“Gollandiye Uyghur birliki” xizmetliridin doklat berdi

31-May gollandiyede “Gollandiye Uyghur birliki” ning yérim yilliq xizmetliridin xulase we kéyinki pilanliri heqqide ichki yéghin uyushturuldi hemde gollandiye, bélgiye we gérmaniye qatarliq ellerdiki Uyghurlarning meshrep pa'aliyiti élip bérildi.

“Gollandiye Uyghur birliki” ning orunlashturushi bilen amstérdamdiki türk birleshmisining zalida ötküzülgen pa'aliyet shu yer waqti chüshtin kéyin sa'et 3 tin, kech sa'et 9 gha qeder dawam qildi.

Pa'aliyetke gollandiye, gérmaniye, bélgiye, amérika we en'gliye qatarliq döletlerde yashawatqan Uyghurlardin 50 din artuq adem ishtirak qildi.

Pa'aliyette aldi bilen “Gollandiye Uyghur birliki teshkilati” ni maddiy we meniwi jehetlerde qollap kéliwatqan 20 che aktip jem bolup, ötken yérim yildin béri qilin'ghan pa'aliyetlerdin xulase we iqtisadiy kirim-chiqim ehwalidin melumatlarni élan qildi. Shuning bilen birge yérim yildin béri ijarige ishlitilip kéliwatqan yerge kétiwatqan chiqimni téjep, bashqa ünümlük yerlerge serp qilish layihisi maqullandi. Kéyin, Uyghurlarning en'eniwi pa'aliyetliridin biri bolghan “Meshrep pa'aliyiti” ötküzüldi.

Meshrep gérmaniyedin dolqun eysa, ablimit tursun ependiler, shiwétsiyedin dilshat rishit ependi, amérikidin élshat hesen ependi, bélgiyedin abdullam qatarliq ependiler özi wekillik qilip kéliwatqan teshkilat we jama'etler namidin, özliri turuwatqan yerlerdiki qérindashlirining salimini yetküzüsh bilen bashlandi.

Pa'aliyet ehli özliri teyyarlighan yémekler bilen ghizalan'ghach külke-chaqchaq, yumurlar bilen köngül achti we mezmunluq naxshilar bilen hayajan'gha chömdi.

Gollandiye Uyghur birliki teshkilatining re'isi abdusalam niyaz ependi bu qétimliq pa'aliyet heqqide radi'o anglighuchilirimizgha melumat berdi.