Qaramay shehiridiki “Yaxshilar baghchisi ma'arip fondi” taqiwétildi

Ixtiyariy muxbirimiz éhsan
2014.03.31
Share on WhatsApp
Share on WhatsApp
yaxshilar-baghchisi-maarip-fondi-305.jpg “Yaxshilar baghchisi ma'arip fondi” ning ezalar yighini.
Social Media

Xitay hökümitining yolsiz shertliri sewebidin qaramay shehiridiki “Yaxshilar baghchisi” ma'arip fondi taqilip qalghan, jem'iyetning barliq bisati “Méhriban anilar” fondi jem'iyitige ötküzüp bérilgen.

Uyghur yashliri qurghan mezkur fondi jem'iyitining taqiwétilishi, Uyghur milliy ma'arip awan'gartlirigha qaritilghan teqiblesh kücheytilgen mezgilge toghra keldi.

Xitay da'iriliri ötken yili awghustta ana til teshebbuschisi abduweli ayup qatarliqlarni tutup ketken idi.

Qaramay shehiridiki her sahede xizmet qiliwatqan Uyghur yashliri özlükidin teshkillinip, 2012-yili qaramay ma'aripining tereqqiyatigha asas sélish üchün “Yaxshilar baghchisi ma'arip fondi” ni qurup chiqqan idi.

“Yaxshilar baghchisi ma'arip fondi” ning asasliq wezipisi, her qaysi milliy til, yéziqtiki mekteplerning oqutush xizmitige yardem bérish. Aliy mektep imtihanidin eliyul ela bolup ötken oqughuchilargha mukapat tesis qilish. Oqush qizghinliqi yuqiri, tirishchan, netijisi körünerlik bolghan, a'iliside iqtisadi qiyinchiliqi bar oqughuchilargha belgilik oqush yardem puli bérish qatarliqlar bolup, ular yuqiriqidek obyéktlarni yardem bérish nishani qilip, jem'iyettiki her sahe kishilerning aktip awaz qoshushi bilen tedrijiy tereqqiy qilip, qaramay shehiridiki xelq ammisining qollap-quwwetlishige we yaxshi bahasigha érishken idi.

Bu fondi jem'iyet yene nuqtiliq halda, xitay ölkiliride oquwatqan qaramay shehiridin barghan 5 neper Uyghur oqughuchini oqush, turmush we xatirjem oqush shara'iti üchün her ayda muqim iqtisad bilen teminlep kelgen. Ular qaramay shehiride Uyghur ma'aripni qollap qalmastin, medeniyet, tenterbiye pa'aliyetlirinimu iqtisadi jehettin qollap kelgen.

Xitay da'iriliri ötken yili 8-ayda “Ana til shirkiti” qurghuchiliridin abduweli ayup, muhemmed sidiq, dilyar obul qatarliq ziyaliylarni qolgha alghandin kéyin, Uyghur diyarida qurulghan her xil shekildiki jem'iyetlerni teqib qilishni kücheytken, Uyghurlar teripidin qurulghan ammiwi jem'iyetlerni qaytidin tizimgha alghan yaki tizimgha aldurush shertini tesleshtürgen. Buning bilen “Yaxshilar baghchisi ma'arip fondi” qurghuchiliri idare hey'iti pa'aliyetlirini dawamlashturalmighan.

Xitay da'irilirining qanunluq qurulghan “Ana til shirkiti” qurghuchilirigha bohtan chaplap, ularni tutqun qilishi we shirketni taqishi nurghunlighan yaxshi ish qilishni könglige pükken yashlarning aktip pa'aliyet élip bérishigha tosqunluq qilghan.

“Yaxshilar baghchisi ma'arip fondi” hey'et guruppisidiki ezalar yuqiriqidek tehdit we éghir shertler astida fondi jem'iyetni taqashqa mejbur bolghan hemde qolidiki barliq iqtisadini “Méhriban anilar fondi jem'iyiti” ge ötküzüwetken.

“Yaxshilar baghchisi ma'arip fondining xizmetliridin xewerdar, emma ismini ashkarilashni xalighan bir yash ziyaritimizni qobul qilip bu heqte toxtaldi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.