалийәтләрниң җүмлисидиндур. Игилишимизчә, шу күндики паалийәткә дуйисбург шәһири вә әтрапта яшайдиған түркләр қатнашқан.

Шәрқий түркистан учур мәркизигә иптарға кәлгән германийәдики "NITAB" тәшкилатиниң рәиси давут карапинар әпәндиму шәрқий түркистан информатсиюн мәркизиниң паалийәтлирини юқири баһалиди.

У мундақ деди: "бизниң шәрқий түркистан учур мәркизи тәшкилатини пат-пат йоқлап турушимиздики сәвәб, уйғур түрклири билән болған һәмкарлиқимизни давамлаштуруш, уларниң дәрдигә дәрман болуш үчүндур. Мән шәрқий түркистан тоғрисидики учурларни уйғур телевизийисидин аңлап туримән. Шәрқий түркистандики уйғур түрклириниң бәк еғир зулум астида яшаватқанлиқини билимән. Уларниң әркинликтин тамамән мәһрум қалғанлиқиниму билимән. Дуня уйғурларниң дәрдигә көз юмуватиду. Бу тәрипидин бәкла мәйүсмән. Бир мусулман, бир түрк болуш сүпитим билән уйғурлар үчүн техиму бәкрәк бир ишларни қилишимиз лазимлиқини, дәрһал бир ишларни қилишимиз лазимлиқини һес қилмақтимән."

"нитаб", йәни "нидерхайин түрк академикләр бирлики" нордхәин-вестфалин өлкисидики түрк зиялийлар җәмийити болуп, абдуҗелил әпәндиниң билдүрүшичә, академикләрдин тәркиб тапқан бу зиялийлар қошуни шәрқий түркистан информасиюн мәркизиниң қизғин қоллиғучилири һесаблинидикән.

Бу қетимқи иптар паалийитигә қатнашқан түрк академикләр бирликиниң әзаси болған түрк ханимлардин бири, өзлириниң шәрқий түркистан учур мәркизигә бу йил рамизан киргәндин буян 3-қетим иптарға кәлгәнликини, пүтүн дуня түрклириниң өзлириниң қан-қериндиши болған уйғурларни маддий вә мәниви тәрәпләрдин қоллаш мәҗбурийити барлиқини тилға алди.

У мундақ деди: "биз бүгүн шәрқий түркистан информасиюн мәркизигә ялғуз иптар үчүнла әмәс, бәлки өзимизниң уйғур түрклиригә болған һимайә вә һесдашлиқимизни ипадиләш үчүн кәлдуқ."

Шәрқий түркистан учур мәркизи 1996-йили 1-июн мюнхен шәһиридә қурулған болуп, тәшкилат рәиси абдуҗелил қарақаш әпәнди бүгүн зияритимизни қобул қилғанда, алди билән тәшкилатниң қурулуш тарихи вә мәқситини тилға елип өтти.

Шәрқий түркистан учур мәркизи қурулғандин буян һәрхил гезит, журналларни нәшр қилиш, интернетта радийо, телевизийә қаналлири тәсис қилип учур тарқитиш қатарлиқ көплигән тәшвиқат паалийәтлири билән шуғулланған болуп, бу тәшкилатта узун мәзгил хизмәт қилған уйғур зиялийси пәрһат муһәммиди әпәнди бүгүн бу һәқтә зияритимизни қобул қилғанда, муһаҗирәттики уйғур тәшкилатлири ичидә мәзкур тәшкилатниң сиясий тәшвиқат җәһәттики ролиниң наһайити зорлуқини тәкитлиди.

Абдуҗелил қарақаш әпәнди шәрқий түркистан учур мәркизиниң һазирқи тәшвиқат нишаниниң түрк җамаити болуватқанлиқини тилға алғанда, барғансери көп түркләрниң һесдашлиқиға еришиватқанлиқини тәкитлиди һәмдә мәркәзниң тәшвиқат ишлирини түрк зиялийлириниң үстигә елип йүргүзүватқанлиқини әскәртти. У сөзидә, әйни йиллири бу тәшкилатниң қурулушини дуняниң һәр қайси әллиридики бир қисим пешқәдәм уйғур зиялийлири вә сиясий затлириниң қоллап-қуввәтлигәнликини әсләп өтүп, уларға болған миннәтдарлиқини тилға алди.

Шәрқий түркистан учур мәркизи өз тарихида барлиққа кәлтүргән "тамчә" журнили, "учқун" гезити, "уйғур авази" тор радиоси, "уйғур TV" тор телевизийиси қатарлиқлар өз заманида уйғур җәмийитидә зор тәсир қозғиған ахбарат васитилири болуп, пәрһат муһәммиди әпәндиниң илгири сүрүшичә, хитай һөкүмити бу тәшкилатни "террор тизимлики" гә киргүзгән һәмдә абдуҗелил қарақаш әпәндини 11 нәпәр "террорчи шәхс" ниң бири қатариға тизған болсиму, әмма уларниң ғәрб әллиридә қанат яйдуруватқан паалийәтлирини чәкләш мәқситигә йитәлмигән.

Нөвәттә, шәрқий түркистан учур мәркизи һазир германийәниң дуйисбург шәһиридә айрим ишхана тәсис қилип тәшвиқат паалийәтлирини қанат яйдуруватқан болуп, абдуҗелил қарақаш әпәндиниң баян қилишичә, бу шәһәрдә яшайдиған миңлиған түрк җамаитиниң һесдашлиқи вә қоллашлири барғансери күчийип бармақта икән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт