Aqsu qaratalda "4 Xil péshqedem" lerning méyit namizini meschitte chüshürüsh cheklendi

Muxbirimiz gülchéhre
2014-04-28
Élxet
Pikir
Share
Print
Qartal bazardiki "4 Péshqedem" kadir nurdun turdining méyiti, bashqurush charisi boyiche öz hoylisida chüshürülmey, meschitte chüshürgenliki üchün chiqirilghan jaza uqturushi. 2014-Yili 31-mart, aqsu.
Qartal bazardiki "4 Péshqedem" kadir nurdun turdining méyiti, bashqurush charisi boyiche öz hoylisida chüshürülmey, meschitte chüshürgenliki üchün chiqirilghan jaza uqturushi. 2014-Yili 31-mart, aqsu.
Social Media

Yéqinqi künlerde aqsu sheher qartal bazarliq komitétning chiqarghan "4 Xil péshqedem" kadirlarning depn ishlirini bashqurush waqitliq charisi we buninggha munasiwetlik bir jaza uqturushi Uyghur ijtima'iy alaqe wasitiliride tarqilip ghulghula qozghidi.

Uqturush qartal bazardiki "4 Xil péshqedem" kadir nurdun turdi qaza qilghandin kéyin uning méyiti bashqurush charisi boyiche öz hoylisida chüshürülmey, meschitte chüshürgenliki üchün, nurdun turdi wapat bolghandin kéyin bérilidighan 3000 som depn puli we alte ayliq turmush pulini bermeslikni qarar qilghanliqi heqqide chiqirilghan bolup, yerlik ahaliler da'irilerning bu xil chektin ashqan yolsiz, qanunsiz tedbiri jama'etchilikte zor ghulghula we naraziliq qozghighanliqini inkas qilmaqta.

Radi'omizgha inkas qilghuchilar, qartal bazar 23-kenti (dolan kenti) de olturushluq péshqedem kadir nurdun turdi, 2014-yili 31-martta tügep ketkendin kéyin, merhumning a'ile tawabi'atliri uning jinaza namizini hoylisida chüshürmey meschitte chüshürgenliki üchün, hökümettin bérilidighan barliq teminatlardin mehrum qilin'ghanliqigha da'ir uchurlar el jama'et ichide nahayiti téz tarqilip, da'irilerning Uyghurlarning diniy étiqadigha qaratqan bu xil cheklimiliri Uyghurlarda naraziliq keypiyatining yenimu yuqiri kötürülüshige seweb boluwatqanliqini melum qilmaqta.

Biz bu heqte érishken uchurlirimizgha asasen qaratal bazirigha téléfon qilip, bu jayda yürgüzülüwatqan atalmish depn ishlirini bashqurush charisi heqqide yenimu tepsiliy melumat igileshke tirishtuq,

Bazardiki dem élishqa chiqqan bir ayal oqutquchi, bazarda bir kadirning méyit namizi hoylisida chüshürülmey meschitte chüshürülgini üchün, musibet igilirining we mes'ul kadirlarning jazagha uchrighanliqi heqqidiki xewerlerning özining quliqighimu yetkenlikini, bu heqtiki ghulghula we her xil naraziliq pikirlirining bekmu küchlük ikenlikini, qarshiliq heriketlirining bolush éhtimalliqtin endishe qiliwatqanliqini bildürdi:
-Dolanda bireylenning namizini ruxsetsiz meschitte chüshürdi dep, a'ilisidikilerge jerimane qoyup, xéli jiq ishtin mehrum qiptu, pullirini tutup hemmini bikar qiptu, dep angliduq.

Emdi biz musulman Uyghur bolghandikin, bu, bek küchlük ghulghula boluwatidu, pikir bolsimu éytalmaydighan gep, Uyghurlargha bésim qanche jiq bolghanche qarshiliqmu küchiyip kétidighan gep, hökümet qandaq oylaydikin...
Biz yene bazarliq hökümet da'iriliridin melumat igileshke tirishtuq, bazarliq yashan'ghanlar partiye yachéyka sékrétari turxan isimlik bir kadir ziyaritimizni qobul qilghan bolsimu, u deslep özining bultur dem élishqa chiqqanliq sewebidin hazirqi bashqurush chariliridin xewiri yoqluqini éytti, eger bu xil chare yürgüzülgende uning toghra-xataliqigha qandaq baha bérish kéreklikini sorighinimizda bolsa, buninggha jawab bérishke pétinalmidi:
-Asasiy qanunda belgilen'gen, din'gha ishinish-ishenmeslik, undaq ishlirini men bilmeydikenmen., eger undaq höjjet bolghan bolsa 28 kentning hemmisige tarqilatti. Bizning qartal bazar wilayet boyichimu chong bazar hésablinidu hazir her bir dadüyde bir meschit bar. Undaq höjjet chiqmighandu jumu, eger bolghan bolsa anglayttim.
-Egerde shundaq bir höjjet chiqqan bolsa, sizningche bu yolluqmu? hökümetning shundaq bir uqturush chiqirishi toghra bolamdu?
-Uningdin méning xewirim yoqken.

Biz yene Uyghurlarda zor ghulghula qozghawatqan, bu "4 Xil péshqedemlerning depn ishlirini bashqurush charisi" ning aqsu qartaldin bashqa jaylardimu yürgüzülgen-yürgüzülmigenlikini bilish üchün ürümchi da'iriliridin sorap körduq, tengritagh rayoni milliy we diniy ishlarni bashqurushqa mes'ul, ismini ashkarilashni xalimighan bir kadir ziyaritimizni qobul qilip, qartaldiki bu xil cheklimidin ündidar arqiliq xewer tapqanliqini, emma ürümchide bundaq qanunsiz belgilimilerning yolgha qoyulushining mumkin emeslikini bildürdi we qarataldiki depn ishlirini bashqurush chariliri yerlik kadirlarning öz aldigha chiqarghan bashqurush chariliri bolsa kérek dep perez qildi.

Toluq bet