Se'udi erebistan radi'osining Uyghur bölümi Uyghurlarni tonushturush pa'aliyiti ötküzdi

Se'udi radi'osining mudiri hüseyin ehmed deghriri se'udi erebistan radi'osi Uyghur bölümining teshekkürnamisini qobul qildi. 2014-Yili 22-féwral.

Se'udi erebistan radi'osining Uyghur bölümi se'udi erebistan xelqige Uyghurlarni we Uyghur élining hazirqi weziyitini tonushturush meqsiti bilen mexsus pa'aliyet ötküzdi.

22-Féwral küni se'udi erebistanning jidde shehiridiki el rimal méhmanxanisida, se'udi erebistan radi'osi Uyghur bölümining Uyghurlarning weziyitini tonushturush pa'aliyiti bolup ötti. Pa'aliyet se'udi erebistan jidde radi'osining nami “Se'udi erebistan xelq'ara radi'osi” dégen isimgha özgergenliki munasiwiti bilen radi'oning mudiri hüseyin ehmed deghririge Uyghur bölümi teripidin teyyarlan'ghan mexsus teshekkürnamini teqdim qilish pa'aliyiti nami bilen ötküzüldi. Pa'aliyetke se'udi erebistandiki Uyghurlarning mötiwerliridin “Dunya islam elliri ittipaqi” teshkilatining qurultay ishliri mudiri rehmetulla inayetulla, salam shirkitining lidéri emin abdulghefur, wetenperwer ziyaliy abdulla alim türkistani qatarliq kishiler, Uyghur bölümining diktorliri we se'udi erebistanliq zhurnalistlardin köpligen kishiler ishtirak qildi.

Uyghur xelqi diniy telimlerge mohtaj

Pa'aliyette, se'udi erebistan radi'osi Uyghur bölümining péshqedem diktorliridin sirajidin ezizi awwal Uyghurlarni, ularning hazirqi ehwalini we ularning wetinini tonushturdi. Andin se'udi erebistanda Uyghur radi'osining qurulushi, uning tereqqiyati, Uyghur élining hazirqi weziyiti, u jaylardiki diniy bésimlarning köplüki, qur'an oqush we öginishning men'i qilin'ghanliqi, musulmanlarning diniy erkinliki yoqluqi we dunya musulmanlirining Uyghur élidiki qérindashlirini untup qélishining xataliqi qatarliq mesililerde tepsiliy sözlidi. Xitay hökümitining Uyghurlargha qaratqan dindin yiraqlashturush siyasitining wehshiylikini, musulmanlarning, bolupmu yashlarning diniy pa'aliyetlerdin, meschitlerdin qet'iylik bilen men'i qilinidighanliqini, musulman perzentlirige até'izm dersi oqutulidighanliqini chüshinishlik halda bayan qildi. Axirida Uyghur élida se'udi erebistan radi'osining diniy telim tereptin alahide chong rol oynaydighanliqini we bu radi'oni téximu tereqqiy qildurushning zörürlükini tekitlidi.

Uyghur radi'osigha musulmanlarning éhtiyaji köp

Ikkinchi bolup sözge chiqqan ustaz rehmetulla inayetulla türkistani mundaq dédi: “Se'udi erebistan radi'osidin bériliwatqan programmilar se'udi erebistanning süritini, bu hökümetning musulmanlargha bolghan hésdashliqini we musulmanlar üchün qiliwatqan yaxshi pa'aliyetlirini eynen körsitip béridighan bir eynektur. Bu radi'o musulmanlarning qiblisi bolghan ikki herem zéminidin tarqalghanliqi üchün bu radi'oning ehmiyiti chongdur. Radi'o yétip baridighan jaylardiki musulman xelqning bu radi'ogha bolghan éhtiyajimu chongdur.”