Sichüenning yibing türmisidimu yötkep kélin'gen Uyghur mehbuslarning barliqi delillendi

Muxbirimiz shöhret hoshur
2019.02.14
Sichuan-Yibing-Turmisi.jpg Uyghur rayonidin mehbuslarning yötkep kélin'genliki delillen'gen sichüen ölkisining yibing türmisi.
Social Media

“Zimistan” torining ötken aydiki xewiride Uyghur rayonidin köp sanda mehbuslarning xitay ölkiliridiki türmilerge yötkep kélin'genliki we u yerde gheyriy insaniy tedbirler bilen bashquruluwatqanliqi bayan qilin'ghan idi. Muxbirimizning bu heqtiki ilgirilep ehwal éniqlishi dawamida sichüen ölkisining yibing türmisidimu Uyghur rayonidin yötkep kélin'gen mehbuslarning barliqi delillendi. Yibing sheherlik türme xadimi Uyghur mehbuslarning atalmish “Térrorluq we esebiylikke chétishliq alahide mehbuslar” ikenlikini tilgha aldi.

“Zimistan” torining xewer qilishiche, Uyghur rayonidin yötkelgen köp sandiki mehbuslar xitayning herqaysi ölkiliridiki türmilerge tarqitilghan. Xewerde déyilishiche, Uyghur mehbuslar yötkilishtin awwal alaqidar türmilerdiki mewjut mehbuslar bashqa orunlargha yötkelgen. Türmining dérize we ishikliri yéngilinip we qatmu-qat payatlinip, türme ichining mexpiyetliki pewqul'adde kücheytilgen. Aldinqi hepte anglighuchilirimizdin radiyomizgha kelgen bir inkasta sichüen ölkisining yibing türmisidimu Uyghur mehbuslarning barliqi melum qilin'ghan idi. Téléfonimizni qobul qilghan sichüen ölkilik türme bashqurush idarisining bir xadimi sichüendiki türmilerde Uyghur mehbuslarning barliqini ret qilmidi. U bu heqte melumati we mes'uliyiti bolghan mexsus bir bölümning barliqini ashkarilidi. Biz bu bölümge téléfon qilghinimizda alaqidar xadim Uyghur rayonidin yötkep kélin'gen mehbuslar heqqidiki uchurlarni dep bérelmeydighanliqini, bu uchurlarni ashkarilashqa qet'iy bolmaydighanliqini tekrarlidi. 

“Zimistan” torining xitay ölkilirige yötkep bérilghan Uyghurlar qamalghan türmilerning ehwali heqqidiki xewiride bayan qilishiche, bu türmilerge isyandin mudapi'elinidighan polat eyneklik dérize we éléktronluq tömür ishik qatarliq bixeterlik esliheliri békitilgen. Mehbuslar kamér ichidimu koyza-kishenler bilen kün boyi heriketsiz halette turushqa buyrulghan. Biz qolimizdiki yip uchigha asasen sichüenning yibing türmisige téléfon qilduq. Bu yerdiki nöwetchi xadimmu Uyghur rayonidin ekélin'gen mehbuslarning bar-yoqluqi heqqidiki so'alimizgha téléfonimizning nomuri özlirige körünmigenliki üchün jawab bérelmeydighanliqini éytti. Bu xadimmu bu türmidiki Uyghur mehbuslarning sani heqqidiki so'alimizgha bu heqte yuqiridin testiq kelgendin kéyinla jawab béreleydighanliqini tilgha aldi. 

“Zimistan” torining xitay ölkiliridiki yoshurun uchur menbelirige asasen bayan qilishiche, xitay türmiliridiki bir türküm gundipaylar, Uyghur rayonigha ewetilip, u yerdiki türme we lagérlar körsitilgen. Ulargha Uyghur mehbuslarni qandaq bashqurush kérekliki ögitilgen. Biz yibing türmisidiki yene bir xadimdin bu yerdiki Uyghur mehbuslarning qandaq bashquruluwatqanliqi soriduq. Bu xadimmu jawab bérishtin özini qachurdi. Biz uningdin bu mesilige jawab bérishtin qorquwatqanliqi yaki melumati yoqluqini sorighinimizda u jawab bérishtin qorqmaydighanliqini, emma, “Ular térrorluq we esebiylikke chétishliq alahide mehbuslar” bolghanliqi üchün bu heqte melumat bérelmeydighanliqini éytti. 

“Zimistan” torining xewiride Uyghur mehbuslarning ana yurtidin minglarche kilométir uzaqlashturush, türmilerde ulargha qatmu-qat cheklimilerni qoyush arqiliq tashqi dunya bilen alaqisining pütünley üzüwétilgenliki, ularning béshigha herqandaq bir ish kelse héchqandaq bir kishining xewer tapalmasliqidek éhtimalliqlar eskertilgen. Biz yibing türmisining siyasiy-qanun bölüm xadimidin türme xadimliri bilen Uyghur mehbuslar arisida til tosalghusi qatarliq mesililerning körülüwatqan yaki körülmeywatqanliqini soriduq. Bu xadim “Shinjangdin mehbus yötkesh bizning mexpiy xizmitimiz” dep izahat bergendin kéyin, bu heqte melumat bérelmeydighanliqini tekrarlidi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.