Uyghur déhqanliri hökümet orunlashturghan teshwiqat oyunliri we resimlirining mehellilerni qaplighanliqini bildürdi

Muxbirimiz méhriban
2016.04.08
dehqan-ressam-ablet-musa-kochidin-otken-chashqan-resim.png Déhqan ressam ablet musa szghan “Kochidin ötken chashqan” namliq may boyaq resim
(Menbe: cnr.com)

Xitay hökümet taratqulirida, Uyghur aptonom rayonluq partkomning xoten guma nahiyisi choda yézisigha ewetken xizmet guruppisi bir türküm déhqan ressamlarni teshkillep, kentlerde “Radikalliqni yoqitish” teshwiqati élip bérip, netije qaziniwatqanliqi heqqide xewer bérilgendin kéyin, Uyghur élining jenubidiki yéza, kentlerge téléfon qilip Uyghur déhqanliridin ehwal igiliduq.

Radiyomiz Uyghur élining jenubidiki xoten, qeshqer qatarliq jaylardiki yézilargha téléfon qilip igiligen ehwallardin, nöwette xitay da'iriliri teripidin yézilargha chüshürülgen kadirlarning yéza, kentlerdiki déhqanlar öylirige orunlashturulup, diniy radikalliqni tügitish, milletler ittipaqliqini tekitlesh, sotsiyalistik tüzümni himaye qilish qatarliq namlar bérilgen hökümetning siyasitini teshwiq qilish pa'aliyiti bilen shughulliniwatqanliqi, yéza, kentlerdiki tamlargha medeniyet inqilabi dewrini eslitidighan her xil teshwiqat resimliri, sho'arlar, her xil teshwiqat resimliri chaplinip, yilliq kirimi 5000 somgha yetmeydighan déhqanlarning yighiwélinip atalmish inqilabi naxshilar, medeniyet - sen'et pa'aliyetlirige seperwer qilin'ghanliqi ashkarilandi.

Xotenning melum yézisidin ziyaritimizni qobul qilghan déhqan öz yézisidiki teshwiqat resimliri we inqilabiy naxsha éytish qizghinliqining yézigha kelgen kadirlarning xizmiti we töhpisi ikenlikini bildürdi. Bu déhqan bayanida, yéziliq, kentlik hökümetlerning mehellilerni her xil teshwiqat resimliri bilen toldurup, yéza yashliridin sen'et ömeklirini teshkillesh bilen aldirashliqini, emma déhqanlarning yenila kündilik turmush - qorsaq ghémide tirmishiwatqanliqini bildürdi.

Söhbitimiz jeryanida u, öz a'ilisining ehwali heqqide toxtilip, bir mo besh pung yéri barliqini, yéridin alidighan 300 kilogram ashliqning bir a'ilidiki 4 janning shu yilliq ozuqigha yetmigini üchün, yéza bazirida uni - buni sétip kündilik chay - tuzning ghémide ghorigil yashaydighanliqini bildürdi.

Her xil témidiki teshwiqat resimlirining kent ishxaniliri we déhqanlarning öylirining kocha tamlirigha chongaytip sizilip, ap'aq aqartilghan tamda alahide gewdilen'genliki we déhqanlarning qiziqishini qozghighanliqi heqqide toxtalghan bu déhqandin hökümet élip bériwatqan teshwiqat xizmetliri we yézigha chüshürülgen kadirlar heqqidiki inkaslarni sorighinimizda, u yumurluq qilip,“Hökümet déhqanlarni azad qilimiz dep ewetken kadirlar öylirimizge yerleshti, ular déhqanlardiki diniy radikalliq, xurapatliq idiyisini özgertishke yardem bériwatidu, idiyimiz özgirip medeniylishiwatimiz, ayallirimiz yaghliq artmaydighan, uzun könglek, jilbap kiymeydighan boldi, 60 yashtin töwenlirimiz saqal qoymaymiz.... Emma téxiche bay bolalmiduq, hökümetning namratliqtin qutquzush puligha tayinip yashawatimiz, yetmiginige öyimizde tamaq yewatqan kadirlar yanchuqidin chiqirip bizge yardem qilghudek, dep angliduq... Emma hazirghiche ularning heptide ikki qétim öyimizde yégen tamiqining pulinimu almiduq” dep jawab berdi.

Jenubiy Uyghur élining melum bir shehiridin ziyaritimizni qobul qilghan bir xanim bolsa, özining yézilarda bashlan'ghan bu xil daghdughiliq teshwiqattin qutulush, kadirlarning öymu - öy kirip diniy radikalliqni tügitish, diniy yosunda kiymeslik heqqidiki terbiyilirini anglimasliq üchün, a'ilisi bilen ürümchige ketkenlikini, emma ürümchide yaqa yurtluqlarni qayturush shamilida yene jenubqa qaytip kélip jénini béqish üchün taziliq ishlirini qilip ghorigil yashawatqanliqini bildürdi.

Xitay da'iriliri Uyghurlargha qarita élip bériwatqan bu xil teshwiqatlirini “Rayonda muqimliqni emelge ashurush, diniy radikalliqni yoqitish” tiki netije dep medhiyilewatqan bolsimu, emma kishilik hoquq teshkilatliri we xitay weziyet analizchiliri da'irilerning bu qilmishlirini “Medeniyet inqilabi dewridiki ménge yuyush herikiti” ning qayta ipadilinishi dep tenqidlenmekte.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.