Saqchixana xadimi: "Yéngi yil harpisida 24 sa'etlik charlash élip bériwatimiz!"

Muxbirimiz qutlan
2015-12-31
Share
saqchi-uyghur-melisi-urumchi.jpg Uyghur rayonida arqa-arqidin yüz bériwatqan qarshiliqlardin kéyin, xitay qoralliq qisimlirining Uyghurlar olturaqlashqan rayonlarda charlash élip bériwatqan körünüsh. 2013-Yili 29-iyun, ürümchi.
AFP

Uyghur élidin igiligen uchurlardin melum bolushiche, yéngi yil harpisida da'irilerning jenubtiki wilayet we nahiyelerge qaratqan atalmish "Muqimliq" tedbirliri pewqul'adde kücheymektiken.

Pütkül insaniyet miladiye kaléndaridin 2015-yilini uzitip, 2016-yilini kütüwélish aldida turghan mushu peytlerde Uyghur élidiki saqchixana xadimliri bilen asasiy qatlam kadirlirining öz tewelikide 24 sa'etlik "Charlash" élip bériwatqanliqi diqqet qozghimaqta.

Xotenning guma nahiyesige qarashliq mokoyla yéziliq saqchixana xadimliri radi'omiz ziyaritini qobul qilghanda, özlirining yéngi yil harpisidin ibaret bu pewqul'adde jiddiy peytte "24 Sa'etlik nöwetchilik" te turuwatqanliqini bildürdi.

Mokoyla saqchixanisining ashkarilishiche, nöwette teweliktiki kent we mehellilerge qarita élip bérilidighan kéchilik "Charlash" adette 3 guruppa mes'ul xadimlarning hemkarlishishi bilen élip bérilidiken. Yeni yéziliq saqchixana xadimliri, kentte turushluq bir neper mes'ul saqchi we 3 neper yardemchi saqchi shundaqla her bir kentte 10 neperdin teshkil qilin'ghan "Xelq eskiri" (minbing) birliship kéchilik charlash élip baridiken. "Charlash" ning muhim nuqtisi teweliktiki yerlik ahalilerni tekshürüsh bilen bir waqitta yene sirttin kelgen "Gumanliq kishiler" ning bar-yoqluqini tintishqimu qaritilghan iken.

Saqchixana xadimliri yene "Kéchilik omumiy charlash" axirlashqandin kéyin kündüzde her bir mehellidin "5 A'ilini nuqta qilip mexsus charlash" élip baridighanliqini ilgiri sürdi. Ularning bildürüshiche, künde 5 a'ilini tallap nöwet boyiche tekshürüsh ishi saqchixanilarning kündilik ish küntertipining bir qismi iken.

Biz xotendiki bu ehwalning bashqa wilayet we nahiyelerde bar-yoqluqini bilip béqish üchün aqsuning awat nahiyesidiki asasiy qatlam kadirliri bilen sözlishishke tirishtuq.

Awat nahiyesining melum yézisigha "Muqimliq" saqlash üchün "Töwen'ge chüshken" bir kadir ziyaritimizni qobul qildi.

Uning bildürüshiche, saqchixanilarning künde élip baridighan omumyüzlük "Charlash" xizmitidin bashqa, kenttiki asasiy qatlam kadirliri, yeni kent mes'ulliri, "Muqimliq" kadirliri hemde atalmish "Wetenperwer diniy zatlar" birlikte "Diniy esebiylik" dep qaralghan herqandaq diniy pa'aliyetlerge "Köz-qulaq" bolidiken.

Tepsilatini awaz ulinishtin anglighaysiz.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet