Уйғурларға җинайитини иқрар қилдуруш вә һөкүм елан қилиш йиғинлири ечилмақта

Ихтиярий мухбиримиз еһсан
2014.08.06
Share on WhatsApp
Share on WhatsApp
motsiklit-uyghur-qoralliq-saqchi.jpg Бир уйғурниң коча чарлаватқан қораллиқ сақчиларниң йенидин өтүп кетиватқан көрүнүши. 2010-Йили 3-июл, үрүмчи.
AFP

Биз игилигән учурларға қариғанда, корла шәһәр вә әтраптики наһийиләрдә үч қетимлиқ чоң тазилаш һәрикитидә тутулған уйғурларға қарита өз җинайитини иқрар қилдуруш вә һөкүм елан қилиш йиғини ечилған.

7-Айниң 24-күни қара шәһәр наһийисиниң хәлқ мәйданида нәччә миң амминиң қатниши билән 12нәпәр уйғурға сот ечилған. Бу уйғурлар лопнур вә қара шәһәр наһийисигә қарашлиқ йеза, кәнтләрдә яшайдиған 19 яшлар әтрапидики балилар болуп, һөкүмәт буларни асаслиқ өйидә чениқиш сайманлири байқалған, һиҗабини алмиған, компютерлирида динға даир филим, тәблиқ сақлиған, дегән җинайәтләр билән әйиблигән.

Игилишимизчә, корлида 7-айниң башлирида 15нәпәр уйғурға бу қетмиға охшаш сот йиғини ечилған болуп, уларниң ичидә 3нәпири аял икән. Уларғиму юқириқиға охшаш җинайәтләр артилған, сотта уларниң алдиға 7 йиллиқ, кәйнигә 3 йиллиқ муддәтлик қамақ җазаси һөкүм қилған.

Хитай даирилири бу хилдики йиғинларға төвәнгә чүшкән һәр қайси хизмәт гуруппилири, наһийә-кәнт дәриҗилик тәшкилат бөлүм башлиқлири,һәр қайси идарә-органдики миллий кадирлар, миллий ишчи -хизмәтчиләр, һәр қайси мәсчит имамлири, мәсчит идарә һәйәтлири вә йеза -кәнтләрдики нуқтилиқ тәкшурулуватқанларниң аилә тавабиатлириға алдин хәвәр қилип, уларниң чоқум қатнишишини тәләп қилған.

Корлидики юқиридики ишлардин хәвири бар, әмма исмини ашкарилашни халимиған бир йигитниң ейтишичә, бу хил сот йиғинлири, хитай һөкүмитиниң аммиға қорқунч селиш һәмдә уйғурларни агаһландуруш мәқситидә қиливатқан сиясий һәрикити икән.

Шветисйәдә яшаватқан дуня уйғур қурултийиниң баянатчиси дилшат ришит корлида елип ечилған җинайитини иқрар қилдуруш вә һөкүм елан қилиш йиғинлириға қарита көз қаришини баян қилип, “хитай даирилириниң һазирқи елип бериватқан сиясий һәрикитидә әдлийә тамақлириму зәрбә бериш сияситиниң тармиқиға айланған” дәп көрсәтти.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.