Uyghur qelemkeshliri malmö shehirige jem boldi

Dunyaning herqaysi jayliridin kelgen Uyghur qelemkeshliri shiwétsiyening malmö shehirige jem bolup, xelq'araliq ilmiy muhakime yighinigha qatnashti.

28-Awghust küni Uyghur qelemkeshler xelq'ara merkizi, shiwétsiye qelemkeshler jem'iyiti, tibet qelemkeshler jem'iyiti we xitay musteqil qelemkeshler jem'iyiti shiwétsiyening malmö shehiride “Öchmenlik, nepret bolmighan zémin yaritish” témisidiki xelq'araliq yighinni bashlidi. Yighin échilish murasimi 28-awghust kech sa'et 18:00 bilen malmö sheherlik hökümetning heshemetlik zalida ötküzüldi. Yighin'gha amérika, kanada, yaponiye, awstraliye, türkiye, qazaqistan, iran, gérmaniye, norwégiye, gollandiye, daniye, finlandiye, firansiye qatarliq ellerdin kelgen 65 neper kishi qatnashti.

Murasimgha qatnashqan herqaysi qelemkeshler teshkilatlirining mes'ulliri échilish nutqi sözlep, xitayning öz idarisi astidiki milletler we xelqlerning söz, metbu'at, pikir erkinlikige bolghan teqib, basturush siyasetlirini, qelemkeshlerge qiliwatqan ziyankeshliklirini qattiq eyibleshti. Bolupmu, xitay hökümitining nobél mukapati sahibi lyu shawboning ölümige seweb bolghanliqi üstidin köp shikayetler qilishti.

Bu qétimqi yighin'gha 20 din artuq Uyghur qelemkeshliri, ziyaliyliri hemde siyasiy pa'aliyetchiliri dunyaning her yerliridin kélip qatnashqan idi. Uyghur xelq'ara qelemkeshler merkizining re'isi xemit hemrayéf ependi neq meydanda ziyaritimizni qobul qilghanda, bu qétimqi yighinning ottura asiya, türkiye we yawropa elliridin kelgen Uyghur qelemkeshliri we ziyaliyliri üchünmu zor ehmiyetke ige bolghanliqini tilgha aldi.

Qazaqistandin kelgen Uyghur sha'iri abdughopur qutluq ependimu ziyaritimizni qobul qilip, bu qétimqi töt terep qelemkeshliri birleshme yighini heqqidiki tesiratlirini bayan qilip ötti.

Shiwétsiyediki Uyghur yazghuchisi abduréshithaji kerimi ependimu bu qétimqi yighin heqqide toxtilip, bu yighinning Uyghurlarning derdini dunya qelemkeshlirige bildürüsh jehette zor roli bolghanliqini tekitlidi.

Uyghur qelemkeshler xelq'ara merkizi, shiwétsiye qelemkeshler jem'iyiti, tibet qelemkeshler jem'iyiti we xitay musteqil qelemkeshler jem'iyitining bu birleshme xelq'araliq yighinigha Uyghurlarning nöwettiki weziyitidin melumat bérish üchün d u q bash katipi, u n p o mu'awin re'isi dolqun eysa ependimu alahide teklip bilen qatnashti.

En'gliyedin kelgen Uyghur yazarliridin eziz eysa ependimu bu qétimqi yighinda nutuq sözlep, ilham toxti mesilisi üstide alahide toxtaldi.

Bu qétimqi töt terep qelemkeshler yighini 28-awghusttin 30-awghustqiche 3 kün dawam qilidighan bolup, yighinning sahibxanliq wezipisini shiwétsiye qelemkeshler jem'iyiti üstige alghan.