Shiwétsiyede Uyghurlar toghriliq ötküzülgen ikki qétimliq doklat bérish pa'aliyiti diqqet qozghidi

Ikki jumhuriyetning xatirisi yadliniwatqan yéqinqi künlerde shiwétsiyede uyushturulghan Uyghurlar témisidiki ilmiy doklat bérish pa'aliyetliri her sahediki jama'etchilikning diqqitini qozghimaqta.

Shiwétsiye Uyghur ma'arip uyushmisi bilen shiwétsiye Uyghur komitéti ayrim-ayrim halda shiwétsiyediki munasiwetlik orunlar bilen hemkarliship Uyghur tarixi we gu'entanamodiki Uyghur tutqunlirining axirqi teqdiri heqqide ilmiy muhakime élip barghan.

Shiwétsiye Uyghur komitéti teripidin uyushturulghan ilmiy doklat pa'aliyiti 15-noyabir küni stokholmdiki xelq institutining zalida ötküzülgen. Mezkur institutning mu'awin mudiri ulla xanim bu qétimqi pa'aliyetke riyasetchilik qilghan. Shu küni etigen sa'et 9:45 te bashlan'ghan ilmiy doklatqa mezkur institutning oqughuchi-oqutquchiliridin bolup 200 din artuq kishi qatnashqan. Stokholmdiki in'gliz tili gimnaziyisining yuqiri yilliq Uyghur oqughuchisi filora shiwét tili bilen teyyarlighan Uyghurlar heqqidiki mexsus doklatini köpchilikke teqdim qilghan. Andin shiwétsiye Uyghur komitétidiki meslihetchi xadimlar soralghan so'allargha jawab bergen. Doklattin kéyin mezkur institutning réstoranida xizmet qilidighan Uyghur xanimlar köpchilik üchün mexsus Uyghurche ta'am teyyarlighan. Bu qétimqi doklat bérish pa'aliyiti heqqide shiwétsiye Uyghur komitétining re'isi abdushükür samsaq ziyaritimizni qobul qilip ehwal tonushturdi.

17-Noyabir küni shiwétsiye Uyghur ma'arip uyushmisi shiwétsiyediki insan heqliri teshkilatliridin biri bolghan “2008 Xitabnamisi” teshkilati bilen birlikte doklat bérish pa'aliyiti uyushturghan. Mezkur pa'aliyet “Gu'entanamoda untulghan Uyghur tutqunlar” dégen mexsus nam bilen ötküzülgen. Mezkur pa'aliyetke shiwétsiyediki dangliq diplomat, yawropa insan heqliri komitétining hey'et ezasi tomas hammarberg, Uyghur siyasiy panahlan'ghuchilarning ishliri boyiche shiwétsiyede tonulghan adwokat sten derri hemde her sahediki munasiwetlik kishilerdin bolup 50 ke yéqin kishi qatnashqan. Alahide teklip boyiche sözge chiqqan tomas hammarberg gu'entanamo türmisige qamalghan Uyghur tutqunlarning ehwali, bolupmu nöwette téxiche bu yerde tutup turuluwatqan axirqi 3 Uyghurning eng muwapiq usulda melum elge yerleshtürülüsh mesilisi boyiche doklat bergen. Andin dangliq adwokat sten ependimu söz qilip shiwétsiyege yerleshtürülgen adil hekimjanning délosini merkez qilghan halda Uyghur siyasiy panahlan'ghuchilar mesilisi heqqide toxtalghan.

Mezkur pa'aliyette shiwétsiye Uyghur ma'arip uyushmisining re'isi nijat turghun ependimu mexsus témida doklat bergen. U doklatida gu'entanamodin qoyup bérilgen Uyghurlarning hazirqi ehwali hemde ularning özliri yashawatqan ellerde tirishchanliqigha tayinip yaxshi tesir qalduruwatqanliqini tekitligen.