Uyghurlarning qayghusi gérmaniyening bérlin shehiride naxsha-usul bilen tonutuldi
2017.10.25
Uyghur élide Uyghur medeniyiti xirisqa uchrawatqan bügünki künde gérmaniyening paytexti bérlindiki dunya medeniyet öyide Uyghurlarning weziyiti “Qayghu” namliq usul bilen tonutuldi. 20-21-Öktebir künliri ötküzülgen pa'aliyette londonda yashawatqan sen'etkar rehime mexmut xanim sazendiler bilen birge bérlin'gha bérip, Uyghur naxshiliridin örnekler sun'ghan bolup, tonulghan némis ussulchi tara katérine pandéya xanim bu naxshilargha usul oynighan.
Uyghur sen'etkar rehime mexmut xanim bu pa'aliyetning yéngiliq yaratqan sen'etchilerning yéngi netijilirini körsitishi üchün ötküzülgen bir sen'et körüki ikenlikini bayan qildi.
Tara xanim gérmaniyede tonulghan bir ussulchi bolup, u rehime mexmut xanim bilen 4 aydin béri hemkarliship Uyghurche naxshilargha usul oynash arqiliq, 4 xil héssiyatni ipadilesh pilani bilen bu qétimqi pa'aliyetke ishtirak qilghan idi.
Rehime mexmut xanim özlirining ikki kéche oyun qoyghanliqini, bu oyun'gha gérman muzika tetqiqatchiliri, sen'etchiler we özbékistan, tajikistan qatarliq döletlerning bérlinda turushluq elchiliridin bolup köp sanda kishining ishtirak qilghanliqini, Uyghurche naxshilarning ularning alqishigha érishkenlikini bayan qildi.
Rehime mexmut xanim tara katérine pandéya xanim oynighan “Qayghu” namliq ussulining Uyghurlarning hazirqi qayghuluq weziyitige atap orundalghanliqini, Uyghurlarni tonushturush jehettin nahayiti muhim bir pa'aliyet bolghanliqini bayan qildi.
Gérmaniyening paytexti bérlindiki dunya medeniyet öyide mezkur oyunni körgen bérlindiki Uyghur ziyaliysi doktor ablet semet ependi bu sen'et kéchilikide rehime mexmut xanim éytqan Uyghurche naxsha bilen tara katérine pandéya xanim orundighan ussulning, tamashibinlarning qattiq alqishigha érishkenlikini bayan qildi.
Doktor ablet semet ependi gérmaniyelik ussulchi tara xanim bilen rehime mexmut bashchiliqidiki sen'et guruppilirining téximu zor netijilerni qolgha keltüridighanliqigha ishinidighanliqini bayan qildi.
Bu naxsha-usul bu qétimqi körekte tallansa 4-ayda ötküzülidighan xelq'araliq musabiqige qatnishidiken.
Köp körülgen xewerler
RFA
- Uyghur ziyaliyliri istanbulgha jem bolup, öz milliy teqdiri mesililirini muhakime qildi
- Dolqun eysa b d t kishilik hoquq kéngishidin Uyghur irqiy qirghinchiliqigha qarita emeliy heriket qollinishni telep qildi
- Rahile dawutning ömürlük qamaq jazasigha mehkum qilinishi küchlük naraziliq qozghidi
- Gollandiyening kulemborg shehiride Uyghur irqiy qirghinchiliqi toghrisida söhbet élip bérilghan
- Parlamént ezasi yüksel arslan türkiye tashqi ishlar ministiri xaqan fidandin Uyghurlar toghrisida so'al soridi