Ақсу қараталда «4 хил пешқәдәм» ләрниң мейит намизини мәсчиттә чүшүрүш чәкләнди

Мухбиримиз гүлчеһрә
2014-04-28
Елхәт
Пикир
Share
Принт
Қартал базардики «4 пешқәдәм» кадир нурдун турдиниң мейити, башқуруш чариси бойичә өз һойлисида чүшүрүлмәй, мәсчиттә чүшүргәнлики үчүн чиқирилған җаза уқтуруши. 2014-Йили 31-март, ақсу.
Қартал базардики «4 пешқәдәм» кадир нурдун турдиниң мейити, башқуруш чариси бойичә өз һойлисида чүшүрүлмәй, мәсчиттә чүшүргәнлики үчүн чиқирилған җаза уқтуруши. 2014-Йили 31-март, ақсу.
Social Media

Йеқинқи күнләрдә ақсу шәһәр қартал базарлиқ комитетниң чиқарған «4 хил пешқәдәм» кадирларниң дәпн ишлирини башқуруш вақитлиқ чариси вә буниңға мунасивәтлик бир җаза уқтуруши уйғур иҗтимаий алақә васитилиридә тарқилип ғулғула қозғиди.

Уқтуруш қартал базардики «4 хил пешқәдәм» кадир нурдун турди қаза қилғандин кейин униң мейити башқуруш чариси бойичә өз һойлисида чүшүрүлмәй, мәсчиттә чүшүргәнлики үчүн, нурдун турди вапат болғандин кейин берилидиған 3000 сом дәпн пули вә алтә айлиқ турмуш пулини бәрмәсликни қарар қилғанлиқи һәққидә чиқирилған болуп, йәрлик аһалиләр даириләрниң бу хил чәктин ашқан йолсиз, қанунсиз тәдбири җамаәтчиликтә зор ғулғула вә наразилиқ қозғиғанлиқини инкас қилмақта.

Радиомизға инкас қилғучилар, қартал базар 23-кәнти (долан кәнти) дә олтурушлуқ пешқәдәм кадир нурдун турди, 2014-йили 31-мартта түгәп кәткәндин кейин, мәрһумниң аилә тавабиатлири униң җиназа намизини һойлисида чүшүрмәй мәсчиттә чүшүргәнлики үчүн, һөкүмәттин берилидиған барлиқ тәминатлардин мәһрум қилинғанлиқиға даир учурлар әл җамаәт ичидә наһайити тез тарқилип, даириләрниң уйғурларниң диний етиқадиға қаратқан бу хил чәклимилири уйғурларда наразилиқ кәйпиятиниң йәниму юқири көтүрүлүшигә сәвәб болуватқанлиқини мәлум қилмақта.

Биз бу һәқтә еришкән учурлиримизға асасән қаратал базириға телефон қилип, бу җайда йүргүзүлүватқан аталмиш дәпн ишлирини башқуруш чариси һәққидә йәниму тәпсилий мәлумат игиләшкә тириштуқ,

Базардики дәм елишқа чиққан бир аял оқутқучи, базарда бир кадирниң мейит намизи һойлисида чүшүрүлмәй мәсчиттә чүшүрүлгини үчүн, мусибәт игилириниң вә мәсул кадирларниң җазаға учриғанлиқи һәққидики хәвәрләрниң өзиниң қулиқиғиму йәткәнликини, бу һәқтики ғулғула вә һәр хил наразилиқ пикирлириниң бәкму күчлүк икәнликини, қаршилиқ һәрикәтлириниң болуш еһтималлиқтин әндишә қиливатқанлиқини билдүрди:
-Доланда бирәйләнниң намизини рухсәтсиз мәсчиттә чүшүрди дәп, аилисидикиләргә җәриманә қоюп, хели җиқ иштин мәһрум қипту, пуллирини тутуп һәммини бикар қипту, дәп аңлидуқ.

Әмди биз мусулман уйғур болғандикин, бу, бәк күчлүк ғулғула болуватиду, пикир болсиму ейталмайдиған гәп, уйғурларға бесим қанчә җиқ болғанчә қаршилиқму күчийип кетидиған гәп, һөкүмәт қандақ ойлайдикин...
Биз йәнә базарлиқ һөкүмәт даирилиридин мәлумат игиләшкә тириштуқ, базарлиқ яшанғанлар партийә ячейка секретари турхан исимлик бир кадир зияритимизни қобул қилған болсиму, у дәсләп өзиниң бултур дәм елишқа чиққанлиқ сәвәбидин һазирқи башқуруш чарилиридин хәвири йоқлуқини ейтти, әгәр бу хил чарә йүргүзүлгәндә униң тоғра-хаталиқиға қандақ баһа бериш керәкликини сориғинимизда болса, буниңға җаваб беришкә петиналмиди:
-Асасий қанунда бәлгиләнгән, динға ишиниш-ишәнмәслик, ундақ ишлирини мән билмәйдикәнмән., әгәр ундақ һөҗҗәт болған болса 28 кәнтниң һәммисигә тарқилатти. Бизниң қартал базар вилайәт бойичиму чоң базар һесаблиниду һазир һәр бир дадүйдә бир мәсчит бар. Ундақ һөҗҗәт чиқмиғанду җуму, әгәр болған болса аңлайттим.
-Әгәрдә шундақ бир һөҗҗәт чиққан болса, сизниңчә бу йоллуқму? һөкүмәтниң шундақ бир уқтуруш чиқириши тоғра боламду?
-Униңдин мениң хәвирим йоқкән.

Биз йәнә уйғурларда зор ғулғула қозғаватқан, бу «4 хил пешқәдәмләрниң дәпн ишлирини башқуруш чариси» ниң ақсу қарталдин башқа җайлардиму йүргүзүлгән-йүргүзүлмигәнликини билиш үчүн үрүмчи даирилиридин сорап көрдуқ, тәңритағ райони миллий вә диний ишларни башқурушқа мәсул, исмини ашкарилашни халимиған бир кадир зияритимизни қобул қилип, қарталдики бу хил чәклимидин үндидар арқилиқ хәвәр тапқанлиқини, әмма үрүмчидә бундақ қанунсиз бәлгилимиләрниң йолға қоюлушиниң мумкин әмәсликини билдүрди вә қараталдики дәпн ишлирини башқуруш чарилири йәрлик кадирларниң өз алдиға чиқарған башқуруш чарилири болса керәк дәп пәрәз қилди.

Пикирләр (0)
Share
Толуқ бәт