“җәнубий шинҗаң хизмәт йиғини” ниң деһқанларни йәнә сиясий өгинишкә муптила қилғанлиқи мәлум

Мухбиримиз әзиз
2015.11.18
Share on WhatsApp
Share on WhatsApp
kucha-yaqa-yeza--yighin-rohini-uginish.jpg Куча бәһишбағ йезисидики деһқанларниң “җәнубий шинҗаң хизмәт йиғини” роһини өгиниватқан көрүнүши.
Social Media

Хитай даирилири қәшқәрдә ачқан “җәнубий шинҗаң хизмәт йиғини” ахирлишип һечқанчә өтмәйла уйғурлар дияридики һәрқайси җайларда мәзкур йиғинниң роһини өгиниш мәзмун қилинған сиясий паалийәтләрниң җиддий орунлаштурулуватқанлиқи мәлум болмақта. Шу қатарда куча наһийисидә бу йиғинниң роһини өгиниш мәқситидики өгиниш паалийәтлири йәрлик деһқанларни муқим һашарға тәшкилләш билән биллә йолға қоюлмақта.

Биз бу һәқтики әһвалларни игиләп беқиш үчүн куча наһийиси ақөстәң йезилиқ һөкүмәткә телефон қилдуқ. Йезилиқ һөкүмәттики мәсул хадим бу һәқтики соалларға җаваб берип мундақ деди: “ ‛җәнубий шинҗаң хизмәт йиғини‚ ниң роһини һазир муқим өгиниватимиз. Деһқанларму һашарға чиқмиған вақитларда йеза кадирлириниң йетәкчиликидә йиғин роһини гезитләр арқилиқ өгиниватиду.”

Хитай һөкүмитиниң рәсмий таратқулиридин болған “хәлқ тори” вә “тәңритағ тори” қатарлиқларниң хәвиригә қариғанда 3- ноябир қәшқәрдә ечилған “җәнубий шинҗаң хизмәт йиғини” ниң нишанлиқ вәзиписи 2020 - йилиға барғанда бөлгүнчиликкә вә террорлуққа қарши туруп, муқимлиқни сақлаш, милләтләр иттипақи вә диний ишларни яхши башқуруш, биңтуән билән йәрликниң мунасивитини яхшилаш қатарлиқ җәһәтләрдә муһим илгириләш һасил қилиш, шундақла хәлқниң турмуш сәвийисини омумйүзлүк өстүрүш дәп бекитилгән.

Чәтәлләрдики уйғур көзәткүчиләр хитай ахбарат васитилири зор күч билән тәшвиқ қиливатқан мушундақ бир чоң йиғинниң нишанлиқ вәзиписидә иҗтимаий муқимлиқ вәзиписиниң биринчи орунда, йәрлик уйғурларниң турмушини яхшилаш темисиниң иккинчи түрдики вәзипиләр қатарида тилға елинғанлиқиға диққәт қилған иди.

Биз ақөстәң йезисидики мәсул кадирдин йезида муқимлиқ вәзийитиниң һазирқи әһвалини сориғинимизда муқимлиқ вәзийитидә һечқандақ мәсилә йоқлуқини, йезидики яшларниң башқа җайларға йөткилиш яки кетип қелиш мәсилиси мәвҗут әмәсликини баян қилди. У бу һәқтә тохтилип мундақ дәйду:“йезимизда һазир диний әсәбий күчләр асасән қалмиди. яшларниң йезини ташлап кетип қалидиған ишлириму йоқ, чүнки йешил карта арқилиқ бир туташ башқуруш түзүми йолға қоюлуп буниң толуқ алди елинди.”

Түрлүк йоллар арқилиқ мәлум болуватқан охшимиған мәлуматлар уйғур диярида “җәнубий шинҗаң хизмәт йиғини” ниң мәзмунлириниң аллиқачан иҗра қилиш басқучиға өтүп болғанлиқини, шундақла деһқанларниң һашар мәҗбурийәтлирини йәнила давамлиқ түрдә орунлаватқанлиқини дәлиллимәктә.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.