Хитай қанунидин адаләт издәп сәрсан болған обулһәсән абдукерим

Ихтиярий мухбиримиз әкрәм
2016-05-10
Елхәт
Пикир
Share
Принт
Обулһәсән абдукеримға хотән вилайәтлик мейипләр җәмийити тәрипидин берилгән мейиплик кинишкиси.
Обулһәсән абдукеримға хотән вилайәтлик мейипләр җәмийити тәрипидин берилгән мейиплик кинишкиси.
RFA/Qutlan

11 Йилдин буян қанундин адаләт издәп яшаватқан обулһәсән абдукеримниң 131-қетимлиқ әрзиниңму әмәлгә ашмиғанлиқи мәлум болмақта.

Обулһәсән абдукеримниң 131-қетимлиқ әрзи алдинқи һәптә уйғур дияридики мәлум бир тор бетигә қоюлуп, аридин бир қанчә саәт вақит өтмәйла өчүрүп ташланди.

У әрзидә, өзиниң увалчилиққа учраш җәрянини баян қилиш билән биргә, хотәндики сот даирилириниң юқири сотниң һөкүмини иҗра қилмайватқанлиқини, өзиниң җинайи ишлар соти вә төләм соти ечишни тәләп қилидиғанлиқини баян қилған шундақла өзигә һәқсизлиқ қилғанларни қануний җавабкарлиққа тартишни, җисманий зәрбиләр үчүн төләм төләшни оттуриға қойған.

Әсли юрти хотән шәһириниң ласкуй базири ақташ кәнтидин болған обулһәсән абдукерим 1970-йили туғулған болуп, йәккә тиҗарәт билән шуғуллинидикән.

Униң бүгүн зияритимиз җәрянида бәргән мәлуматиға асасланғанда, у өз юртида 2005-йили наһәқчиликкә учрап, кәнт кадирлири тәрипидин таяқ йәп, меңисигә қан чүшкән.

Обулһәсән абдукерим бу сәвәблик юқири-төвәнгә қатрап йүрүп 11 йилдин бири әрз қилип кәлгән. Бирақ, кәнт кадирлири, наһийиниң дохтурлири, сотчилар, сақчилар, әдлийә хадимлири тилини бир қиливелип, униң үстидин адил һөкүм чиқармиған вә униң әрзигә тосқунлуқ қилған.

Обулһәсән абдукерим қанунниң адил һөкүмигә еришәлмәсликтики сәвәбни сиясәттин әмәс, бәлки уйғур диярида бир қисим әмәлдарларниң қанун еңиниң төвәнликидин көридиғанлиқини илгири сүриду.

Әмма уйғур зиялийси абдувәли турсун әпәнди болса, хитайни қанун әмәс, бәлки сиясәт идарә қилидиғанлиқини, хитай қанунидин адаләт күтүшниң әхмиқанилик болидиғанлиқини тәкитлиди.

Биз обулһәсәнниң әрзигә четишлиқ саналған хотән шәһиридики бир қисим сақчи, сот, әдлийә қатарлиқ идарә-органларға телефон қилип әһвал игиләшкә урунған болсақму, җавабқа еришәлмидуқ.

Обулһәсән үстидин өз вақтида хата диагноз қойған хотән ласкуйдики дохтур реқипҗанниң дохтурханисиға телефон уруп униң билән көрүшүш истикимизни билдүргәндә, у телефонимизни елишни рәт қилди. Башқа хизмәтчиләр болса, бундақ бир әһвалдин хәвәрсизликини ейтти.

Дәвагәр обулһәсән 131-қетимлиқ әрзидә үрүмчидики юқири сот мәһкимисиниң хотән оттура сот мәһкимисиниң қайта адил сот ечиши һәққидә һөкүм чиқарғанлиқини, өзиниң бу һөкүмниң күчкә игә болушини арзу қилидиғанлиқини билдүрди. Бирақ у, бу делониң барғансери мурәккәплишип кетиватқанлиқини, четилиш даирисиниң кәңликини, мәсилиниң һәл болмаслиқидики сәвәбниң йәрлик даириләрниң нопузиниң күчлүк келиватқанлиқидин көридиғанлиқини билдүргән болсиму, қанунниң адаләтсизликини тилға алмиди.

Уйғур зиялийси абдувәли турсун әпәнди болса, хитай һакимийитиниң хәлқ мәнпәәтини әмәс, әксичә өзиниң қолчомақлириниң мәнпәәтини қанунни бир яққа қайрип қоюп туруп қоғдайдиғанлиқини тәкитлиди.

Обулһәсән зияритимиз әснасида, 11 йиллиқ дәвагәрлик һаятида өзлириниң көп чиқимдар болғанлиқини, болупму ахирқи бәш йилда үрүмчидә туруп әрз қилишни давамлаштуруватқанлиқини тәкитлиди. У йәнә өзиниң үмидлик икәнликини, юқири сотниң һөкүми хотәнгә йетип барса, хотән оттура сотниң қайта сот ечип, адил һөкүм чиқириши мумкинликини әскәртти.

Пикирләр (0)
Share
Толуқ бәт