“Jenubiy shinjang xizmet yighini” ning déhqanlarni yene siyasiy öginishke muptila qilghanliqi melum

Muxbirimiz eziz
2015.11.18
kucha-yaqa-yeza--yighin-rohini-uginish.jpg Kucha behishbagh yézisidiki déhqanlarning “Jenubiy shinjang xizmet yighini” rohini öginiwatqan körünüshi.
Social Media

Xitay da'iriliri qeshqerde achqan “Jenubiy shinjang xizmet yighini” axirliship héchqanche ötmeyla Uyghurlar diyaridiki herqaysi jaylarda mezkur yighinning rohini öginish mezmun qilin'ghan siyasiy pa'aliyetlerning jiddiy orunlashturuluwatqanliqi melum bolmaqta. Shu qatarda kucha nahiyiside bu yighinning rohini öginish meqsitidiki öginish pa'aliyetliri yerlik déhqanlarni muqim hashargha teshkillesh bilen bille yolgha qoyulmaqta.

Biz bu heqtiki ehwallarni igilep béqish üchün kucha nahiyisi aq'östeng yéziliq hökümetke téléfon qilduq. Yéziliq hökümettiki mes'ul xadim bu heqtiki so'allargha jawab bérip mundaq dédi: “ ‛jenubiy shinjang xizmet yighini‚ ning rohini hazir muqim öginiwatimiz. Déhqanlarmu hashargha chiqmighan waqitlarda yéza kadirlirining yétekchilikide yighin rohini gézitler arqiliq öginiwatidu.”

Xitay hökümitining resmiy taratquliridin bolghan “Xelq tori” we “Tengritagh tori” qatarliqlarning xewirige qarighanda 3- noyabir qeshqerde échilghan “Jenubiy shinjang xizmet yighini” ning nishanliq wezipisi 2020 - yiligha barghanda bölgünchilikke we térrorluqqa qarshi turup, muqimliqni saqlash, milletler ittipaqi we diniy ishlarni yaxshi bashqurush, bingtu'en bilen yerlikning munasiwitini yaxshilash qatarliq jehetlerde muhim ilgirilesh hasil qilish, shundaqla xelqning turmush sewiyisini omumyüzlük östürüsh dep békitilgen.

Chet'ellerdiki Uyghur közetküchiler xitay axbarat wasitiliri zor küch bilen teshwiq qiliwatqan mushundaq bir chong yighinning nishanliq wezipiside ijtima'iy muqimliq wezipisining birinchi orunda, yerlik Uyghurlarning turmushini yaxshilash témisining ikkinchi türdiki wezipiler qatarida tilgha élin'ghanliqigha diqqet qilghan idi.

Biz aq'östeng yézisidiki mes'ul kadirdin yézida muqimliq weziyitining hazirqi ehwalini sorighinimizda muqimliq weziyitide héchqandaq mesile yoqluqini, yézidiki yashlarning bashqa jaylargha yötkilish yaki kétip qélish mesilisi mewjut emeslikini bayan qildi. U bu heqte toxtilip mundaq deydu:“Yézimizda hazir diniy esebiy küchler asasen qalmidi. Yashlarning yézini tashlap kétip qalidighan ishlirimu yoq, chünki yéshil karta arqiliq bir tutash bashqurush tüzümi yolgha qoyulup buning toluq aldi élindi.”

Türlük yollar arqiliq melum boluwatqan oxshimighan melumatlar Uyghur diyarida “Jenubiy shinjang xizmet yighini” ning mezmunlirining alliqachan ijra qilish basquchigha ötüp bolghanliqini, shundaqla déhqanlarning hashar mejburiyetlirini yenila dawamliq türde orunlawatqanliqini delillimekte.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.