Сичүәнниң йибиң түрмисидиму йөткәп келингән уйғур мәһбусларниң барлиқи дәлилләнди

Мухбиримиз шөһрәт һошур
2019-02-14
Елхәт
Пикир
Share
Принт
Уйғур районидин мәһбусларниң йөткәп келингәнлики дәлилләнгән сичүән өлкисиниң йибиң түрмиси.
Уйғур районидин мәһбусларниң йөткәп келингәнлики дәлилләнгән сичүән өлкисиниң йибиң түрмиси.
Social Media

«Зимистан» ториниң өткән айдики хәвиридә уйғур районидин көп санда мәһбусларниң хитай өлкилиридики түрмиләргә йөткәп келингәнлики вә у йәрдә ғәйрий инсаний тәдбирләр билән башқурулуватқанлиқи баян қилинған иди. Мухбиримизниң бу һәқтики илгириләп әһвал ениқлиши давамида сичүән өлкисиниң йибиң түрмисидиму уйғур районидин йөткәп келингән мәһбусларниң барлиқи дәлилләнди. Йибиң шәһәрлик түрмә хадими уйғур мәһбусларниң аталмиш «террорлуқ вә әсәбийликкә четишлиқ алаһидә мәһбуслар» икәнликини тилға алди.

«Зимистан» ториниң хәвәр қилишичә, уйғур районидин йөткәлгән көп сандики мәһбуслар хитайниң һәрқайси өлкилиридики түрмиләргә тарқитилған. Хәвәрдә дейилишичә, уйғур мәһбуслар йөткилиштин аввал алақидар түрмиләрдики мәвҗут мәһбуслар башқа орунларға йөткәлгән. Түрминиң деризә вә ишиклири йеңилинип вә қатму-қат паятлинип, түрмә ичиниң мәхпийәтлики пәвқуладдә күчәйтилгән. Алдинқи һәптә аңлиғучилиримиздин радийомизға кәлгән бир инкаста сичүән өлкисиниң йибиң түрмисидиму уйғур мәһбусларниң барлиқи мәлум қилинған иди. Телефонимизни қобул қилған сичүән өлкилик түрмә башқуруш идарисиниң бир хадими сичүәндики түрмиләрдә уйғур мәһбусларниң барлиқини рәт қилмиди. У бу һәқтә мәлумати вә мәсулийити болған мәхсус бир бөлүмниң барлиқини ашкарилиди. Биз бу бөлүмгә телефон қилғинимизда алақидар хадим уйғур районидин йөткәп келингән мәһбуслар һәққидики учурларни дәп берәлмәйдиғанлиқини, бу учурларни ашкарилашқа қәтий болмайдиғанлиқини тәкрарлиди. 

«Зимистан» ториниң хитай өлкилиригә йөткәп берилған уйғурлар қамалған түрмиләрниң әһвали һәққидики хәвиридә баян қилишичә, бу түрмиләргә исяндин мудапиәлинидиған полат әйнәклик деризә вә електронлуқ төмүр ишик қатарлиқ бихәтәрлик әслиһәлири бекитилгән. Мәһбуслар камер ичидиму койза-кишәнләр билән күн бойи һәрикәтсиз һаләттә турушқа буйрулған. Биз қолимиздики йип учиға асасән сичүәнниң йибиң түрмисигә телефон қилдуқ. Бу йәрдики нөвәтчи хадимму уйғур районидин әкелингән мәһбусларниң бар-йоқлуқи һәққидики соалимизға телефонимизниң номури өзлиригә көрүнмигәнлики үчүн җаваб берәлмәйдиғанлиқини ейтти. Бу хадимму бу түрмидики уйғур мәһбусларниң сани һәққидики соалимизға бу һәқтә юқиридин тәстиқ кәлгәндин кейинла җаваб берәләйдиғанлиқини тилға алди. 

«Зимистан» ториниң хитай өлкилиридики йошурун учур мәнбәлиригә асасән баян қилишичә, хитай түрмилиридики бир түркүм гундипайлар, уйғур райониға әвәтилип, у йәрдики түрмә вә лагерлар көрситилгән. Уларға уйғур мәһбусларни қандақ башқуруш керәклики өгитилгән. Биз йибиң түрмисидики йәнә бир хадимдин бу йәрдики уйғур мәһбусларниң қандақ башқурулуватқанлиқи соридуқ. Бу хадимму җаваб бериштин өзини қачурди. Биз униңдин бу мәсилигә җаваб бериштин қорқуватқанлиқи яки мәлумати йоқлуқини сориғинимизда у җаваб бериштин қорқмайдиғанлиқини, әмма, «улар террорлуқ вә әсәбийликкә четишлиқ алаһидә мәһбуслар» болғанлиқи үчүн бу һәқтә мәлумат берәлмәйдиғанлиқини ейтти. 

«Зимистан» ториниң хәвиридә уйғур мәһбусларниң ана юртидин миңларчә километир узақлаштуруш, түрмиләрдә уларға қатму-қат чәклимиләрни қоюш арқилиқ ташқи дуня билән алақисиниң пүтүнләй үзүветилгәнлики, уларниң бешиға һәрқандақ бир иш кәлсә һечқандақ бир кишиниң хәвәр тапалмаслиқидәк еһтималлиқлар әскәртилгән. Биз йибиң түрмисиниң сиясий-қанун бөлүм хадимидин түрмә хадимлири билән уйғур мәһбуслар арисида тил тосалғуси қатарлиқ мәсилиләрниң көрүлүватқан яки көрүлмәйватқанлиқини соридуқ. Бу хадим «шинҗаңдин мәһбус йөткәш бизниң мәхпий хизмитимиз» дәп изаһат бәргәндин кейин, бу һәқтә мәлумат берәлмәйдиғанлиқини тәкрарлиди.

Пикирләр (0)
Share
Толуқ бәт